ގާޑިއޯލާ ބުނީ ސިޓީ އޮތީ އެ ޓީމުގެ އަސްލު ފެންވަރުގައި ނޫން ކަމަށް!

މެންޗެސްޓަރ ސިޓީ އޮތީ އެ ޓީމުގެ އަސްލު ފެންވަރުގައި ނޫން ކަމަށް، އެ ޓީމަށް އިރުޝާދު ދެމުން އަންނަ ޕެޕް ގާޑިއޯލާ ބުނެފި އެވެ.

އޭނާ މިހެން ބުނީ އިނގިރޭސި ޕްރިމިއަރ ލީގުގައި ވެސްޓް ހޭމް ޔުނައިޓެޑާ ދެކޮޅަށް ކުޅެ، ސިޓީ މޮޅުވި މެޗަށްފަހު ނޫސްވެރިންނާ ވާހަކަ ދައްކަމުންނެވެ. އެ މެޗުން ސިޓީ މޮޅުވެފައިވާއިރު، މިދޭތެރެއިން އެ ޓީމުގެ ނަތީޖާތައް ވަނީ ވަރަށް ބޮޑަށް ދަށްވެފަ އެވެ. ނަމަވެސް އަނެއްކާ ވެސް ސިޓީ އަންނަނީ މަޑުމަޑުން ކުރިއަށް ޖެހެމުންނެވެ.

ގާޑިއޯލާ ބުނީ އެންމެން ވެސް ބަލާނީ މެޗުގެ ނަތީޖާއަށް ކަމަށެވެ. ގާޑިއޯލާ ބުނީ ފާއިތުވި އަހަރުތަކުގައި ސިޓީގެ އަސްލު ފެންވަރު ފެނިފައިވާނެ ކަމަށާއި، މިވަގުތު ސިޓީ އޮތީ އެ ޓީމުގެ އަސްލު ފެންވަރުގައި ނޫން ކަމަށެވެ. އެކަން ފާހަގަ ކުރަމުން ގާޑިއޯލާ ބުނީ، އޭނާގެ ވާހަކަތައް އޮޅުވާނުލަށް އެދޭ ކަމަށެވެ. އޭނާ ހުރީ މެޗުން މޮޅުވުމުން ވަރަށް އުފާވެފައި ކަމަށާއި، ކުރިއަށް އޮތް އެފްއޭ ކަޕުގެ މެޗާ ހަމައަށް ވެސް އޭނާ ހުންނާނީ ހަމަޖެހިގެން ކަމަށް ގާޑިއޯލާ ބުންޏެވެ.

އެހެން ނަމަވެސް، އެންމެނަށް ވެސް މިދިޔަ އަހަރުތަކުގަައި ސިޓީން ކުޅެފައިވާ ކުޅުން ފެންނާނެ ކަމަށާއި، މިވަގުތު ސިޓީ އޮތީ އެ އަހަރުތަކުގައި ދެއްކި ކުޅުމާ އެއް ފެންވަރެއްގައި ނޫން ކަމަށް ގާޑިއޯލާ ވަނީ ތަކުރާރުކޮށް ބުނެފަ އެވެ. އޭނާ ބުނީ ލީގުގަައި އެވަޓަންއާ ދެކޮޅަށް ކުޅުނު މެޗު އެއްވަރުވެގެން ނިންމާލަން ޖެހުނު ނަަމަވެސް، ވެސްޓް ހޭމް މެޗަށް ވުރެ އެ މެޗުގައި ސިޓީގެ ކުޅުން ރަނގަޅު ކަމަށެވެ. ނަމަވެސް މެޗު އެއްވަރުވުމަކީ ބޭނުންވާ ގޮތް ނޫން ކަމަށް އޭނާ ބުންޏެވެ.

މިދޭތެރެއިން ސިޓީގެ ނަތީޖާތައް ވަރަށް ބޮޑަށް ދަށްވި ނަމަވެސް، އެ ޓީމު އަލުން އަނބުރާ އިހު އޮތް ފެންވަރަށް ނުވަތަ ޙާލަތަށް ގެނެވޭނެ ކަމުގެ ޔަޤީންކަން އޮތް ކަމަށް ވެސް ގާޑިއޯލާާ ބުންޏެވެ. އެކަމަށްޓަކައި ބޭނުން ވަނީ މެޗުތަކުން މޮޅުވުން ކަމަށާއި، އަދި ހަމައެހެންމެ ޓީމުގެ ކުޅުމުގެ ފެންވަރު ރަނގަޅު ކުރުން ކަމަށް ވެސް ގާޑިއޯލާ ބުންޏެވެ. މިހާރު ވެސް ސިޓީގެ ޓީމުން ރަނގަޅު ކަންތައްތަކެއް ފެންނަމުންދާ ކަމުގައި ގާޑިއޯލާ ވަނީ ބުނެފަ އެވެ.

ލީގުގައި މިވަގުތު ސިޓީ އޮތީ ލީގު ތާވަލްގެ ހަ ވަނަ މަގާމުގަ އެވެ. މިހާތަނަށް ލީގުގަައި ކުޅެފައިވާ 20 މެޗުން އެ ޓީމަށް ލިބެނީ 34 ޕޮއިންޓެވެ. ލީގުގައި ހަ މެޗަކުން ސިޓީ ބަލިވެފައިވާއިރު، މިއީ ގާޑިއޯލާގެ އިރުޝާދުގެ ދަށުން ސިޓީގެ ނަތީޖާތައް އެންމެ ދަށްވި ފަހަރެވެ.