މުސްތަގްބަލަށްޓަކައި، ޖީލުތައް ސަލާމަތް ކުރަން ބައެއް އުނދަގޫ ނިންމުންތައް ނިންމަން ޖެހޭ: ރައީސް

ޒަމާންތަކެއް ވާންދެން ކަމެއް ގޯސްކޮށް ކުރުމަކީ އެކަން ދޫކޮށްލައިގެން ތިބެން ޖެހޭ ސަބަބެއް ނޫން ކަމަށާއި އެހެންވެ، މުސްތަގްބަލަށްޓަކައި، ޖީލުތައް ސަލާމަތް ކުރުމަށް ބައެއް އުނދަގޫ ނިންމުންތައް ނިންމަން ޖެހިވަޑައިގެންނެވި ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވެފައިވަނީ ގދ. ވާދުއަށް ވަޑައިގެން އެ ރަށުގެ ރައްޔިތުންނާއި ބައްދަލަުކުރައްވާ ވާހަަކަފުޅުދައްކަވަމުންނެވެ.

ރައީސް ވިދާޅުވީ މުޖުތަމައުގައި، ލޯ ކުރިމަތީ ގޯސްކަމެއް ހިނގާނަމަ އެ ކަމަކަށް ނޫނެކޭ ބުނަން ކޮންމެ ފަރުދަކަށް ވެސް ކެރެން ވާނެ ކަމަށާއި އަދި ޒަމާންތަކެއް ވަންދެން ވަކި ކަމެއް ގޯސްކޮށް ހިނގުމަކީ ވެސް އެ ކަމެއް ދޫކޮށްލައިގެން ތިބެންވީ ސަބަބެއް ނޫންކަމަށެވެ.

ރައީސް ވިދާޅުވީ ކުރާ ގޯސް އަމަލުތައް ދޫކޮށްލަން ޖެހޭކަން ގަބޫލުކުރުމާއި އެކު އެފަދަ ކަންކަމާއި ދެކޮޅަށް މަސައްކަތް ކުރުމުގެ ހިތްވަރު އަމަލުން ދައްކަންޖެހޭ ކަމަށެވެ. އަދި އުނދަގޫ ނިންމެވުންތަކެއް ނިންމެވީ އެހެންވެ ކަމަށް ވެސް ރައީސް ވިދާޅުވިއެވެ.

ވޭޕު މަނާކުރަން ނިންމެވުމާއި، ސިނގިރޭޓުގެ އަގު ބޮޑުކުރަން ނިންމިވެވި ނިންމެވުމަށް ނުސީދާ މޭރުމަކުން އިޝާރާތްކުރައްވައި ރައީސް ވިދާޅުވީ މިއީ މުޖުތަމައުގެ ތެރޭގައި ހުރި އެކިއެކި ވަބާތަކުން ގައުމު ސަލާމަތް ކުރުމަށް، އަޅުގަނޑުމެންގެ ތެރޭގައި އަަށަގަނެފައި ހުރި، މޫލާފައި ދެވިހިފާފައި ހުރި ބައެއް އާދަތަކުން ހިތްވަރު ލާފައި ސަލާމަތްކޮށްދިނުމުގެ ނިޔަތުގައި ކުރާ ކަންކަން ކަމަށެވެ.

ރައީސް ވިދާޅުވީ ބައެއް ނިންމުންތަކަކީ އެއްގޮތަކަށް ވެސް ރައްޔިތުންނަށް ދަތިކުރުމަށް ނުވަތަ އުނދަގޫކުރުމަށް ކުރާ ކަންކަމެއް ނޫންކަމަށާއި އެކަން ކުރުމުގައި އެމަނިކުފާނުގެ ނިޔަތް ވަރަށް ސާފު ކަމުގައި ވިދާޅުވިއެވެ.

ރައީސް ވިދާޅުވީ ތަރައްގީއަކީ ހަމައެކަނި ލޮލަށް ފެންނަ، އަތުން ހިފޭ ތަކެތި ނޫން ކަމަށެވެ. ތަރައްގީއަކީ އެ ކުރިއެރުމާއެކުގައި، ސިކުނޑިތައް ތަރައްގީކޮށް، އަޚްލާގު ރަނގަޅުކޮށް، ދަރިން ރަނގަޅަށް ތަރުބިއްޔަތުކޮށް، މުޖުތަމައުގައި ހެޔޮ ކަންކަމަށް އަމުރުކޮށް ނުބައި ކަންކަމުން ރައްކާތެރި ކުރުން ކަމަށެވެ.