ދިވެހިން އެންމެ ގިނައިން ގޮސްއުޅޭ ބެންގަލޫރުގައި ޗައިނާގައި ފެތުރެމުންދާ ނުރައްކާތެރި ވައިރަސްގެ 2 ކޭސް ފެނިއްޖެ
ބެންގަލޫރުގައި 2 ކޭސް އަދި ގުޖަރާތުގައި 1 ކޭސް ފެނިފައިވޭ
ޗައިނާގައި ފެތުރެމުންދާ ނުރައްކާތެރި ވައިރަސްގެ ޖުމްލަ 5 ކޭހެއް އިންޑިއާއިން ވަނީ ފެނިފައި
ދިވެހިން އެންމެ ގިނައިން ގޮސްއުޅޭ ބެންގަލޫރުގައި ޗައިނާގައި ފެތުރެމުންދާ ނުރައްކާތެރި ވައިރަސްގެ 2 ކޭސް ފެނިއްޖެއެވެ.
އިންޑިއާ ޓުޑޭގައި ރިޕޯޓްކޮށްފައިވާ ގޮތުން ބެންގަލޫރުގައި 2 ކޭސް އަދި ގުޖަރާތުގައި 1 ކޭސް ފެނުމާ ގުޅިގެން ކަރްނާޓަކާއިން 'އާންމު ތަންތަނުގައި މާސްކު އެޅުމަށް' އެޗްއެމްޕީވީ އާ ގުޅޭ އިރުޝާދު ނެރެފައިވެއެވެ.
ޗައިނާގައިވެސް އިންފެކްޝަންތައް އިތުރުވަމުންދާކަމަށް ރިޕޯޓުކުރެވިފައިވާއިރު، ނޭވާލުމަށް އުނދަގޫވާ ބަލި ކަމުގައިވާ އެޗްއެމްޕީވީގެ 5 ކޭސް ފެނިފައިވެއެވެ. އެއީ ބެންގަލޫރުގައި 2 ކޭސް، އަހްމަދާބާދުގައި 1 ކޭސް އަދި ތަމިލްނާޑޫގައި 2 ކޭސް ފެނިފައިވާކަމަށް ބުނެވެއެވެ. މި ވައިރަސް ފެތުރިދާނެކަމުގެ ބިރު އޮތުމާއެކު، ބެންގަލޫރުގައި ފެނުނު 2 ކޭސްއާ ގުޅިގެން، ކަރްނާޓަކާ ސަރުކާރުން އިރުޝާދެއް ނެރެ، ބަލީގެ އަލާމާތްތައް ހުންނަ މީހުން އާންމު ތަންތަނަށް ނުދިއުމަށާއި، ގިނަ މީހުން އެއްވާ ތަންތަނުގައި މާސްކު އެޅުމަށް އިލްތިމާސްކޮށްފައިވެއެވެ.
ބެންގަލޫރުގައި، 8 މަސްދުވަހުގެ ފިރިހެން ކުއްޖަކާއި 3 މަސްދުވަހުގެ އަންހެން ކުއްޖެއްގެ ގައިން މި ވައިރަސް ފެނިފައިވާކަމަށް ރިޕޯޓްކޮށްފައިވެއެވެ. މިއީ ގައުމުން ބޭރަށް ދަތުރުކުރި ކުދިންތަކެއް ނޫން ކަމަށާއި، ޓްރެވަލް ހިސްޓްރީއެއް ނެތްކަމަށް ވެސް ވަނީ ރިޕޯޓްކޮށްފައެވެ.
އަހްމަދާބާދުގައި، 2 މަސްދުވަހުގެ ކުއްޖެއްގެ ފަރާތުން އެޗްއެމްޕީވީ ފެނިފައިވެއެވެ. މި ކުއްޖާ މިހާރު އަމިއްލަ ހޮސްޕިޓަލެއްގައި ފަރުވާ ހޯދަމުންދާއިރު، އޭނާގެ ހާލަތު ރަނގަޅުކަމަށް ނޫހުގައި ވަނީ ރިޕޯޓްކޮށްފައެވެ.
މި ކޭސްތައް ފެނިފައިވަނީ، ޗައިނާގައި ވައިރަލް އިންފެކްޝަންތައް އިތުރުވަމުންދާކަމަށް ރިޕޯޓުކުރެވިފައިވާ ދަނޑިވަޅެއްގައެވެ. މި އިންފެކްޝަންތައް ގުޅިފައިވަނީ ހިއުމަން މެޓަޕްނިއުމޯވައިރަސް (އެޗްއެމްޕީވީ) އާ ކަމަށް ބެލެވެއެވެ.
މިކަމާއި ގުޅިގެން އެޗްޕީއޭއިން ބުނެފައިވަނީ ހާލަތު ގާތުން މޮނިޓަރ ކުރަމުން އަންނަ ކަމަށެވެ.
