ރައީސް ޑރ. މުޙައްމަދު މުއިއްޒުގެ މި ސަރުކާރުން ކުރަމުން އަންނަ ބޮޑެތި ވައްކަންތައް ނުބެލިގެން މި ދަނީ ވަކިބަޔަކު ކުރާތީ ކަމަށް ނިމިދިޔަ އެމްޑީޕީ ސަރުކާރުގެ ޑެޕިއުޓީ މިިނިސްޓަރ އަދި އެމްޑީޕީގެ ގައުމީ މަޖިލިސް މެމްބަރު މުޙައްމަދު އިހުސާން ވިދާޅުވެއްޖެއެވެ.
އިހުސާން މިފަދައިން ވިދަޅުވެފައި ވަނީ ރާއްޖެ ޓީވީން ބުރާސްފަތި ދުވަހުގެ ރޭ ގެނެސްދިން "ފަލަސުރުޚީ" ޕްރޮގްރާމުގައި ވާހަކަދައްކަވަމުންނެވެ.
މި ސަރުކާރުން ޚިޔާނާތުގެ ގޮތުގައި ގެއްލުނު ފައިސާ ނުހޯދެނީ ކަން ކުރި މީހާ އަށް ވިސްނައިގެން، މައްސަލަ ބަލާތީ ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވަނީ ކުރިން ވިދާޅުވެފައެވެ.
ދައުލަތުގެ މީޑިއާގައި ވާހަކަދައްކަވަމުން އަބްދުއްރަހީމް ވިދާޅުވީ ދައުލަތުގެ ތެރޭގައި ހިންގާ ކޮރަޕްޝަންގެ މައްސަލަތައް ތަހުގީގުކުރާ އިރު އެ ޚިޔާނާތުގެ ތުހުމަތު ކުރެވޭ މީހާ އާއި މެދު ވަރަށް ގިނަ ފަހަރު ވިސްނޭ ކަމަށާއި އެ މީހާ އަކީ ނުފޫޒު ގަދަ މީހަކަށް ވެސް ވެދާނެ ކަމަށެވެ. އަދި ކޮންމެ ހާލަތެއްގައި ވެސް އެފަދަ މައްސަލަތައް ބަލަން ޖެހޭ ކަމަށާއި ޚިޔާނާތްތެރިވީ ވަޒީރަކަށް ވިޔަސް، ކުރީގެ ރައީސަކަށް ވިޔަސް އެކަން ބަލާ ފިޔަވަޅުއަޅަން ޖެހޭ ކަމަށް އަބްދުއްރަހީމް ވަނީ ވިދާޅުވެފައެވެ. އަދި އެެހެންކަމުން ޚިޔާނާތުގެ މައްސަލަތައް ބެލުމުގައި ރައީސް ޑރ. މުހައްމަދު މުއިއްޒު ބައްލަވަނީ އެ ކަމުގެ ތުހުމަތު ކުރެވޭ މީހާ އަށް ނޫން ކަމަށާއި އެ މީހަކު ކުރި ކަމަކަށް ކަމަށް އޭނާ ވަނީ ވިދާޅުވެފައެވެ.
އަބްދުއްރަހީމްގެ މި ވާހަކަތަކަށް ރައްދުދެއްވާ އިހުސާން ވިދާޅުވީ ކަމެއް ހިނގައި ދިޔައީމަ އެކަންކަން ހިނގައި ދިޔައީ އެހެންތޯ ބެލުމަށް، މި ބަލަނީ ދިވެހިރައްޔިތުންނަށް ފެންނަން ހުރި ކަންތައްތަކަށާއި ކަމުގެ ހެކިތަކަށް ކަމަށެވެ. މި ސަރުކާރުގައި ވަރަށް ބޮޑެތި ގިނަ ހިޔާނާތުގެ މައްސަލަތައް ފެންމަތިވެފައިވާ ކަމަށާއި ނަމަވެސް އެންޓި ކަރަޕްޝަން ކޮމިޝަނުގައި އެބޭފުޅެއްގެ މައްސަލަ އެންމެ ގިނައިން ހުރިކަަމަށް ވާހަކަތައް ދެކެވޭ ބޭފުޅަކީ މިހާރުގެ ރައީސް ޑރ. މުޙައްމަދު މުއިއްޒު ކަމަށެވެ.
އިހުސާން ވިދާޅުވީ އެޗްޑީސީގެ ބޮޑު ވައްކަމާއި ހިޔާނާތުގެ ވާހަތައްވެސް އަޑުއިވިފައިވާ ކަމަށާއި އަދި އެ ވައްކަމާއި ގުޅިގެން އެ ކުންފުނީގެ ގިނަ މުވައްޒަފުންތަކެއް ވެސް ސަސްޕެންޑް ކުރެވިގެން ދިޔަ ވާހަކަތައް ވެސް އަޑުއިވިގެން ދިޔަ ކަމަށެވެ. ނަމަވެސް މި ސަރުކާރުން މި މައްސަލަތައް ބަލާނެ ކަމަށް ވިދާޅުވި ނަމަވެސް އަދިވެސް އަމަލީ ގޮތުން މި މައްސަލަތައް ބަލާކަމުގެ އެއްވެސް އިޝާރާތެއް ފެންނަން ނެތް ކަމަށާއި މި ސަރުކާރުގެ ވައްކަމުގެ މައްސަލަ ތައް ނުބެލިގެން މިއުޅެނީ މި ސަރުކާރުން ބަލަން ބޭނުން ނުވާ ވަކި ބަކަޔަކު ކުރާ ކަމަށް ވާތީ ކަމަށް އިހުސާން ވިދާޅުވިއެވެ.
ކަމެއް ހިނގާދިޔައީމަ، އެކަންކަން ހިނގާދިޔައީ އެހެންތޯ ބަލަން، މި ބަލަނީ އޭގެއިން ފެންނަން ހުރި ހެކިތަކަށް. އަޅުގަނޑުމެންގެ ދިވެހިރައްޔިތުންނަސް ފެންނަ ހުރި ކަންތައްތަކަށް. މިސާލަކަށް ވަރަށް ބައިވަރު ޚިޔާނާތުގެ ކަންތައްތަށް ހިނގައިފި. ދިވެހިރާއްޖޭގެ އެންޓި ކަރަޕްޝަން ކޮމިޝަނުގައި އެބޭފުޅެއްގެ މައްސަލަ އެންމެ ގިނައިން ހުންނެވިކަމަށް ވާހަކަ ދެކެވެނީ މިހާރުގެ ރައީސުލްޖުމްހޫރިއްޔާގެ ހިޔާނާތުގެ މައްސަލަތަކެއް.އެމްޑީޕީ ސަރުކާރުގެ ޑެޕިއުޓީ މިިނިސްޓަރ މުޙައްމަދު އިހުސާން
އިހުސާން އިތުރަށް ވިދާޅުވީ އެންސްޕާ އަކީ ދިވެހިރައްޔިތުންގެ ބޭސްފަރުވާގެ ނިޒާމް ހަރުދަނާ ގޮތެއްގައި ހިންގުމަށް ޓަކައި އުފައްދާފައިވާ އިދާރާއެއް ކަމަށާއި ނަމަވެސް އެތަނުގައި ވެސް ބޮޑެތި ޚިޔާނާތުގެ މައްސަލަތަކެއް ފެންމަތިވެފައިވާ ކަމުގެ އަޑުތަކެއްއިވިފައިވާ ކަމަށެވެ. އަދި އެކަމަށް ޚުދު އެބޭފުޅުން އެއްބަސްވެވަޑައިގެންފައިވާ ކަމަށް ވެސް އޭނާ ވިދާޅުވިއެވެ.
އިހުސާން ވިދާޅުވީ އެ ބޭފުޅުން އެންސްޕާގެ ހިޔާނާތްތަކަށް އެއްބަސް ވެވަޑައިގެންކަން ހާމަވާ އެންމެ ބޮޑު ހެއްކަކީ އެވިދާޅުވާ އެއްބަސްވުން ކަމަށާއި އަދި މި މައްސަލަތައް ފެންމަތިވެ، މިހާރު އެ ބޭފުޅުން އަމިއްލަފުޅަށް އެ ވިދާޅުވާ އެއްބަސްވުން ވެސް ބާތިލް ކުރައްވާފައިވާ ކަމަށް ވެސް އިހުސާން ވިދާޅުވިއެވެ.
