ރާއްޖެ އެތެރެކުރި ގިނަ އަދަދެއްގެ ސިނގިރޭޓްތަކެއް ގެއްލިއްޖެ އެވެ.

މި ސިނގިރޭޓުތައް ގެއްލިފައި ވަނީ މާލޭގެ ބޮންޑެޑް ވެއަރހައުސްއެއްގައި ބަހައްޓާފައި ވަނިކޮށެވެ.

ސިނގިރެޓްތައް ގެއްލުނުކަމަށް ބުނާ މި މައްސަލަ ދިވެހި ފުލުހުންނާއި ކަސްޓަމްސްއިން ބަލަމުންދާކަން ހާމަކުރެއްވީ ހޯމް މިނިސްޓަރު ޢަލީ އިޙްސާނެވެ.

ސޯޝަލް މީޑިއާގައި ހިއްސާކުރެއްވި މެސެޖެއްގައި މިނިސްޓަރު އަލީ އިހުސާން ވިދާޅުވީ ޒަމާނުއްސުރެ ބޮންޑެޑް ވެއަރހައުސް މާލޭގެ އެކި ގެތަކުގައި އަދި އެޕާޓްމަންޓުތަކުގައި ހިންގަމުން އަންނަ ކަމަށާއި، އެފަދަ ތަންތަނުގައި ދެތަޅު ހަރުކޮށް ތަޅުދަނޑި ބަލަހައްޓަނީ ކަސްޓަމްސްއިން ކަމަށެވެ. މުދާ ގެއްލުނު ބޮންޑެޑް ވެއަރހައުސްއަކީވެސް ގެއެއްގައި ހަދާފައި ހުރި ތަނެއްކަން މިނިސްޓަރު ފާހަގަކުރެއްވިއެވެ.

މިނިސްޓަރު ވިދާޅުވީ އެ ވެއަރހައުސްއަކީ ކަސްޓަމަސްގެ ބެލުމުގެ ދަށުގައި ހުރި ތަނެއްނަމަވެސް އެތަނުގެ ވެރިފަރާތުން ވެއަރހައުސް ހިންގިތަން ދޫކޮށް އެތަނުގައި އެހެން މަސައްކަތެއް ކޮށްފައިވާ ކަމަށެވެ. އެ މައުލޫމާތު ލިބުމުން އެކަން ޔަގީންކޮށް ތަނުގެ ވެރިފަރާތަށް އެތަނުގައި ހުރިކަމަށް ރެކޯޑުތަކުން ދައްކާ މުދަލަށް ޑިއުޓީ ދެއްކުމަށް އަންގާފައިވާނެ ކަމަށްވެސް މިނިސްޓަރު ވިދާޅުވިއެވެ.

މައުލޫމާތު ލިބުނު ގޮތުން، 575 ވަރަކަށް ސިނގިރޭޓް ކޭސް ވަނީ ވީނުވީއެއް ނޭންގި ގެއްލިފައިއެވެ. އެ އަދަދުން ބަލާނަމަ އެއީ 34،500 ކާޓޫނެވެ. ވަކިވަކިން ބަލާނަމަ އެއީ ހަތް މިލިއަނެއްހާ ސިނގިރޭޓެވެ. މީގެތެރޭގައި ރާއްޖޭގައި އާންމުކޮށް ބޭނުންކުރާ ތިން ބްރޭންޑެއްގެ ސިނގިރޭޓު ހިމެނެ އެވެ.

މާލޭގައި ހުންނަ ބޮންޑެޑް ވެއާހައުސްއެއްގައި ރައްކާކޮށްފައި ހުއްޓައި ގެއްލުނު މި ސިނގިރޭޓް ކޭސްތަކުގެ އިމްޕޯޓު ޑިއުޓީ ހިމެނޭގޮތަށް ދައުލަތަށް ދައްކަންޖެހޭ އެކި ފީތަކުގެ އަދަދު ޖުމްލަ 47 މިލިއަން ރުފިޔާއަށް އަރަ އެވެ.

އެތަކެތި ގެއްލިފައި ވަނީ ސިނގިރޭޓްގެ އިމްޕޯޓް ޑިއުޓީ ބޮޑުކުރި ފަހުންނެވެ. ސިނގިރޭޓާއި ބިޑިން ނަގާ އިމްޕޯޓު ޑިއުޓީ 8 ރުފިޔާ އަށް ބޮޑުކުރަން ފާސްކުރި ގާނޫނު ރައީސް ޑރ. މުހައްމަދު މުއިއްޒު ތަސްދީގުކުރެއްވީ ނޮވެމްބަރު 1، ގަ އެވެ.

ކަސްޓަމްސް އާއި ފުލުހުން ވަނީ މިކަން ސިއްރުކޮށްފަ އެވެ. މިކަމާ ގުޅޭގޮތުން އެ ދެ އިދާރާގެ ރަސްމީ ބަހެއް ލިބިފައެއްނުވެ އެވެ.