"ބިންވެރިޔާ" ސްކީމްގެ ދަށުން ޝަރުތު ހަމަނުވާ ބަޔަކަށް ގޯތިތަކެއް ވަގަށް ދިން މައްސަލަ ފަޅާ އެރުމާއެކު، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ވަކިކުރި 15 މުވައްޒަފުންގެ ވަޒީފާ ބުދަ ދުވަހު އަލުން އިއާދަ ކޮށްފިއެވެ.

އެޗްޑީސީގައި މަސައްކަތް ކުރަމުންދާ 15 މުވައްޒަފަކު ކުއްލި ގޮތަކަށް ވަކިކޮށްފައިވާ ކަމަށް އަންގާފައިވަނީ އާދިއްތަ ދުވަހު އެވެ. އެ މުވައްޒަފުންގެ ވަޒީފާގެ އެއްބަސްވުން އުވާލި ކަމަށް ބުނާ ލިޔުމެއް ވެސް ވަނީ އާއްމުކޮށްފައެވެ.

އެޗްޑީސީގެ ޗެއަރޕާސަން އަޙުމަދު ނާސިފް ސޮއިކުރައްވާފައިވާ އެ ސިޓީގައި ބުނެފައިވަނީ، ވަޒީފާއާއި ބެހޭ ޤާނޫނުގެ 23 ވަނަ މާއްދާގެ (ހ) އަދި (ށ) އަށް ހަވާލާދީ، ވަޒީފާއާއި ބެހޭ އެއްބަސްވުން ނިމުމަކަށް ގެނެސްފައިވާ ކަމަށެވެ. ނާސިފް އެ ސިޓީގައި ސޮއި ކުރައްވާފައިވަނީ، އެޗްއާރު ހެޑް ސޮއިކުރަން ދެކޮޅު ހެދުމާ ގުޅިގެން ކަމަށްވެސް ބުނެފައިވެއެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ވަޒީފާ އިޔާދަ ކުރިއަސް އެ މުވައްޒަފުން ތިބީ ސަސްޕެންޝަނުގައެވެ.

އެހެން ބައެއް މީޑިއާ ތަކުގައި ރިޕޯޓް ކޮށްފައިވާ ގޮތުގައި އެ މީހުން މިހާރު ސަސްޕެންޝަނެއްގައި ތިއްބަސް ބަލަމުންދާ ކަންކަމާ ގުޅުން ނެތް މުވައްޒަފުންގެ ސަސްޕެންޝަން އުވާލާނެއެވެ. އަދި ގުޅުން އޮތް މީހުންނާ މެދު ވެސް އަޅަން ޖެހޭ ފިޔަަޅުތައް ކުރިއަށް ދާނެއެވެ.

ހުޅުމާލެއިން "ބިންވެރިޔާ" ސްކީމްގެ ދަށުން ޝަރުތު ހަމަނުވާ ބަޔަކަށް ގޯތިތަކެއް ވަގަށް ދިން މައްސަލަ ފަޅާ އެރުމާއެކު، އެޗްޑީސީ ގެ ތެރެއިން ހިނގަމުންދާ ވައްކަމާ، ޚިޔާނާތާއި މަކަރު ހީލާތް ހެދުމުގެ އެތައް ކަމެއް ދަނީ ފެންމަތިވަމުންނެވެ.

ފުލުހުންނާއި އޭސީސީން ކުރިއަށްދާ ތަހުގީގުގައި އެޗްޑީސީގެ އިތުރުން އެ ކުންފުނީގެ ކުރީގެ މެނޭޖިން ޑިރެކްޓަރު ފަޒުލް ރަޝީދު ދިރިއުޅުއްވާ ގެ ބަލައި ފާސްކޮށްފައިވެއެވެ.

ކުރީގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިން އެންޑް އިންފްރާސްޓްރަކްޗަރގެ ނަމުގައި މި ސަރުކާރުގެ ތެރޭގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން "ބަންޑާރަ ގޯތީގެ ރަޖިސްޓަރީ" ގެ ވަގު ޑޮކިއުމެންޓް ހަދައިދިންކަން ކަށަވަރުވެ، އެޗްޑީސީ އަށް ކޮރަޕްޝަންގެ ގިނަ ތުހުމަތުތަކެއް ކުރެވިފައި ވަނިކޮށް އެޗްޑީސީގެ މެނޭޖިން ޑިރެކްޓަރ ފަޒުލް ރަޝީދު އިސްތިއުފާ ދެއްވުމުން އާ މެނޭޖިން ޑިރެކްޓަރ ކަމަށް މައުރޫފް ޖަމީލު ވަނީ އައްޔަން ކޮށްފައެވެ.