ޤާނޫނު އަސާސީގައި، ރައްޔިތުން މަޖިލީހުގެ އެންމެ އިސްދައުރަކީ ސަރުކާރު ޖަވާބުދާރީ ކުރުވުން: ޔާމީން
30 ޑިސެމްބަރު 2024 | ހޯމަ 01:50މި ސަރުކާރުން ގާނޫނު އަސާސީއަށް ގެނައި އިސްލާހަކީ ރައްޔިތުންގެ އަތްފައި ބުރިކުރުން
ކުރީގެ ރައީސް އަބްދުﷲ ޔާމީން ޕީއެންއެފްގެ ޖަލްސާގައި
ރާއްޖޭގެ ޤާނޫނު އަސާސީ އެކުލަވާލިއިރު، އެ ޤާނޫނު އަސާސީގައި ޔައްޔިތުންގެ މަޖިލީހުގެ އެންމެ އިސްދައުރަކަށް އޮންނާނީ ސަރުކާރު ޖަވާބުދުދާރީ ކުރުވުން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވެފައިވަނީ އާދިއްތަ ދުވަހުގެރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުންނެވެ.
މަޖިލީހުގެ ރައީސް އަބްދުއްރަހީމް އަބްދުﷲ އަށް ވަރަށް ބޮޑަށް ފާޑުވިދާޅުވަމުން ރައީސް ޔާމީން ވިދާޅުވީ ރާއްޖޭގެ ޤާނޫނު އަސާސީ އެކުލަވާލިއިރު، އެ ޤާނޫނު އަސާސީގައި ޔައްޔިތުންގެ މަޖިލީހުގެ އެންމެ އިސްދައުރަކަށް އޮންނާނީ ސަރުކާރު ޖަބާދުދާރީ ކުރުވުން ކަމަށާއި ސަރުކާރަކަށް ސަރުކާރު ޖަވާބުދާރީ ނުކުރެވޭނެކަމަށެވެ. އަދި ސަރުކާރު ޖަވާބުދާރީ ކުރުވުމަކީ ޖުޑިޝަރީން ވެސް ކުރާނޭ ކަމެއް ނޫން ކަމަށާއި ޖުޑިޝަރީން ބަލާނީ ޖުޑިޝަރީއާއި ހަމައަށް އަންނަ މައްސަލައެއް އެކަނި ކަމަށެވެ.
ޔާމީން ވިދާޅުވީ ޑިމޮކްރެޓިކް ނިޒާމުގައި ސަރުކާރު ޖަވާބުދާރީ ކުރުވުމަކީ ރައްޔިޔުންގެ މަޖިލީހުގެ އެންމެ އިސް ދައުރުކަމަށާއި އެ މާއްދާ މިހާރު އޮތް މަޖީލީހުން އިސްލާހު ނުކުރާކަމަށެވެ.
ޔާމީން ވިދާޅުވީ ރައްޔިތުން ދިން ވޯޓު ކަށަވަރުކުރުމަށް ދާދި ފަހުން ގެނައި އިސްލާހަކީ ރައްޔިތުންގެ އަތްފައި ބުރިކުރުން ކަމަށާއި އަދި އެއީ ރައްޔިތުންގެ މަންދޫބުންގެ އަނގައިގައި މަލަން އެޅީކަމަށެވެ. އަދި އެއީ މި ސަރުކާރުން ކުރި ލަދު ހުތުރުކަމެއް ކަމަށާއި އެއީ ޚުދުމުހުތާރު ވެރިކަމެއް ގާއިމުކުރުން ކަމަށް ޔާމީން ވިދާޅުވިއެވެ.
ޔާމީން ވިދާޅުވީ ފާސްކުރި އެ ގާނޫނުގެ ސަބަބުން ދިވެހިރާއްޖެ ދުވަހަކުވެސް ނުދާވަރަށް ފަހަތައް ގޮސްފިކަމަށާއި އަދި މިހާރު މި ގައުމަށް ޒިޔާރަތް ކުރާ އެއްވެސް މީހަކު މިއީ ޑިމޮކްރެޓިކް ގައުމެކޭ ނުބުނާނޭ ކަމަށް ޔާމީން ވިދާޅުވިއެވެ.
ޔާމީން އިތުރަށް ވިދާޅުވީ ގާނޫން އަސާސީއަށް އެ ގެނައި އިސްލާހަކީ ރައްޔިތުންގެ ހައްގުތަކަށް އަރައިގަތުންކަމަށެވެ. އަދި އެއީ މި ސަރުކާރުން އަމިއްލައަށް ފަޚުރުވެރިވެ ދައްކަން ޖެހޭ ވާހަކައެއް، ނުވަތަ ކުރެވުނު މޮޅުކަމެއް ނޫންކަމަށް ވެސް ޔާމީން ވިދާޅުވިއެވެ.
