އުންމީދަކީ ބޮޑު ދަނޑުތަކުން ހުނަރުވެރި ޒުވާނުންތަކެއް އުފެދިގެން ދިޔުން: މަޚްލޫފް

ރާއްޖޭގެ އެކި ކަންކޮޅުތަކުގައި ޤާއިމު ކޮށްފައިވާ ބޮޑު ފުޓުބޯޅަ ދަނޑުތަކުން ހުނަރުވެރި ޒުވާނުންތަކެއް އުފެދިގެން ދާނެ ކަމަށް އުންމީދު ކުރާ ކަމަށް، ކުރީގެ ކުޅިވަރު ވަޒީރު އަޙުމަދު މަޚްލޫފް ވިދާޅުވެއްޖެ އެވެ.

މަޚްލޫފް މިހެން ވިދާޅުވީ އަންގާރަ ދުވަހުގެ ރޭ ނިމުނު ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުން ފެނުނު ފޯރި އާއި ވާދަވެރިކަމަށް އިޝާރާތް ކުރަމުންނެވެ. މަޚްލޫފް އޭނާގެ ރަސްމީ އެކްސް އެކައުންޓުގައި ކޮށްފައިވާ ޕޯސްޓެއްގައި ވިދާޅުވީ، ގިނަ އަހަރުތަކެއް ފަހުން ގަލޮޅު ރަސްމީ ދަނޑުން ފުޓުބޯޅައިގެ ފޯރި ފެނުމަކީ ރަނގަޅު ފެށުމެއް ކަމަށް ދެކޭ ކަމަށެވެ. އަދި އެކަން ސިޔާސީ ނުކޮށް، އެ ރަށްތަކުގައި އޮތް ފޯރި އާއި ޖޯޝު ގެއްލުވާ ނުލުމަށް ވެސް ވަނީ ގޮވާލައިފަ އެވެ. މަޚްލޫފް ވަނީ ގޯލްޑް ކަޕް ފުޓުބޯޅަ މުބާރާތް ރާވާ އިންތިޒާމު ކުރުމުގައި އިސްކޮށް އުޅުއްވި ބޭފުޅުންނަށް ވެސް ޝުކުރު އަދާކޮށް، މަރުޙަބާ ވިދާޅުވެފަ އެވެ.

މީގެ އިތުރުން މަޚްލޫފް ވިދާޅުވީ 90ގެ އަހަރުތަކާ ހަމައަށް މާލޭގައި އޮތް އަވަށު ފޯރި ގެއްލި، ގަލޮޅު ދަނޑު ހުސްވިޔަސް، ހަގީގަތަކީ މިހާރު ވެސް އަދި މީގެ ކުރިން ވެސް ރާއްޖޭގެ ރަށް ރަށުގައި ފުޓުބޯޅައިގެ ފޯރި ކެނޑިގެން ނުދާ ކަމަށެވެ. އެގޮތުން އަތޮޅު ތެރޭގައި ބޭއްވި ކޮންމެ ފުޓުބޯޅަ މުބާރާތަކުން ވެސް އެ ފޯރި ފެނިފައިވާ ކަމަށް ވެސް ވިދާޅުވެފައިވެ އެވެ. އެގޮތުން ރަށުގެ ޓީމަށް ސަޕޯޓު ކުރުމަށް ދޯނި ފަހަރުގައި ބެރު ޖަހާފައި ރައްޔިތުން ދަތުރު ކުރަމުން ދިޔަކަން ވެސް މަޚްލޫފް ވަނީ ފާހަގަ ކޮށްފަ އެވެ.

އިތުރަށް މަޚްލޫފް ވިދާޅުވީ މުބާރާތުގައި 17 ރަށެެއް ވާދަކޮށްފައިވާއިރު، އެ ރަށްތަކުގައި ބޮޑެތި ފުޓުބޯޅަ ދަނޑުތައް ޤާއިމުކޮށްދެވިފައިވާތީ އެކަމާ އުފާ ކުރާ ކަމަށެވެ. އެގޮތުން 400 މީހުންގެ އާބާދީ އޮތް ހއ.ތުރާކުމުގައި އެއް ދަނޑު ތަރައްޤީ ކޮށްދިނުމުން ފެށިގެން، 30،000 އަށް ވުރެ ގިނަ މީހުންގެ އާބާދީއެއް އޮތް އައްޑޫ ސިޓީގައި ވެސް ހަތަރު ދަނޑު ތަރައްޤީ ކުރެވުނުކަން މަޚްލޫފް ފާހަގަ ކުރި އެވެ. މީގެ އިތުރުން ޖުމުލަ 70 ރަށެއްގައި ބޮޑު ދަނޑުގެ މަސައްކަތް ނިންމައި، 70 އަށް ވުރެ ގިނަ ރަށުގައި ދަނޑުގެ މަސައްކަތް ފެށިފައިވާތީ އުފާ ކުރާ ކަމަށް ވެސް ވިދާޅުވެފައިވެ އެވެ.

ޕޯސްޓު ނިންމާލަމުން މަޚްލޫފް ވިދާޅުވީ އެ ފަދަ ވާދަވެރި މުބާރާތްތައް ގިނަވެ، އެ ދަނޑުތަކުން ހުނަރުވެރި ޒުވާނުންތަކެއް އުފެދިގެން އައުމަށް އުންމީދު ކުރާ ކަމަށެވެ. އަދި ދިވެހި ފުޓުބޯޅަ އަށް އަބަދު ވެސް ކުރިއެރުމާއި ކާމިޔާބަށް އެދޭ ކަމަށް ވެސް މަޚްލޫފް ވަނީ ވިދާޅުވެފަ އެވެ.

މިދިޔަ ސަރުކާރުން ވަނީ ރާއްޖޭގެ އެކި ކަންކޮޅު ތަކުގައި ބޮޑެތި ފުޓުބޯޅަ ދަނޑުތައް ޤާއިމު ކުރުމުގެ ގިނަ މަޝްރޫއުތަކެއް ކުރިއަށް ގެންގޮސްފަ އެވެ.