މެންޗެސްޓަރ ސިޓީ އަށް މިވަގުތު ކުރިމަތިވެފައިވާ އުނދަގޫ ޙާލަތާއި، އެ ޓީމުގެ ނަތީޖާތައް ދަށްވެފައި އޮތް އޮތުމަށް ބަދަލު ގެނައުމުގެ އުންމީދުގައި ހުރި ކަމަށް، ސިޓީގެ ކޯޗު ޕެޕް ގާޑިއޯލާ ބުނެފި އެވެ.

އޭނާ މިހެން ބުނީ އިނގިރޭސި ޕްރިމިއާ ލީގުގައި ސިޓީގެ އަމިއްލަ ދަނޑުގައި އެވަޓަންއާ ދެކޮޅަށް ނިކުންނަ މެޗުގެ ކުރިން ވާހަކަ ދައްކަމުންނެވެ. އެ މެޗާ ކުރިމަތިލާއިރު، ނަތީޖާތައް ގޯސްވެ ސިޓީގެ ޙާލަތު އޮތީ ވަރަށް ބޮޑަށް ދަށްވެފަ އެވެ.

އެކަމާ ގުޅޭ ގޮތުން ވާހަކަ ދައްކަމުން ގާޑިއޯލާ ބުނީ، އެވަންޓަން އަކީ އިދިކޮޅަށް ކުޅެން އުނދަގޫ ޓީމެއް ކަމަށާއި، އެ ޓީމަކީ ވެސް ވަރުގަދަ ޓީމެއް ކަމަށެވެ. އެކަމަށް ސަމާލުކަން ދިނުން މިވަގުތަށް މުހިންމު ނޫން ކަމަށާއި، މިވަގުތު އެންމެ މުހިންމީ ސިޓީގެ އެންމެ ރަނގަޅު ރޫޙުގައި އަލުން އެނބުރި ރަނގަޅު ފޯމަކަށް އައުން ކަމަށް ވެސް ގާޑިއޯލާ ވަނީ ބުނެފަ އެވެ.

އެކަމަށް ވަގުތު ނަގާނެކަން ފާހަގަ ކުރަމުން ގާޑިއޯލާ ބުނީ، ވީ އެންމެ އަވަހަކަށް ރަނގަޅު ނަތީޖާތަކެއް ނެރެން ޖެހޭނެ ކަމަށެވެ. މިވަގުތު އެވަޓަަންއާ ދެކޮޅަށް ނިކުންނައިރު، އެ ޓީމު އޮތީ ރަނގަޅު ރޫޙެއްގައި ކަމަށާއި، އެންމެ ފަހުން އެވަޓަންގެ ނަތީޖާތަކާއި، އެ ޓީމުން ދައްކަމުން އަންނަ ކުޅުމުގެ ސަބަބުން އެކަން ފެނިގެންދާނެ ކަމަށް ވެސް ގާޑިއޯލާ ވަނީ ބުނެފަ އެވެ.

ސިޓީގެ ނަތީޖާތައް ވަރަށް ބޮޑަށް ދަށްވެފައިވާއިރު، މިއީ ގާޑިއޯލާގެ އިރުޝާދުގެ ދަށުން ސިޓީގެ ނަތީޖާތައް އެންމެ ގޯސްވެފައިވާ ފަހަރެވެ. ހުރިހާ މުބާރާތެއްގައި އެންމެ ފަހުން ސިޓީ ކުޅުނު 12 މެޗުގެ ތެރެއިން، އެ ޓީމު މޮޅުވެފައި ވަނީ އެންމެ މެޗަކުންނެވެ. ނުވަ މެޗަކުން ސިޓީ ވަނީ ބަލިވެފަ އެވެ. މިއަހުގެ އޮކްޓޫބަރު މަހުގެ 30 ވަނަ ދުވަހު ކަރަބޯ ކަޕްގައި ޓޮޓެންހަމް އަތުން ބަލިވީ ފަހުން، ސިޓީގެ ނަތީޖާތައް އަންނަނީ ދަށްވަމުންނެވެ.

ލީގުގައި މިހާތަނަށް ސިޓީންް 17 މެޗު ކުޅެފައިވާއިރު، އެ ޓީމު މޮޅުވެފައި ވަނީ އަށް މެޗުންނެވެ. ހަ މެޗުން ބަލިވެފައިވާއިރު، ތިން މެޗުން ވަނީ އެއްވަރުވެފަ އެވެ. ލީގު ތާވަލްގެ ހަތް ވަނައިގައި 27 ޕޮއިންޓާ އެކު ސިޓީ އޮތްއިރު، އެއް ވަނައިގައި އޮތް ލިވަޕޫލާ ދެމެދު މިހާރު އޮތީ 12 ޕޮއިންޓުގެ ފަރަގެކެވެ.