މިފްކޯގެ ޗެއަރޕާސަން މަގާމުން ވަކިކޮށް މަސްވެރިކަން އިސްތިހާރުކުރާ ކުންފުންޏަށް ބަދަލުކޮށްފި
އެމްފޯރމްޕީސީ އަކީ މަސްވެރިކަން ޕްރޮމޯޓްކުރުމަށް އުފެއްދި ކުންފުންޏެއް
މިފްކޯގެ ޗެއަރޕާސަންއަކަށް ހުންނެވި އަހްމަދު ޝަރީފް (މ)
މިފްކޯގެ ޗެއަރޕާސަން އަހުމަދު ޝަރީފް މަގާމުން ވަކިކޮށް މަސްވެރިކަން އިސްތިހާރުކުރާ ކުންފުންޏަށް ބަދަލުކޮށްފިއެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީބީސީ) އިން ބުނީ މިފްކޯގެ ޑިރެކްޓަރުންގެ ބޯޑުގެ ޗެއަރޕަރސަން ކަމުގެ މަޤާމުގައި ހުންނެވި ގދ.ތިނަދޫ، ސޯމާ، އަހުމަދު ޝަރީފް ހޯމަ ދުވަހު އެ މަޤާމުން ވަކިކޮށް، މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ކޯޕަރޭޝަން (އެމްފޯރމްޕީސީ) ގެ ޑިރެކްޓަރުންގެ ބޯޑުގެ ޗެއަރޕަރސަން ކަމުގެ މަޤާމަށް ޢައްޔަންކޮށްފައިވާ ކަމަށެވެ.
މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ކޯޕަރޭޝަން (އެމްފޯރމްޕީސީ) އަކީ ދަރަންޏަށް ޒިންމާވާންޖެހޭ މިންވަރު ކަނޑައެޅިފައިވާ ސަރުކާރުގެ ސައްތައިން ސައްތަ ހިއްސާ އެކުލެވިގެންވާ ކުންފުންޏެކެވެ.
މި ކުންފުނި އުފެއްދެވުމުގެ މަޤްޞަދުތަކުގެ ތެރޭގައި ރާއްޖޭގެ މަސްވެރިކަމުގެ ޞިނާޢަތު އިތުރަށް ފުޅާކޮށް މުޖުތަމަޢަށް އެ ޞިނާޢަތުން ލިބިދޭ މަންފާ އިތުރުކުރުމަށްޓަކައި އެކުއަރކަލްޗަރ އާއި މެރިކަލްޗަރ ފަދަ ކަނޑުފަޅުގެ އެންމެހާ ވަސީލަތްތަކުން އުފައްދާ އުފެއްދުންތައް ހިމެނޭ ގޮތުން، ރާއްޖޭގައި ކުރާ މަސްވެރިކަމުން އުފައްދާ އުފެއްދުންތައް ބައިނަލްއަޤްވާމީ ބާޒާރުގައި އިޝްތިހާރުކޮށް ޕްރޮމޯޓްކުރުން ހިމެނެއެވެ.
އަދި އޭގެ ވިޔަފާރިން ލިބޭ މަންފާ އިތުރު ކުރުމަށްޓަކައި ރާއްޖޭގެ މަސްވެރިކަމަށް ޚާއްޞަ ބްރޭންޑެއް ތަޢާރަފުކޮށް، ޤައުމީ ބާޒާރާއި ބައިނަލްއަޤްވާމީ ބާޒާރަށް ނެރުމާއި، ފެންވަރު ރަނގަޅު އަދި މަތީ އަގު ލިބޭ ތަފާތު ބާޒާރުތަކުގައި ރާއްޖޭގެ މަސްވެރިކަމުގެ އުފެއްދުންތަކަށް ހިއްސާ ހޯދުން ހިމެނެއެވެ.
މި އަހަރުގެ ފެބްރުއަރީ މަހުގެ 4 ވަނަ ދުވަހު އުފެއްދި އެމްފޯރމްޕީސީ އިން މިހާތަނަށް ކުރި އެއްވެސް މަސައްކަތެއް މީޑިއާ އާ ހަމަ އަށް އައިސްފައެއް ނުވެއެވެ.
