ނޮވެމްބަރު މަހު ރާއްޖޭގެ އިންފްލޭޝަން މައްޗަށް ގޮސް ތަކެތީގެ އަގު ބޮޑު ތަނުން އުފުލިއްޖެ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން އާންމުކުރި އެންމެ ފަހުގެ ކޮންސިއުމަރ ޕްރައިސް އިންޑެކްސް (ސީޕީއައި) އިން ހާމަވެއްޖެއެވެ.

ސްޓެޓިކްސް ބިއުރޯ އިން ހާމަ ކުރި މައުލޫމާތުން ދައްކާގޮތުގައި ރާއްޖޭގެ އިންފްލޭޝަން ވަނީ ބޮޑުތަނުން އިތުރުވެފައެވެ.

2024 ވަނަ އަހަރުގެ އޮކްޓޯބަރު މަހާ އަޅާބަލާއިރު، ހުރިހާ ގްރޫޕްތަކެއްގެ ސީޕީއައި ވަނީ 2.47 އިންސައްތަ އަށް އިތުރުވެފައެވެ. މިއީ ކުރީ މަހު 0.16 އިންސައްތަ އަށް އިންފްލޭޝަން ކުޑަކޮށް ދަށްވެފައި ހުރުމާއި އަޅާބަލާއިރު ބޮޑު އިތުރުވުމެކެވެ.

ސީފީއައި މަތިވުމުގެ މާނައަކީ ދިރިއުޅުމުގެ ޚަރަދުތައް ބާރު މިނުގައި އިތުރުވަމުންދާކަމާއި، ދުވަހުން ދުވަހަށް ބޭނުންވާ ތަކެތީގެ އަގުތަކަށް ނޭދެވޭ އަސަރު ކުރަމުން ދާކަމަވެ.

2024 ވަނަ އަހަރުގެ ނޮވެމްބަރު މަހު، މަހުގެ ބާވަތްތައް ނުހިމަނައި ކޮންސިއުމަރ ޕްރައިސް އިންޑެކްސް (ސީޕީއައި) ވަނީ 2.62 އިންސައްތަ އަށް އިތުރުވެފައެވެ. މިއީ އޮކްޓޯބަރު މަހާ އަޅާ ބަލާއިރު ބޮޑު ތަނުން އިތުރުވުމެއް ކަން ފާހަގަ ކުރެވެއެވެ. ހިސާބުތަކުން ދައްކާގޮތުގައި 2024 ވަނަ އަހަރުގެ ކުރީކޮޅާ އަޅާބަލާއިރު ރާއްޖޭގެ ބާޒާރުގައި ތަކެތީގެ އަގުތައް ވަނީ ބާރު މިނުގައި މައްޗަށް ގޮސްފައެވެ. މިކަމުގެ ސަބަބުން ދުވަހުން ދުވަހަށް ބޭނުންވާ މުދަލާއި ޚިދުމަތްތަކުގެ އަގުބޮޑުވުމާ ގުޅިގެން ގޭބިސީތަކުގެ ޚަރަދުތައް ފޫބެއްދުމުގައި ބޮޑެތި ދަތިތަކާ ކުރިމަތިލާން ޖެހުމަކީ އެކަށީގެންވާ ކަމެކެވެ.

ނޮވެމްބަރު މަހު އެތައް ކެޓަގަރީއެއްގެ އަގުތައް ވަނީ ބޮޑުތަނުން އިތުރުވެފައެވެ. ޚާއްޞަކޮށް ދުންފަތުގެ ބާވަތްތަކާއި، ކާބޯތަކެއްޗާއި، ދަތުރުފަތުރުގެ ބައިތަކުގެ އަގުތައް ވަނީ މައްޗަށް ގޮސްފައެވެ.

ދުންފަތުގެ ބާވަތްތަކުގެ އަގު ވަނީ 98.12 އިންސައްތަ އަށް އިތުރުވެފައެވެ. މިއީ މައިގަނޑު ގޮތެއްގައި 2024 ވަނަ އަހަރުގެ ނޮވެމްބަރު މަހު ޢަމަލުކުރަން ފެށި ދުންފަތުގެ ބާވަތްތަކުގެ އިމްޕޯޓް ޑިއުޓީއަށް ގެނެވުނު ބަދަލުތަކުގެ ސަބަބުން އައި ބަދަލެއް ކަމަށް ވަނީ ބެލެވިފައެވެ. ޚާއްޞަކޮށް ސިނގިރޭޓުގެ އަގު ވަނީ ގާތްގަނޑަކަށް ދެގުނަ އަށް އިތުރުވެފައެވެ. ހަމަ އެހެންމެ، ރެސްޓޯރަންޓްތަކާއި ކެފޭތަކުގެ އަގުތައް ވަނީ 15.81 އިންސައްތަ އަށް މައްޗަށް ގޮސްފައެވެ.

މީގެއިތުރުން، ކަނޑުމަގުން ކުރާ ދަތުރުފަތުރުގެ އަގުތައް 5.13 އިންސައްތަ އަށް މައްޗަށް ގޮސް ކަނޑު ދަތުރުފަތުރުގެ ޚިދުމަތްތަކުގެ އަގުތައް ވަނީ ބޮޑުވެފައެވެ.

އަގު އިތުރުވި އެހެނިހެން ބައިތަކުގެ ތެރޭގައި ފައިވާނާއި ބޫޓުން 2.66 އިންސައްތަ، މޭވާ 0.64 އިންސައްތަ، އަދި އަންނައުނުން 0.94 އިންސައްތަ މައްޗަށް ދިއުން ފާހަގަ ކުރެވެއެވެ.

2024 ވަނަ އަހަރުގެ ނޮވެމްބަރު މަހުގެ ސީޕީއައި ހިސާބުތަކުން ދައްކާގޮތުގައި ތަރުކާރީއާއި މޯބައިލް މުވާޞަލާތީ ޚިދުމަތްތަކުގެ އަގުތައް ދަށްވެފައިވީ ނަމަވެސް، ޖުމްލަ ގޮތެއްގައި ހިސާބުތަކުން ދައްކާގޮތުގައި ދިރިއުޅުމުގެ ޚަރަދުތައް ވަނީ އިތުރުވެފައެވެ. 2025 ވަނަ އަހަރު ފެށޭއިރު، އިންފްލޭޝަން މަތީ މިންވަރެއްގައި ހުންނާނެކަމަށް ލަފާކުރެވޭތީ، ގޭބިސީތަކުގެ ޚަރަދުތައް ހަމަޖެއްސުމުގައި ބޮޑެތި ގޮންޖެހުންތަކެއް ކުރިމަތިވުމަކީ އެކަށީގެންވާ ކަމެކެވެ.

މީގެ އިތުރުން، ކުރިއަށް އޮތްތަނުގައި ސަބްސިޑީ މޮޑެލަށް ގެނެވޭ ބަދަލުތަކުގެ ސަބަބުން އަސާސީ މުދަލާއި ޚިދުމަތްތަކުގެ އަގުތައް އިތުރަށް ބޮޑުވުމަކީ އެކަށީގެންވާ ކަމެކެވެ. މިކަމުގެ ސަބަބުން ގޭބިސީތަކަށް ކުރިމަތިވާ މާލީ ދަތިތައް އިތުރަށް ބޮޑުވެގެންދާނެ ކަމަށް ބެލެވެއެވެ.