އެންސީއައިޓީގެ އެކްސް އެކައުންޓް ހެކްކޮށްފި
26 ޑިސެމްބަރު 2024 | ބުރާސްފަތި 12:24އެންސީއައިޓީގެ އެކައުންޓު ހެކުކޮށްފައިވަނީ ރޭ ފަތިހު
އެންސީއައިޓީގެ އެކައުންޓު ހެކްކޮށްފައި.
ނޭޝަނަލް ސެންޓާ ފޯ އިންފޮމޭޝަން ޓެކްނޮލޮޖީ (އެންސީއައިޓީ) ގެ އެކްސް އެކައުންޓް ހެކްކޮށްފި އެވެ.
ދައުލަތުގެ މައުލުމާތުތައް ބަލަހައްޓާ، ދައުލަތުގެ އޮފީސްތަކަށް އައިޓީ ހިދުމަތްތައް ފޯރުކޮށްދީ ދައުލަތުގެ އައިޓީ އިންފްރާސްޓަކްޗާ ގާއިމުކުރުމުގެ މަސައްކަތް ކުރާ އެންސީއައިޓީގެ އެކައުންޓު ހެކުކޮށްފައިވަނީ ރޭ ފަތިހު އެވެ.
އެކައުންޓު ހެކު ކުރި މީހުން މިހާރު ވަނީ އެކައުންޓުގެ ނަމާއި ޕްރޮފައިލް ފޮޓޯވެސް ބަދަލުކޮށްފަ އެވެ. ނަމަވެސް އެންސީއައިޓީގެ ކުރީގެ ޕޯސްޓުތައް އަދިވެސް ފެންނަން އެބަހުއްޓެވެ.
ސަރުކާރުގެ ޓެކްނޮލޮޖީގެ ކަންތައް ބަލަހައްޓާ ސެންޓަރުން ބުދަ ދުވަހުގެ މެންދުރު ވަނީ މައިކްރޮސޮފްޓް 365 އެޑްމިނިސްޓްރޭޓަރުންނަށް ބޭއްވި ފަސް ދުވަހުގެ ތަމްރީން ޕްރޮގްރާމެއް ކާމިޔާބުކަމާއެކު ނިންމާފައިވާ ކަމަށް ޕޯސްޓުކޮށްފަ އެވެ.
އެހެން ނަމަވެސް، އެ އެކައުންޓުގެ އެކްސެސް ފަހުން ވަނީ ގެއްލިފަ އެވެ.
އެ ސެންޓަރުގެ އެކައުންޓް ހެކްކުރުމުން ސޯޝަލް މީޑިއާގައި ބައެއް މީހުންގެ ފާޑުކިޔުން ވެސް އަމާޒުވެފައިވެ އެވެ. އެ މީހުން ބުނާގޮތުން ސޯޝަލް މީޑިއާ އެކައުންޓުތަކުގެ ރައްކާތެރިކަން ނެތްއިރު، އެންސީއައިޓީން ބަލަހައްޓާ ދިވެހިންގެ ޒާތީ މައުލޫމާތުތައް ލީކް ނުވާނެތޯ ބައެއް މީހުން ސުވާލު އުފެދެ އެވެ.
އެގޮތުން، ނޭޝަނަލް ސައިބާ ސެކިއުރިޓީ އެޖެންސީން މިފަދަ ކަންކަން ހުއްޓުވުމަށް ކުރަނީ ކޮން މަސައްކަތެއްތޯ އަދި މިފަދަ ހާލަތެއްގައި އޮތް އިދާރާއަކަށް ދައުލަތުގެ އަދި ރައްޔިތުންގެ މައުލޫމާތުތައް ރައްކާތެރިކުރެވޭނެތޯ އައިޓީ ދާއިރާގެ މީހުން ދަނީ ސުވާލު އުފައްދަމުންނެވެ.
މިކަމާ ގުޅިގެން އެންސީއައިޓީ އިން އަދި ސަރުކާރުންވެސް މިހާތަނަށް ބަހެއް ބުނެފައެއް ނުވެއެވެ.
