ސަރުކާރު ޖަވާބުދާރީ ކުރުވުމުގެ މަސައްކަތް ޑިމޮކްރެޓްސް އާއި، އެމްޑީޕީ ގުޅިގެން ކުރެވޭނެ: އިބްރާހިމް ރަޝީދު
ކުރިއަށް އޮތްތަނުގައި ދެޕާޓީން ގުޅިގެން ޖަލްސާތައް ކުރިއަށް ގެންދެވޭނެ
19 ވަނަ ރައްޔިތުންގެ މަޖިލީހުގެ 48 ވަނަ ޖަލްސާގައި މާފަންނު މެދު ދާއިރާގެ ކުރީގެ މެމްބަރު އިބްރާހިމް ރަޝީދު ވާހަކަދައްކަވަނީ- ފައިލް ފޮޓޯ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރު ޖަވާބުދާރީ ކުރުވުމުގެ މަސައްކަތް ދަ ޑިމޮކްރެޓްސް އާއި، ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގުޅިގެން ކުރެވޭނެ ކަމަށް މާފަންނު މެދު ދާއިރާގެ ކުރީގެ މެމްބަރު އިބްރާހިމް ރަޝީދު ވިދާޅުވެއްޖެއެވެ.
ރާއްޖެޓީވީގައި ވާހަކަދައްކަވަމުން އިބްރާހިމް ރަޝީދު ވިދާޅުވީ ރައީސް މުއިއްޒުގެ ސަރުކާރުން ޖަވާބުދާރީ ކުރުވުމުގެ މަސައްކަތް ކުރަންޖެހޭ ކަމަށާއި، ގައުމުގެ ހާލަތު އެއްދުވަހުން އަނެއް ދުވަހަށް ގޯސްވަމުންދާ ކަމަށެވެ. މިހާރު މަސައްކަތް މިކުރަނީ ވެރިކަމަށް އައުމަށް ނޫން ކަމަށާއި، މިސަރުކާރު ޖަވާބުދާރީ ކުރުވުމުގެ މަސައްކަތް ކަމަށެވެ. އެހެންކަމުން މިމަސައްކަތް އެމްޑީޕީއާއި، ޑިމޮކްރެޓްސް ގުޅިގެން ކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށް އޭނާ ވިދާޅުވިއެވެ.
އިބްރާހިމް ރަޝީދު ވިދާޅުވީ މިސަރުކާރު ޖަވާބުދާރީ ކުރުވުމުގެ ހުރިހާ މަސައްކަތްތަކެއްގައި ޑިމޮކްރެޓްސްގެ ފުރިހަމަ އެއްބާރުލުން ލިބޭނެ ކަމަށާއި، ޖަމިއްޔާ ޖަމިއްޔާތަކުން ވެސް ސަރުކާރު ޖަވާބުދާރީ ކުރުވުމުގެ މަސައްކަތްކުރާނަމަ އެބަޔަކަށް ވެސް އެހީތެރިކަން ފޯރުކޮށްދޭނެ ކަމަށެވެ.
މީގެ އިތުރުން އިބްރާހިމް ރަޝީދު ވިދާޅުވީ، ގެދޮރުވެރިޔާ ސްކީމްގެ ދަށުން ދޫކޮށްފައިވާ ފްލެޓުތައް ދޫނުކުރާ މައްސަލައާއި، ބިންވެރިޔާ ސްކީމްގެ ދަށުން ދޫކޮށްފައިވާ ގޯތިތައް ނުދޭ މައްސަލައާއި، ޓެކްސީ ވިޔަފާރިއަށް ސަރުކާރުން ވަންނަން އުޅޭ މައްސަލަ އަދި މަސްވެރިންނަށް ހަމައަގު ނުދޭ މައްސަލާތަކުގައި ޖަމިއްޔާތަކުން އަދި ރައްޔިތުން ނުކުންނަ ކަމަށްވާނަމަ އެބަޔަކާއެކު ޑިމޮކްރެޓްސް ނުކުންނާނެ ކަމަށެވެ.
އިބްރާހިމް ރަޝީދު ވިދާޅުވީ ޑިމޮކްރެޓްސްއާ އެމްޑީޕީ ގުޅިގެން ވެރިކަމަށް އައުމާ ގުޅޭ އެއްވެސް ވާހަކައެއް ނުދެވޭ ކަމަށާއި، އެއްޕާޓީ އަނެއް ޕާޓީގެ އެތެރޭގެ ކަންތައްތަކުގެ ވާހަކަތައް ނުދައްކާނެ ކަމަށެވެ. މިހާރު ކުރިއަށް ދަނީ މިސަރުކާރު ޖަވާބުދާރީ ކުރުވުމަށް ކުރެވޭނެ މަސައްކަތްތަކުގެ ނުރަސްމީ ވާހަކަތައް ކަމަށާއި، ނުރަސްމީކޮށް ޕްލޭންތައް އެކުލަވާލުމުގެ މަސައްކަތްތައް ކުރިއަށްދާ ކަމަށް އޭނާ ވިދާޅުވިއެވެ.
އެގޮތުން ކުރިއަށް އޮތްތަނުގައި ދެޕާޓީން ގުޅިގެން ޖަލްސާތައް ކުރިއަށް ގެންދެވޭނެ ކަމަށާއި، މިސަރުކާރުގެ ކޮރަޕްޝަންތަކުގެ ވާހަކަތައް ދެއްކޭނެ ކަމަށް އިބްރާހިމް ރަޝީދު ވިދާޅުވިއެވެ. އަދި ވިދާޅުވީ ދެޕާޓީ ގުޅިގެން ސަރުކާރު ޖަވާބުދާރީ ކުރުވައި، މަސައްކަތްތައް ކުރިއަށް ގެންދިއުމަކީ ގިނަ ރައްޔިތުން އެދޭ ކަމެއް ކަމަށެވެ.
