ސަރުކާރު ހިއްސާވާ ކުންފުނިތަކުން ލޯނު ނަގާނަމަ ފިނޭންސްގެ ހުއްދަ ހޯދަންޖެހޭ ގޮތަށް ހަދައިފި
ކޯޑަށް އަމަލުކުރަންޖެހޭ ކުންފުނިތަކުން މި ގައިޑްލައިންގައިވާ ކަންތައްތައް ފުރިހަމަ ކުރުމަށްފަހު ހުއްދަ ހޯދުމަށް އެދި ފޮނުވާނީ ފިނޭންސް މިނިސްޓްރީއަށް
ފިނޭންސް މިނިސްޓަރު މޫސާ ޒަމީރު
ސަރުކާރު ހިއްސާވާ ކުންފުނިތަކުން ލޯނު ނަގާނަމަ ފިނޭންސްގެ ހުއްދަ ހޯދަންޖެހޭ ގޮތަށް ހަދައިފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން އަންގާރަ ދުވަހު އާންމުކުރި ސަރކިއުލަރގައި ބުނެފައިވަނީ، ސަރުކާރުގެ ކުންފުނިތަކާއި، ސަރުކާރު ބައިވެރިވާ ކުންފުނިތަކާއި ވިޔަފާރި އުސޫލުން ހިންގާ ސަރުކާރުގެ ލޯނު ނެގުމުގައި އަމަލުކުރާނެ ގޮތް ކަނޑައެޅުމަށް، އެ ބޯޑުން ވަނީ ސަރުކާރުން ހިއްސާވާ ކުންފުނިތަކުން ލޯނު ނެގުމުގައި އަމަލުކުރާނެ ގޮތުގެ ގައިޑްލައިން އެކުލަވާލާފައިވާ ކަމަށެވެ.
މިއީ ދައުލަތުގެ ވިޔަފާރިތަންތަން ޕްރައިވަޓައިޒް ކުރުމާއި ކޯޕަރަޓައިޒްކުރުމާއި އަދި މޮނިޓަރކޮށް އިވެލުއޭޓް ކުރުމުގެ ގާނޫނުގެ 2 ވަނަ މާއްދާގެ 6 ވަނަ ނަންބަރުގައި ބަޔާންކޮށްފައިވާ މަގުސަދުތައް ހާސިލްކުރުމުގެ ގޮތުން ސަރުކާރުގެ ކުންފުނިތަކާއި އަދި ސަރުކާރު ބައިވެރިވާ ކުންފުނިތަކާއި، ވިޔަފާރި އުސޫލުން ހިންގާ ސަރުކާރުގެ ތަންތަން ހިންގުން އިތުރަށް ހަރުދަނާކުރުމަށް މަގުފަހިކޮށްދިނުމަށާއި، ކޯޕަރޭޓް ގަވަރަނަންސް ހަމަތައް ނެގެހެއްޓުމަށްޓަކައި، އެ ގާނޫނުގެ 62 ވަނަ މާއްދާގެ (މ) ގެ ދަށުން އެކުލަވާލާފައިވާ ގައިޑްލައިނެއް ކަމަށް ޕީސީބީން ބުނެއެވެ.
ލޯނު ނަގަން ބޭނުންވާ ކުންފުނިތަކުން، މި ގައިޑްލައިންގައިވާ ކަންކަން ފުރިހަމަކޮށް، ލޯނު ނެގުމަށް ބޯޑުން ނިންމުމަށްފަހު، ކުންފުނީގެ ހިއްސާދާރުގެ ހުއްދައަށް އެދި ފޮނުވަންވާނެކަމަށް ބުނެފައިވެއެވެ. އަދި ހުއްދަ ލިބުމުން، ލޯނު ނެގުމަށް ފާސްކުރާތާ 5 ދުވަހުގެ ތެރޭގައި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑާއި ހިއްސާކުރަންވާނެ ކަމަށް ބުނެފައިވެއެވެ.
މި ގައިޑްލައިންގައި ބުނެފައިވަނީ "ކޯޑް އޮފް ކޯޕަރޭޓް ގަވަރނަންސް ފޯ ސްޓޭޓް އޯންޑް އެންޓަޕްރައިޒަސް" ގެ 22 ވަނަ މާއްދާއަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ބައްދަލުވުމުގައި ގެނެސްފައިވާ އިސްލާހުގެ ދަށުން އެ ކޯޑަށް އަމަލުކުރަންޖެހޭ ކުންފުނިތަކުން މި ގައިޑްލައިންގައިވާ ކަންތައްތައް ފުރިހަމަ ކުރުަށްފަހު ހުއްދަ ހޯދުމަށް އެދި ފޮނުވާނީ ފިނޭންސް މިނިސްޓްރީއަށެވެ.
އަދި މި ކޯޑަށް އަމަލުކުރުން މިވަގުތު އިސްތިސްނާވާ ކުންފުނިތަކުގެ ތެރެއިން، ސަރުކާރު މެޖޯރިޓީ ހިއްސާވާ ކުންފުނިތަކުން ވެސް މި ގައިޑްލައިންގައިވާ ކަންތައްތައް ފުރިހަމަ ކުރުމަށްފަހު ހުއްދަ ހޯދުމަށް އެދި ފޮނުވާނި ފިނޭންސް މިނިސްޓްރީއަށް ކަމަށް ބުނެފައިވެއެވެ. މީގެ އިތުރުން އެހެނިހެން ދައުލަތުގެ ވިޔަފާރިތަންތަނުންވެސް ކުންފުނީގެ އޮނިގަނޑު ބަދަލުކުރުމުގައި މި ގައިޑްލައިންގައިވާ ކަންތައްތައް ފުރިހަމަ ކުރުމަށްފަހު ހިއްސާދާރުގެ ހުއްދަ ހޯދުމަށް ވަނީ އެދިފައެވެ.
