މި ސަރުކާރާއި ގުޅޭގޮތުން ދައްކާނެ އުންމީދީ އެއްވެސް ވާހަކައެއްނެތް: މޫކޭ
28 ޑިސެމްބަރު 2024 | ހޮނިހިރު 06:40ރައީސް މުއިއްޒު ވެރިކަމާއި ހަވާލުވެވަޑައިގެންނެވީއްސުރެ މިއަދާ ހަމައަށް ހުންނެވީ ޑިފެންސްގައި
ބުރާސްފަތި ދުވަހުގެ ރޭ އެމްޑީޕީން ކުރިއަށް ގެންދިޔަ ޖަލްސާގައި އެމްޑީޕީގެ ގައުމީ މަޖިލީހުގެ މަޑުއްވަރީ ދާއިރާގެ ރައީސް މޫސާ އަލީ މަނިކު ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރާއި ގުޅޭގޮތުން ދައްކާނެ އުންމީދީ އެއްވެސް ވާހަކައެއްނެތް ކަމަށް އެމްޑީޕީގެ ގައުމީ މަޖިލީހުގެ މަޑުއްވަރީ ދާއިރާގެ ރައީސް މޫސާ އަލީ މަނިކު (މޫކޭ) ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ އެމްޑީޕީ ހަރުގެ ޖަލްސާގައި މޫކޭ ވިދާޅުވީ ރައީސް މުއިއްޒާއި ގުޅޭގޮތުން އަދި މިސަރުކާރާ ގުޅޭގޮތުން ރައްޔިތުން ކުރާނެ އުންމީދެއް ނެތް ކަމަށާއި، ދައްކާނެ އުންމީދީ ވާހަކައެއް ނެތް ކަމަށެވެ. މިސަރުކާރަށް އަހަރަކަށް ވުރެ ގިނަ ދުވަސްވެގެންދާއިރު، ރައްޔިތުން އެދޭ ފަދަ އުންމީދީ ދުވަހެއް ވެސް ނާންނާނެ ކަމަށް އޭނާ ވިދާޅުވިއެވެ.
މޫކޭ ވިދާޅުވީ ރައީސް މުއިއްޒު ވެރިކަމާއި ހަވާލުވެވަޑައިގެންނެވީއްސުރެ މިއަދާ ހަމައަށް ހުންނެވީ ޑިފެންސްގައި ކަމަށާއި، މެދުރޮނގާ ހަމައަށް ވެސް އާދެވިފައިނުވާ ކަމަށެވެ.
މީގެ އިތުރުން މޫކޭ ވިދާޅުވީ ރައީސް މުއިއްޒަށް ސަރުކާރު އެކުލަވާލައި ނުނިމޭ ކަމަށާއި، ރައްޔިތުންނަށް ޚިދުމަތެއް ނުދެވޭ ކަމަށެވެ.
މިސަރުކާރުގެ ހިޔާނާތަށް އިޝާރާތް ކުރައްވައި މޫކޭ ވިދާޅުވީ ދިވެހި ރައްޔިތުންގެ ފައިސާއާއި، ބިމާއި މުދާ ފޭރެމުންދާ ކަމަށާއި، މިކަންކަން މިއަދު ލިޔެކިއުމާއެކު ހާމަވަމުންދާ ކަމަށެވެ.
މޫކޭ ވިދާޅުވީ ދިވެހިރާއްޖޭގެ ބައިތުލްމާލުން 56 ބިލިއަން ހުސްކޮށްފައިވާއިރު، އެފައިސާއަށް ވެސް ވީނުވީ ނޭނގޭ ކަމަށާއި، ތަރައްގީގެ މަޝްރޫއުތައް ހުއްޓި ކުރިއަށް ނުގެންދާ ކަމަށެވެ. އަދި ވިދާޅުވީ ރައްޔިތަކަށްވީ ފައިދާއެއް ނެތް ކަމަށާއި، ރައްޔިތުންގެ އަސާސީ ހައްގުތަކަށް އިހުތިރާމް ކުރުމެއްނެތި ދަތިކުރަމުންދާ ކަމަށެވެ. އެހެންކަމުން މިއީ އެއްވެސް މިންވަރެއްގެ އުންމީދެއް އޮތް ސަރުކާރެއް ނޫން ކަމަށް އޭނާ ވިދާޅުވިއެވެ.
