މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ދެ ވަނަ ބުރުގެ ގުރޫޕު ސްޓޭޖުގައި ފުވައްމުލައް ސިޓީއާ ދެކޮޅަށް ކުޅުނު މެޗުން މޮޅުވެ ކ.ގުރައިދޫ އިން އެއް ވަނަ ހޯދިއިރު، ދެ ވަނަ ޓީމު ކަނޑައަޅަން ގުރު ނަގަން ޖެހިއްޖެ އެވެ.
ގުރޫޕު އީ ގައި ފުވައްމުލައް ސިޓީ ކުޅުނު ފުރަތަމަ މެޗުގައި ވަނީ ތ.ތިމަރަފުއްޓާ ވާދަކޮށް އެއްވަރުވެފަ އެވެ. ދެ ވަނަ މެޗުގައި ގުރައިދޫ އިން ވަނީ ތިމަރަފުށީގެ މައްޗަށް ކުރި ހޯދައި، ކުއާޓާ ފައިނަލްގެ ފުރުސަތު ހޯދައިފަ އެވެ. ގުރޫޕުގެ ފަހު މެޗުގައި ހޮނިހިރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗުގައި ގުރައިދޫ އިން ވަނީ 1-0 އިން ފުވައްމުލަކުގެ މައްޗަށް ކުރި ހޯދައިފަ އެވެ.
މެޗުގެ ފުރަތަމަ ހާފުގެ 33 ވަނަ މިނެޓުގައި ގުރައިދޫ އަށް ލީޑު ނަގައިދިނީ އަޙުމަދު ޝުއޫން އެވެ. އެއީ ގުރައިދޫ އަށް ލިބުނު ހިލޭ ޖެހުމެއްގައި މުޙައްމަދު ނާއިމް ފޮނުވާލި ބޯޅަ ފުވައްމުލަކުގެ ކުޅުންތެރިޔެއްގެ ގައިގައި ޖެހިފައި ލިބުނު ވަގުތު، އެއް ފަހަރުން ގޯލަށް ފޮނުވާލައިގެން ޝުއޫން ޖެހި ލަނޑެކެވެ. އެ ބޯޅަ މަތަ ކުރުމަށް ފުވައްމުލަކުގެ ގޯލު ކީޕަރަށް މާ ބޮޑު މަސައްކަތެއް ނުކުރެވުނެވެ.
މޮޅާއެކު ގުރައިދޫ އިން ވަނީ މި ގުރޫޕުގެ އެއް ވަނަ ކަށަވަރު ކޮށްފަ އެވެ. އެއީ ކުޅުނު ދެ މެޗުން ވެސް މޮޅުވެ ހަ ޕޮއިންޓާ އެކު އެވެ. މި ގުރޫޕުގެ ދެ ވަނައިގައި އޮތް ފުވައްމުލައް ސިޓީ އާއި ތިން ވަަނައިގައި އޮތް ތިމަރަފުއްޓަށް އެއް އަދަދަކަށް ޕޮއިންޓު ލިބޭއިރު، ހުރިހާ ގޮތަކުން ވެސް މި ދެ ޓީމު އެއްވަރެވެ. އެހެންކަމުން މުބާރާތުގެ ކުއާޓާ ފައިނަލްގެ ޖާގަ ލިބޭނީ ދެ ޓީމުގެ ދެމެދުގައި ނަގާ ގުރުއަތުންނެވެ.
