އެޗްޑީސީގެ ހިޔާނާތް އިންސާފުވެރިކަމާއެކު ތަހުގީގު ކުރުމަށް އިދިކޮޅުގެ ބައިވެރިވުމާއެކު ރިޔާސީ ކޮމިޝަނެއް އެކުލަވާލަންޖެހޭ: މެންބަރު މީކާއިލް

ހައުސިންގ ޑިވެލޮޕްމަންޓް ކޯޕްރޭޝަންގެ (އެޗްޑީސީ)ގެ ހިޔާނާތް އިންސާފުވެރިކަމާއެކު ތަހުގީގު ކުރުމަށް އިދިކޮޅުގެ ބައިވެރިވުމާއެކު ރިޔާސީ ކޮމިޝަނެއް އެކުލަވާލަންޖެހޭ ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.

ރާއްޖެޓީވީގައި ވާހަކަދައްވަމުން މެންބަރު މީކާއިލް ވިދާޅުވީ އެޗްޑީސީގެ ހިޔާނާތުގެ މައްސަލަ ފުލުހުން ތަހުގީގު ކުރަން ފަށާފައިވަނީ އެއިދާރާގެ އިސްނެގުމުގެ މަތިން ސޯޝަލް މީޑިއާގައި އެފަދަ ވާހަކަތަކެއް ދައުރުވަމުންދާތީ ކަމަށް ފުލުހުން ބުނެފައިވާ ކަމަށެވެ. ގައުމުގައި ހިނގާ މިފަދަ މައްސަލަތައް ތަހުގީގީ އިދާރާތަކަށް ހުށަހެޅުން ނާޅައި، އަދި ހުށަހެޅުން މަދުވެފައިވަނީ ރައްޔިތުންގެ އިތުބާރު ގެއްލިފައިވާތީ ކަމަށް މެންބަރު މީކާއިލް ވިދާޅުވިއެވެ.

ރާއްޖޭގެ ހާލަތަށް އިޝާރާތް ކުރައްވައި މެންބަރު މީކާއިލް ވިދާޅުވީ ރައްޔިތުން ދިވެހި ސަރުކާރަށް، ދައުލަތަށް އަދި ތަހުގީގީ އިދާރާތަކަށް އިތުބާރުނުކުރާ ކަމަށާއި، ރާއްޖެ މިހާރު މިއޮތީ ކަންބޮޑުވާންޖެހޭ ފަދަ ހާލަތެއް ކަމަށެވެ. އަދި ރައްޔިތުންގެ އިތުބާރު ލިބޭގޮތަށް ހާލަތު ބަދަލުކުރަންޖެހޭ ކަމަށް މެންބަރު މީކާއިލް ވިދާޅުވިއެވެ.

މީގެ އިތުރުން މެންބަރު މީކާއިލް ވިދާޅުވީ އެޗްޑީސީ ހިޔާނާތުގެ މައްސަލަ ފުލުހުންގެ އިތުރުން އެންޓި ކޮރަޕްޝަން ކޮމިޝަން (އޭސީސީ)އިން ތަހުގީގު ކުރި ނަމަވެސް އިންސާފުވެރިކަމާއެކު ތަހުގީގު ކުރިއަށް ގެންދިއުމަށް އިދިކޮޅު ބައިވެރިވުމާއެކު ރިޔާސީ ކޮމިޝަނެއް އެކުލަވާލަންޖެހޭ ކަމަށާއި، އެކޮމިޝަނުން މިމައްސަލަތައް ތަހުގީގު ކުރަންޖެހޭ ކަމަށެވެ. އަދި ސަރުކާރުގެ ހެޔޮ ނިޔަތެއް އޮތްނަމަ މިކަން ކުރާނެ ކަމަށާއި، ނަމަވެސް މިފަދަ ކަމެއް ސަރުކާރުން ނުކުރާނެ ކަމަށެވެ.

މީގެ އިތުރުން މެންބަރު މީކާއިލް ވަނީ އެޗްޑީސީގެ ހިޔާނާތް ނޭނގޭ ކަމަށް ރައީސް މުއިއްޒު ވިދާޅުވެފައިވާއިރު، އެކޯޕްރޭޝަންގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާ ގުޅޭ ގިނަ މައްސަލަތަކެއް ފާހަގަކޮށް އެ ކުންފުނީގެ ކުރީގެ ޗެއާމަން އަހުމަދު ޒުހޫރު މާގަމުން ދުރުކުރީ ކީއްވެގެންތޯ ސުވާލު އުފައްދާފައެވެ. ހިޔާނާތްތެރިވި ކަމަށް ތުހުމަތުކުރެވޭ މީހާ މަގާމުގައި ހުންނެވިއިރު، ހިޔާނާތުގެ މައްސަލަތަކަށް ސަމާލުކަމަށް ގެންނެވި ބޭފުޅާ މަގާމުން ދުރަށް ޖެހިވަޑައިގަންނަވަންޖެހުމަކީ ރައްޔިތުން ބަލައިގަންނާނެ ކަމެއް ނޫން ކަމަށް މެންބަރު މީކާއިލް ވިދާޅުވިއެވެ.