ފަހަތުން އަރައު ޔުނައިޓެޑުން ސިޓީ ބަލިކޮށްފި

އިނގިރޭސި ޕްރިމިއައރ ލީގުގައި އެންމެ ފަހުގެ ޗެމްޕިއަން މެންޗެސްޓަރ ސިޓީއާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު މޮޅުވެއްޖެ އެވެ.

ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި އާދީއްތަ ދުވަހުގެ ރޭ ކުޅުނު މެޗު ޔުނައިޓެޑުން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ސިޓީންނެވެ. ނަމަވެސް ޔުނައިޓެޑުން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 36 ވަނަ މިނެޓުގައި ސިޓީން ލީޑު ނެގީ ޖޮސްކޯ ގްވާޑިއޯލް ޖެހި ލަނޑުންނެވެ. ޔުނައިޓެޑުން މެޗުގައި އެ ޓީމުގެ ދެ ލަނޑު ވެސް ޖެހީ ދެ ވަަނަ ހާފުގަ އެވެ. އެގޮތުން މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ޔުނައިޓެޑަށް ލިބުނު ޕެނަލްޓީ ކާމިޔާބުކޮށް ނަތީޖާ ހަމަހަމަ ކޮށްދިނީ ބްރޫނޯ ފެނާންޑޭސް އެވެ. އޭގެ ދެ މިނެޓު ފަހުން އަމަދު ޑިއާލޯ ޖެހި ލަނޑުން، ޔުނައިޓެޑު ވަނީ މެޗުން މޮޅުވެފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ލިސާންދްރޯ މާޓިނޭޒް އެވެ.

މިއީ މި ސީޒަންގެ ލީގުގައި ސިޓީގެ ފަސް ވަނަ ބައްޔެވެ. މިހާތަނަށް ކުޅެފައިވާ 16 މެޗުގެ ތެރެއިން، ސިޓީ މޮޅުވެފައި ވަނީ އަށް މެޗުންނެވެ. ތިން މެޗު ނިމުނީ އެއްވަރުވެގެންނެވެ. ތާވަލްގެ ފަސް ވަނައިގައި ސިޓީ އޮތީ 27 ޕޮއިންޓާ އެކު އެވެ. މިފަހަކަށް އައިސް ސިޓީގެ ނަތީޖާތައް ވަނީ ވަރަށް ބޮޑަށް ދަށްވެފަ އެވެ. ސިޓީ އަތުން މޮޅުވި ޔުނައިޓެޑު އޮތީ 16 މެޗުން 22 ޕޮއިންޓާ އެކު 13 ވަނައިގަ އެވެ.