މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ދެ ވަނަ ބުރުގެ ގުރޫޕު ސްޓޭޖުގައި ހއ.ދިއްދޫއާ ދެކޮޅަށް ކުޅުނު މެޗުން މޮޅުވެ، ބ.އޭދަފުށިން މުބާރާތުގެ ކުއާޓާ ފައިނަލްގެ ފުރުސަތު ހޯދައިފި އެވެ.

ގުރޫޕު އެފްގައި އޭދަފުށިން ކުޅުނު ފުރަތަމަ މެޗުގައި ވަނީ ކ.މާފުށި އަތުން ބަލިވެފަ އެވެ. ފުރަތަމަ މެޗުގައި ދިއްދޫ އިން ވަނީ މާފުށީގެ މައްޗަށް ކުރި ހޯދައިފަ އެވެ. އެހެންކަމުން އޭދަފުއްޓަށް އަށް މުބާރާތުގެ ކުއާޓާ ފައިނަލްގެ ފުރުސަތު ލިބެން އޮތީ ފަހު މެޗުގައި ދިއްދޫ އަތުން ތިން ލަނޑުގެ ތަފާތުން މޮޅުވެގެންނެވެ.

ހޮނިހިރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު އޭދަފުށިން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ޙާފުގައި އޭދަފުށިން އެއް ލަނޑު ޖަހައި ކުރި ހޯދިއިރު، ދެ ވަނަ ހާފުގައި އެ ޓީމުން ވަނީ ތިން ލަނޑު ޖަހައިގެން މެޗުގެ ކޮންޓްރޯލް ނަގައިފަ އެވެ. މި ހާފުގެ ފަހު ވަގުތުގައި ދިއްދޫ އިން ވެސް ވަނީ ލަނޑެއް ޖަހައިފަ އެވެ.

މެޗު ފަށައިގެން ރަނގަޅަށް ކުޅެމުން ދިޔަ އޭދަފުށިން ވަނީ 21 ވަނަ މިނެޓުގައި ލަނޑު ޖަހައިފަ އެވެ. އެ ލަނޑު އެ ޓީމަށް ޖަހައިދިނީ އަލީ ނަސީމް އެވެ. ދެ ވަނަ ހާފުގައި އޭދަފުށީގެ ޖައުޝަން މުޙައްމަދު ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް އޭދަފުށީގެ ތިން ވަނަ ލަނޑު ޖެހީ މުޙައްމަދު ފާސިރު އެވެ. އަދި މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އޭނާ ވަނީ އޭދަފުށީގެ ހަތަރު ވަނަ ލަނޑު ވެސް ޖަހައިފަ އެވެ. މެޗުގެ އިތުރު ވަގުތުގައި ދިއްދޫގެ ހަމައެކަނި ލަނޑު ޖެހީ ޙުސެއިން ޒިމްޔާން އެވެ.

މޮޅާއެކު އޭދަފުށިން ކުއާޓާ ފައިނަލްގެ ފުރުސަތު ހޯދީ ގުރޫޕުގެ އެއް ވަނަ ޓީމުގެ ގޮތުގަ އެވެ. ދެ މެޗުން އެ ޓީމަށް ތިން ޕޮއިންޓު ލިބޭއިރު، ކުރި ހޯދަނީ ލަނޑުގެ ގޮތުންނެވެ. ހަމަ އެ އަދަދަށް މެޗު ކުޅެގެން ދެ ވަނައިގައި މާފުއްޓާއި، ތިން ވަނައިގައޮ ދިއްދޫ އަށް ލިބެނީ ވެސް ތިން ޕޮއިންޓެވެ. ލަނޑުގެ ގޮތުން ކުރި ހޯދައި ދެ ވަނައިގައި ކުއާޓާ ފައިނަލްގެ ފުރުސަތު ހޯދީ މާފުއްޓެވެ.