ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫން ހައްޔަރުކުރުމަށް ނެރުނު އަމުރާއި، ޝަރީއަތް ނިމެންދެން ބަންދުކުރުމަށް ނެރުނު އަމުރުގެ އިސްތިއުނާފް މައްސަލައިގެ ހުކުމް ކުރުން އާދިއްތަ ދުވަހަށް ތާވަލުކުރުމަށް ފަހު ކެންސަލް ކޮށްފި އެވެ.
ފާރިސް ބަންދުގައި ހުންނަވާތާ މަހެއް ވެފައިވާއިރު، އިސްތިއުނާފް މައްސަލައިގެ ހުކުމް ކުރުން ހައިކޯޓުގައި ތާވަލުކޮށްފައި އޮތީ އާދިއްތަ ދުވަހުގެ މެންދުރު 1:30 އަށެވެ. ނަމަވެސް، ވަކި ސަބަބެއް ހާމަކުރުމެއް ނެތި ކޯޓުން ވަނީ ޝަރީއަތް ކެންސަލް ކޮށްފަ އެވެ.
.@afarismaumoon appeals (arrest warrant & remand order) to High Court:
— Maumoon Hameed (@maanhameed) August 20, 2017
Hearings scheduled for this afternoon cancelled by the court.
ފާރިސް ހައްޔަރުކުރުމަށް ނެރުނު އަމުރުގެ ދަށުން، ޖުލައި 18 ވަނަ ދުވަހު އޭނާ ހައްޔަރުކުރުމަށް ފަހު، ބަންދާއި މެދު ގޮތެއް ނިންމުމަށް ޖުލައި 19 ވަނަ ދުވަހު ކްރިމިނަލް ކޯޓަށް ހާޒިރުކުރުން، ތުހުމަތު ކުރެވޭ މައްސަލައިގެ ތަހުގީގު ނިންމައި ދައުވާކޮށް ޝަރީއަތް ނިމެންދެން ހޯމް މިނިސްޓްރީއިން ކަނޑައަޅާ ތަނެއްގައި ބަންދުކުރުމަށް ވަނީ އަމުރުކޮށްފަ އެވެ.
ފާރިސް ހައްޔަރު ކޮށްފައިވަނީ، ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް ފާސްކުރުމަށް މަޖިލިހަށް ހުށަހެޅީ 42 މެންބަރުންގެ ސޮޔާއެކު ކަމަށް، އޭޕްރީލް 17 ވަނަ ދުވަހު މަޖިލީހުން ފާސްކުރުމާ ގުޅިގެން، މަޖިލީހުގެ ރައީސްގެ މައްޗަށް އިތުބާރު ނެތްކަމުގެ މައްސަލައެއް މަޖިލީހަށް ވެއްދުމަށް، 42 މެންބަރުންގެ ސޮއި ހޯދުމަށް މަޖިލިސް މެންބަރުންނަށް ނުފޫޒު ފޯރުވައި ގާނޫނާ ޚިލާފަށް މަސައްކަތްތަކެއް ކޮށްފައިވާކަމުގެ ތުހުމަތުގަ އެވެ. މި މައްސަލައިގައި އޭނާގެ މައްޗަށް ދައުވާ ކުރުމަށް ފުލުހުން ވަނީ ޕްރޮސެކިއުޓަރ ޖެނެރަލްގެ އޮފީހަށް ފޮނުވާފަ އެވެ.
ފާރިސްގެ އިސްތިއުނާފް މައްސަލައިގައި އެންމެ ފަހުން ހައިކޯޓުގައި އަޑުއެހުމެއް ބާއްވާފައިވަނީ މިމަހުގެ 9 ވަނަ ދުވަހު އެވެ. އެ އަޑުއެހުން ނިންމާލާފައިވަނީ މައްސަލައިގައި އިތުރަށް ސާފުކުރާނެ ކަމަށް ނެތް ނަމަ ދެން ބާއްވާނީ ހުކުމް ކުރުމުގެ މަޖިލިސް ކަމަށް އިއުލާނުކުރެއްވުމަށް ފަހު އެވެ.
ފާރިސްގެ އިސްތިއުނާފް މައްސަލައިގައި ގާނޫނީ ވަކީލުން ވަނީ ގިނަ ނުކުތާތަކެއް ފާހަގަކުރައްވާފަ އެވެ. އެގޮތުން މީހަކު ހައްޔަރުކޮށްފިނަމަ ލަސްނުކޮށް އެންމެ ކައިރީގައިވާ ފުލުހުންގެ މަރުކަޒަކަށް އެ މީހަކު ގެންދަންވާނެ ކަމަށް ޖިނާއީ އިޖުރާއަތުގެ ގާނޫނުގެ 45 ވަނަ މާއްދާގައި ބަޔާންކޮށްފައިވާއިރު، ފާރިސް ހައްޔަރުކުރުމަށް ފަހު އެންމެ ކައިރީގައިވާ ފުލުހުންގެ މަރުކަޒަކަށް ގެންދިއުމެއް ނެތި، ގާނޫނާ ޚިލާފަށް ފާރިސް ގެންގޮސްފައިވަނީ ދޫނިދޫއަށްކަން ފާހަގަކޮށްފައިވެއެވެ.
ދިވެހިރާއްޖޭގެ ޖަލުތަކާއި ޕެރޯލްގެ ގާނޫނާ ޚިލާފަށް ފާރިސް ބަންދުކޮށްފައިވާކަން ފާހަގަކޮށްފައިވެއެވެ. އެގޮތުން ތަހުގީގު މަރުހަލާގައި އެ މީހަކު ބަންދުގައި ބެހެއްޓޭނީ ކަސްޓޯޑިއަލް ޖަލެއްގައި ކަމަށް ޖަލުތަކާއި ޕެރޯލްގެ ގާނޫނުގައި ބަޔާންކޮށްފައިވާއިރު، ކްރިމިނަލް ކޯޓުން ފާރިސް ބަންދުގައި ބެހެއްޓުމަށް ނިންމި ނިންމުމުގައި ކަނޑައަޅާފައި އޮތީ ތަހުގީގު ހިނގަމުންދާ މައްސަލައެއްގައި ޝަރީއަތް ނިމެންދެން ރިމާންޑް ޖަލެއްގައި ބަންދުކުރުމަށް ކަމަށް ވަކީލުން ވިދާޅުވެފައިވެއެވެ.
މީގެއިތުރުން، ފާރިސްގެ ވަކީލުން ވަނީ މި މައްސަލައާ ގުޅިގެން ހައްޔަރުކުރި އަހުމަދު ޝާފިއުގެ ބަންދުން ދޫކޮށްލުމަށް ކްރިމިނަލް ކޯޓުން ނިންމި ނިންމުމުގެ ލިޔުންތައް ވެސް ކޯޓަށް ހުށަހަޅާފަ އެވެ. ޖުލައި މަހުގެ 9 ވަނަ ދުވަހު ކްރިމިނަލް ކޯޓުން ނިންމާފައި އޮތީ އަހުމަދު ޝާފިއު ބަންދުކުރުމަށް ފުލުހުން ހުށަހަޅާފައިވާ ހެކިތަކަކީ މީހެއްގެ މިނިވަންކަން ނަގާލުމަށް އެކަށޭނެ ހެކިތަކެއް ނޫން ކަމަށެވެ.
ވަކީލުން ވިދާޅުވީ ފާރިސް ހައްޔަރުކޮށްފައިވަނީ ހަމަ އެ ހެކިތަކުގެ މައްޗަށް ބިނާކޮށް ނެރެނު އަމުރެއްގެ ދަށުން ކަމަށާއި ބަންދުގެ މުއްދަތު އިތުރުކުރީ ވެސް އެ ހެކިތަކުގެ މައްޗަށް ބިނާކޮށް ކަމަށެވެ. އެ ހެކިތަކާ ގުޅޭގޮތުން ކްރިމިނަލް ކޯޓުން ވަކި ގޮތެއް ނިންމާފައިވަނިކޮށް އެހެން ގޮތަކަށް މާނަކޮށްގެން، އެ ހެކިތަކުގެ މައްޗަށް ބިނާކޮށް ފާރިސް ހައްޔަރުކޮށް ބަންދުގެ މުއްދަތު އިތުރުކޮށްފައިވަނީ ގާނޫނީ އުސޫލުތަކާ ޚިލާފަށް ކަމަށް ވަކީލުން ވިދާޅުވެއެވެ.
ފާރިސްގެ މައްޗަށް މި މައްސަލައިގައި ދައުވާ ކުރަން ފޮނުވާފައިވާއިރު، ޕީޕީއެމްގެ ދިދައާއި ލޯގޯ ހުއްދައެއް ނެތި ބޭނުންކުރެއްވި ކަމަށް ޝަޙްސް އޮޅުވާލުމުގެ ދައުވާކޮށް ފާރިސްގެ މައްޗަށް ދަނީ ޝަރީއަތް ހިންގަމުންނެވެ.
