އިނގިރޭސި ޕްރިމިއާ ލީގުގައި ޓޮޓެންހަމާ ދެކޮޅަށް ކުޅުނު މެޗުން ލިބުނު މޮޅާއެކު، ބޮޑު އުފަލެއްގައި ހުރި ކަމަށް ލިވަޕޫލްގެ ކޯޗު އާން ސްލޮޓް ބުނެފި އެވެ.

ޓޮޓެންހަމްގެ އަމިއްލަ ދަނޑުގައި އެ ޓީމާ ދެކޮޅަށް ކުޅުނު މެޗުން މޮޅުވެ، ޓޮޓެންހަމް އިން ވަނީ އެއް ވަނަ މަގާމު ދިފާއުކޮށް، ލީޑު ފުޅާ ކޮށްފަ އެވެ. އެ މެޗުގެ ފުރަތަމަ ހާފުގައި ލިވަޕޫލް އިން ތިން ލަނޑު ޖެހިއިރު، ދެ ވަނަ ހާފުގައި ވެސް ވަނީ ތިން ލަނޑު ޖަހައިފަ އެވެ.

އެ މެޗަށްފަހު ވާހަކަ ދައްކަމުން ސްލޮޓް ބުނީ، މުޅި މެޗުގައި ވެސް ފެނުނީ ލިވަޕޫލްގެ ކުޅުންތެރިން ވަރަށް ރަނގަޅަށް ކުޅެމުން ދިޔަ މަންޒަރު ކަމަށާއި، އެ މެޗަކީ ވަރަށް ރަނގަޅު މެޗެއް ކަމަށެވެ. އަދި އޭނާ އަށް ޤަބޫލު ކުރެވޭ ގޮތުގައި އެ މެޗަކީ، ރަށުން ބޭރުގައި މިހާތަނަށް ލިވަޕޫލް އިން ކުުޅުނު އެންމެ ރަނގަޅު މެޗު ކަމަށް ވެސް ސްލޮޓް ބުންޏެވެ. މީގެ ކުރިން ސެޕްޓެމްބަރު މަހު ޔުނައިޓެޑުގެ ދަނޑުގައި އެ ޓީމާ ދެކޮޅަށް ކުޅުނު މެޗަށް އިޝާރާތް ކުރަމުން ސްލޮޓް ބުނީ އެ މެޗުގައި ވެސް ފެނުނީ އޭނާ ވަރަށް ގަޔާވާ ކަހަލަ ކަންތައްތަކެއް ކަމަށެވެ.

މީގެ އިތުރުން ސްލޮޓް ބުނީ ލިވަޕޫލް އިން ކުރަމުން އަންނަނީ ރަނގަޅު މަސައްކަތެއް ކަމަށާއި، އެ މަސައްކަތް ކުރުމުގައި ދެމި ތިބެން ޖެހޭ ކަމަށެވެ. ޚާއްސަކޮށް ލީގު ތާވަލްގައި މިވަގުތު ލިވަޕޫލް އެއް ވަަނައިގައި އޮތް ނަމަވެސް، ކުރިއަށް ހުރި މެޗުތަކާ މެދު އިންތިހާ އަށް ސަމާލުލަން ދޭން ޖެހޭނެ ކަމަށް ސްލޮޓް ވަނީ ބުނެފަ އެވެ. އޭނާ ބުނީ މިހާތަނަށް ލިވަޕޫލްގައި އޭނާ އަށް ކުރެވޭ މަސައްކަތާ މެދު ހިތްހަމަ ޖެހޭ ކަމަށާއި، އޭނާ ބޭނުން ވަނީ މިހާރު އޮތް މިސްރާބުގައި ލިވަޕޫލް ކުރިއަށް ދާން ކަމަށެވެ.

އިތުރަށް ވާހަކަ ދައްކަމުން ސްލޮޓް ބުނީ ދެ ވަނައިގައި އޮތް ޗެލްސީން، ޕޮއިންޓެއް ގެއްލުވާލާނެ ކަމަށް އޭނާ އުންމީދު ވެސް ނުކުރާ ކަމަށެވެ. އޭނާ ބުނީ ބައެއް މެޗުތަކުގައި އެގޮތަށް ދިމާވާނެ ކަމަށާއި، ޕްރިމިއާ ލީގުގެ ޚާއްސަ ކަމަކީ އެއީ ކަމަށެވެ. އޭނާ ބުނީ ލީގުގެ ވާދަވެރިކަން އޮންނަނީ ވެސް އެ ސަބަބާ ހުރެ ކަމަށާއި، ޕްރިމިއާ ލީގަކީ ކާމިޔާބު ކުރަން އެންމެ އުނދަގޫ ލީގު ކަމަށެވެ.

ލީގުގައި މިހާތަނަށް ލިވަޕޫލް އިން ކުޅެފައިވާ 16 މެޗުގެ ތެރެއިން އެ ޓީމު ވަނީ 12 މެޗުން މޮޅުވެފަ އެވެ. ތިން މެޗު އެއްވަރުވެފައިވާއިރު، ބަލިވެފައި ވަނީ އެންމެ މެޗަމުންނެވެ. އެއް ވަނައިގައި ލިވަޕޫލް އޮތީ 39 ޕޮއިންޓާ އެކު އެވެ. ލިވަޕޫލަށް ވުރެ އެއް މެޗު އިތުރަށް ކުޅެފައިވާ ޗެލްސީ އަށް ދެ ވަނައިގައި ލިބެނީ 35 ޕޮއިންޓެވެ.