އެޗްޑީސީގެ ކޮރަޕްޝަނާއި މެދު ޒުހޫރު ފޮނުވި ސިޓީ ލިބިވަޑައިނުގަންނަވާ ކަމަށް ރައީސް ވިދާޅުވެއްޖެ
ފަޒީލް ރަޝީދަށް ވަގަށް ދިން ގޯތި ވެރިފައި ކުރަން ހައުސިން މިނިސްޓްރީއަށް ފޮނުވީ އިންފާރު ރާނަން ހުއްދަ ވެސް ދީފަ
ޒުހޫރު، ރައީސް މުއިއްޒު އަދި ފަޒުލް ރަޝީދު
ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ކޮރަޕްޝަންގެ މައްސަލަތައް ސަމާލުކަމަށް ގެންނަވާ އެޗްޑީސީގެ ކުރީގެ ޗެއާމަން އަހުމަދު ޒުހޫރު ފޮނުއްވި ސިޓީ ލިބިވަޑައިގެންފައި ނުވާ ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް އެފަދައިން ވިދާޅުވީ އާދިއްތަ ދުވަހު ބައެއް މީޑިއާތަކަށް ރައީސް އޮފީސް ސަރަހައްދުގައި ދެއްވި ބަސްތީގަތުމެއްގައެވެ.
ރައީސް މިފަދައިން ވިދާޅުވެފައިވާއިރު ޒުހޫރު ރައީސަށް ފޮނުއްވި ސިޓީ އެއް މީސްމީޑިއާގައި ވަނީ އާއްމުވެފައެވެ. ޖުލައި މަހު ރައީސް ޑރ. މުޙައްމަދު މުއިއްޒު އަށް ޒުހޫރު ފޮނުއްވި ސިޓީގައި އެޗްޑީސީގެ އެތެރޭގައި މޫލާފައިވާ ކޮރަޕްޝަންގެ ވަރަށް ގިނަ ކަންކަން ހިނގާކަން ފާހަގަކުރައްވާފައިވެއެވެ. އެ ސިޓީގެ އަސްލު ކަށަވަރުކުރުމަށް މީޑިއާތަކުން ގުޅުމުން ރައީސް އޮފީހުން ޖަވާބެއް ނުދެއްވައެވެ. އަދި އެއްވެސް ސިފައެއްގައި އެކަން ދޮގުކުރައްވާފައެއް ވެސް ނުވެއެވެ.
އެ މައްސަލަ ބަލަމުން ދޭތޯ މީގެ ކުރިން ނޫސްވެރިން ވަނީ ފުލުހުންނާއި ސުވާލުކޮށްފައެވެ. ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި، އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވަނީ ރައީސް އޮފީހުން ވެސް އަދި އެހެން ފަރާތަކުން ވެސް އެފަދަ މައްސަލަ އެއް ބެލުމަށް ފުލުހުންނަށް އަންގާފައިނުވާކަން ހާމަކުރައްވާފައެވެ. އެކަމާއި ގުޅިގެން އާއްމުން ވަނީ ސަރުކާރާއި ރައީސް މުއިއްޒު އަށް ވަރަށް ބޮޑަށް ފާޑުކިޔާފައެވެ.
އެކަން އެހެން އޮއްވާ ބޭނުންފުޅުވާ ވަކި މީޑިއާތަކަކަށް ރައީސް ދެއްވި އިންޓަވިއުގައި ރައީސް މުއިއްޒު ވިދާޅުވީ ބޭނުންފުޅު ވަނީ މި ސަރުކާރަކީ ކޮރަޕްޝަނާއި ފަސާދަ އާއި ނުޤަވާއިދުން ހިނގާ ކަންކަމާއި ދުރު ސަރުކާރަކަށް ވާން ކަމަށެވެ. އަދި އެ މަނިކުފާނު ވައުދުވެ ވަޑައިގަތް ގޮތަކީ ވެސް އެއީ ކަމަށް އެ މަނިކުފާނު ވިދާޅުވިއެވެ.
އާއްމުވެފައިވާ ސިޓީގައި އެޗްޑީސީގައި އިންތިހާ އަށް ކޮރަޕްޝަން އޮތްކަން ޒުހޫރު ވަނީ ފާހަގަކުރައްވާފައެވެ. އެގޮތުން އެޗްޑީސީގެ އެތެރެއިން ކަންކަން ވަނީ ފައިސާ ދޭ މީހާ އަށް ކަމަށް ޒުހޫރު ވަނީ ވިދާޅުވެފައެވެ. ޒުހޫރު އެޗްޑީސީގެ ޗެއާމަންކަމާ ހަވާލުވެވަޑައިގެންނެވީ ވެސް ރައީސްގެ ހާއްސަ އެދިވަޑައިގަތުމަކަށްކަން ފާހަގަކޮށްލެވެއެވެ. އެހެންކަމަށް ވާއިރު ޒުހޫރު ވަނީ ފަޒުލްގެ ހަމައެކަނި ބޭނުމަކީ އަމިއްލަ ބޭނުމަށް ފައިސާ ހޯދުން ކަމަށް ސިފަކުރައްވާފައެވެ.
އެޗްޑީސީގެ ކުރީގެ އެމްޑީ ފަޒުލް ރަޝީދުގެ ބޭބެ އަށް ހުޅުމާލެ އިން ބިމެއް ދިން މައްސަލަ ފެންމަތިވުމުން އެކަން ދިފާއުކުރައްވަން ފަޒުލް މަސައްކަތްކުރެއްވިއެވެ. އޭގެ ފަހުން ހޮނިހިރު ދުވަހު ފަޒުލް ވަނީ މަޤާމުން އިސްތިއުފާދެއްވާފައެވެ. ރައީސް ވިދާޅުވީ މަޤާމުތަކަށް މީހުން ލަނީ ވައްކަން ކުރަން ނޫން ކަމަށާއި ކޮރަޕްޝަނަށް މަގުފަހިކުރުމަށް ނޫން ކަމަށެވެ. އޭގެ ބަދަލުގައި މަޤާމްތަކަށް މީހުން ލަނީ ތެދުވެރިކަމާއި އަމާނާތްތެރިކަމާއި އެކު ޚިދުމަތް ދިނުމަށް ކަމަށް ރައީސް ވިދާޅުވިއެވެ. މިހާރު ހިނގައިގެން އުޅޭ އެޗްޑީސީގެ ޚިޔާނާތުގެ ތުހުމަތުތަކުގެ ވާހަކަ އެނގުނު ހިސާބުން އެކަން ވެސް ކަމާއި ބެހޭ ފަރާތްތަކަށް އަންގަވާފައިވާނެ ކަަމަށް ރައީސް ވިދާޅުވިއެވެ. ރައީސް އެހެން ވިދާޅުވި ނަމަވެސް ފުލުހުން ވަނީ އެޗްޑީސީގެ ޚިޔާނާތާއި ގުޅޭ މައްސަލަ ބަަލަނީ އަމިއްލަ އިސްނެގުމުގައި ކަމަށް ފާހަގަކޮށްފައެވެ.
އެޗްޑީސީގެ ކުރީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދުގެ ބޭބެ މުޙައްމަދު ފަޒީލް ރަޝީދަށް ވަގަށް ދިން ގޯތި ވެރިފައި ކުރަން ހައުސިން މިނިސްޓްރީއަށް ފޮނުވީ އިންފާރު ރާނަން ހުއްދަ ވެސް ދީފަ ކަން ބުދަ ދުވަހުގެރޭ އެޗްޑީސީން ބޭއްވި ނޫސްވެރިންގެ ބައްދަލުވުމުގައި، ފާޒުލްގެ ވާހަކައިން ވަނީ ފަޅާ އަރާފައެވެ. ކޮރަޕްޝަން އަށް މަގުފަހިވާ ގޮތަށް މަސައްކަތް ކުރާ މީހުންނާއި މެދު ފިޔަވަޅު އަޅާނެ ކަމަށް ރައީސް ވިދާޅުވި އިރު ރައީސް ފަޒުލް މަޤާމުން ދުރުކުރުމުގެ ބަދަލުގައި ފަޒުލް އަމިއްލައަށް އިސްތިއުފާދެންދެން ހުރީ މުސާރަ ލިބޭ ގޮތަށް ސަސްޕެންޝަންގައެވެ. އަދި ކޮރަޕްޝަންގެ ތުހުމަތުކުރެވިފައިވާ އެމްޑަބްލިއުއެސްސީގެ ޑީއެމްޑީ ފަޒީލް އަދިވެސް ހުންނެވީ މަޤާމުގައެވެ.
މި ނޫސްވެރިންގެ ބައްދަލުވުމަށްފަހު، ބައެއް ނޫސްވެރިން ވަނީ، ހައުސިން މިނިސްޓަރު ޑރ. އަލީ ހައިދަރަށް ފޮނުވާފައިވާ ސިޓީގައި އެ ބުނާ ހުޅުމާލެ ލޮޓް ނަންބަރު 20768, 1250 އަކަފޫޓުގެ ގޯތި ދީފައިވާ ސަރަހައްދަށް ގޮސްފައެވެ. އެ ބުނާ ގޯތީގައި ވަށާ ފާރު ރާނާފައިވާތަން ފެންނަ ހުރި އިރު، ބުދަ ދުވަހުގެ ނޫސްވެރިންގެ ބައްދަލުވުމުގައި ފަޒުލް ވަނީ ވަރަށް ބޮޑަށް އެކަން ދިފާއުކޮށް ވާހަކަ ދައްކަވަން މަސައްކަތް ކުރައްވާފައެވެ. ފަޒުލް ވިދާޅުވި ގޮތުގައި މައްސަލަ ޖެހިފައި ވަނީ 2 ލޮޓެއްގެ އެވެ. އަދި އެ މައްސަލަތަކުގައި ހިމެނެނީ ޖުމްލަ 6 މީހެކެވެ.
