ރިޔާސީ އިންތިޚާބުގެ ކެމްޕެއިން އަށް ރަށް ރަށަށް ވަޑައިގެން، އޭރުގެ އިދިކޮޅު ކެންޑިޑޭޓު ޑޮކްޓަރު މުޙައްމަދު މުޢިއްޒު ވަރަށް ގިނަ ވައުދުވެ ވަޑައިގެންނެވި އެވެ. މިދިޔަ ސާޅީސް އަހަރު، ނުވަތަ ތަރީސް އަހަރުވީއިރު ވެސް އެ ރަށްތަަކަށް ކުރީގެ ސަރުކާރުތަކުން ކަމެއް ކޮށްދީފައި ނުވާ ކަމަށް ވެސް ވިދާޅުވި އެވެ. އަދި އެމަނިކުފާނުގެ ސަރުކާރެއްގައި އެ ރަށްތަކަށް ބޭނުންވާ ކަންކަން ކޮށްދެއްވާނެ ކަމަށާއި، ރައްޔިތުންނަށް އުފާވެރި ކަމެއް ގެެނެސްދެއްވާނެ ކަމަށް ވައުދުވެ ވަޑައިގެންނެވި އެވެ. ބަނދަރުތައް ހެދުމާއި، މަގުތަކުގައި ތާރު އެޅުމާއި، ސާފު ބޯފެން ޤާއިމު ކުރުމާއި، ނަރުދަމާ އެޅުމާއި، ކުޅިވަރުގެ ވަސީލަތްތައް ޤާއިމު ކުރުމުގެ އިތުރުން، ދެން ވެސް ކުރަން ހުރި ކަންކަމުގެ ވައުދެވެ. ރައްޔިތުން އޭރުގެ ކެންޑިޑޭޓު މުޢިއްޒު އަށް ވޯޓު ދިނީ އެކަންކަން ފުރިހަމަ ވާނެ ކަމުގެ އުންމީދާ އެކު އެވެ.

ވެރިކަަމަށް ވަޑައިގަންނަވަން ވައުދުތައް ބައްސަވާލެއްވީ އެކި ބައިތަކަށެވެ. ފުރަތަމަ 100 ދުވަހުގެ ވައުދުތަކާއި، އެއް އަހަރު ދުވަހުގެ ވައުދުތަކުންނެވެ. ވެރިކަމަަށް ވަޑައިގެންނެވި ފަހުން މިހާރު އެއް އަހަރަށް ވުރެ ގިނަ ދުވަސް ފާއިތުވެ، މިހާރު ގުނަމުން މި ދަނީ ރައީސް މުޢިއްޒުގެ ވެރިކަމުގެ ދެ ވަނަ އަހަރެވެ. ވެރިކަމަށް ވަޑައިގެން، ރައްޔިތުންނަށް ވީ ވައުދުތަކުގެ މަތިން ހަނދުމަފުޅު ނެތުން ކަހަލަ އެވެ. ވެރިކަމުގެ ލައްޒަތުގައި ޖެހި ވަޑައިގެން ރައީސް މުޢިއްޒު ހުންނެވީ އެވެ. އެހެން ހުންނަވަނިކޮށް، ދެން ކުރިމަތިވީ ރައްޔިތުންގެ މަޖިލީހުގެ އިންތިޚާބެެވެ، ސަރުކާރަށް މެޖޯރިޓީ ބޭނުންވާތީވެ، އަނެއްކާ ވެސް ރަށްތަކަށް ވަޑައިގެންނެވި އެވެ. ވީ ވައުދުތައް ނުފުދި އޮތީ މަޖިލީހުގެ މެޖޯރިޓީ ނެތުމުން ކަމަށް ވިދާޅުވެ، އެ މެޖޯރިޓީ ދެއްވުމަށް "އާދޭސް" ދެންނެވި އެވެ. އެ އާދޭސް އަަޑު އަހައި، ރައްޔިތުން ސަރުކާރަށް މަޖިލިސް ދިނީ ހިތަކަށެވެ.

އެ މެޖޯރިޓީ ލިބުނު ފަހުން ސަރުކާރަށް އެއް އަހަރު ދުވަސް ވެގެން ދިޔައިރު، ރައްޔިތުންނަށް ވީ ވައުދުތައް ހުރީ ނުފުދި އެވެ. ރަށް ރަށުގައި ކުރިއަށް ގެންދާނެ ކަަމަށް ވިދާޅުވި ތަރައްޤީގެ މަޝްރޫއުތައް ނުފެށެ އެވެ. ނުވިތާކަށް ކުރީގެ ސަރުކާރުން ހަވާލު ކޮށްފައިވާ މަޝްރޫއުތައް ވެސް ހުރީ މަޑު ޖެހިފަ އެވެ. ފުރަތަމަ 100 ދުވަހުގެ ތެރޭގައި ކުރައްވަން ބުނި ކަންކަން ހާސިލު ނުވެ، އެއް އަހަރު ދުވަހުގެ ވައުދުތައް ވެސް ދިޔައީ ފަނު ފުލުންނެވެ. ހަމަ އެއްވެސް މަސައްކަތެެއް ކުރެވޭ މަންޒަރެއް މި ރާއްޖެ އަކުން ނުފެނެ އެވެ. މިއީ އިދިކޮޅު ޕާޓީން ދައްކާ ވާހަކައެއް ނޫނެވެ. ޚުދު އަޅުގަނޑު ވެސް ދައްކާ ވާހަކައެއް ނޫނެވެ. މިއީ ރަށް ރަށުގައި ތިބި އާންމު ރައްޔިތުން ދައްކާ ވާހަކަ އެވެ. މިއީ މި ސަރުކާރު ގެންނަން، ރައީސް މުޢިއްޒު ހޮވަން އަރުވާ ޖަހައިގެން މަސައްކަތް ކުރި ރައްޔިތުންގެ ވާހަކަ އެވެ. ޝަކުވާ އެވެ. މުޅި ރާއްޖެ އިން ފެންނަން އޮތް މަންޒަރެވެ.

ވައުދުތައް ނުފުދި، ސަރުކާރަށް ފާޑު ކިޔާ ރައްޔިތުންގެ އަދަދު ގިނަވެފައިވާ ދަނޑިވަޅެއްގައި އަނެއްކާ ވެސް ރައީސް މުޢިއްޒު ރަށް ރަށަށް ވަޑައިގަންނަވަން ފައްޓަވައިފި އެވެ. މިދިޔަ ހަފުތާގެ ތެރޭގައި އިދިކޮޅު މައި ޕާޓީ، ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ބޭއްވި ބޮޑު ޖަލްސާ އަށް ދެ ދުވަހަށް ވެފައި ވަނިކޮށް، ރައީސް މުޢިއްޒު މާލޭ ކައިރީގެ ބައެއް ރަށްތަކަށް ވަޑައިގެންވި އެވެ. އެ ރަށްތަކަށް ވަޑައިގެން ރައީސް ވިދާޅުވީ ކުރިން ވެފައިވާ ވައުދުތައް ފުއްދަވާނެ ކަމަށެވެ. އެހެން އުޅުއްވަން ހައްދަވައިގެން، ރައީސް އަށް ވެސް ހެއްދެވުނީ ގޯހެވެ. އެޅުއްވުނީ މުޅިން ޅަ އެއްޗިސް އެެވެ. މިސާލަކަށް، ރިޔާސީ އިންތިޚާބުގެ ތެރޭގައި އއ.ތޮއްޑޫގައި އަޅުއްވަން ވިދާޅުވި އެއާޕޯޓުގެ ވައުދު، އެ ދަތުރުފުޅުގައި ބަދަލުވީ އއ.މަތިވެރި އަށެވެ.

ރައީސްގެ ދަތުރުފުޅުގެ ދެ ދުވަސް ފަހުން އެމްޑީޕީން ބޭއްވި ޖަލްސާ އަށް ލިބުނީ ބޮޑު ތަރުހީބެކެވެ. ސަރުކާރާ މެދު މާޔޫސްވެފައި ތިބި އެތައް ބަޔަކު އެ ޖަލްސާ އަށް ޙާޟިރުވެ، ސަރުކާރުގެ ކަންކަމާ ދެކޮޅަށް އަޑު އުފުލި އެވެ. އެ ޖަލްސާ އަށް ޙާޟިރުވި މީހުންގެ ތެރޭގައި ރައީސް މުޢިއްޒުގެ ސަރުކާރު ގެންނަން މަސައްކަތް ކުރި މީހުން އަދި ރައީސް މުޢިއްޒު އަށް މަޖިލީހުގެ މެޖޯރިޓީ ހޯއްދަވައި ދެއްވަން މަސައްކަތް ކުރި މީހުން ވެސް ހިމެނެ އެވެ. "ޤާނޫނު އަސާސީގެ ދިފާއުގައި" ބޭއްވި އެ ޖަލްސާ ވެގެން ދިޔައީ، ސަރުކާރުގެ އިސް ފަރާތްތަކަށް ހަޖަމު ކުރަން އުނދަގޫވި ޖަލްސާ އަކަށެވެ.

އެ ޖަލްސާގެ ފަހުން ވެސް ސަރުކާރަށް ފާޑު ކިޔާ މީހުންގެ އަދަދު ދަނީ އިތުރު ވަމުންނެވެ. ޖުމުލަ ގޮތެއްގައި އެއީ ސަރުކާރަށް ކަމެއް ނުކުރެވޭތީ އެވެ. އެކަން އެހެން އޮއްވާ، އަނެއްކާ ވެސް ރައީސް މުޢިއްޒު އަތޮޅު ތެރޭގެ ރަށްތަކަށް ވަޑައިގެންފި އެވެ. އަނެއްކާ ވެސް ވައުދުތައް ފުއްދަވާނެ ކަމުގެ ވައުދުވުަމަށެވެ. ރައްޔިތުންގެ ލޮލުގައި ކޮންމެ ވެސް އަނދުނެއް އަޅުވާށެވެ. ކޮންމެ ވެސް ބަހަނާއެއް ދައްކަވާށެވެ. މޮޅު ވާހަކަތަކެއް ދައްކަވާށެވެ. މިފަހަރު ރައީސް މުޢިއްޒު އަޅުއްވާ ޅަ އެއްޗިސް އާއި، ކުރައްވާ "ގަޅި" ކަންކަން ބަލާލުމުގެ އުންމީދުގައި އެބަ ހުރީމެވެ.