ސައިބަރ ކްރައިމްގެ ޝިކާރައަކަށްވެ، ފޫނުބެއްދޭ ވަރުގެ ބޮޑެތި ގެއްލުންތައް ކުރިމަތިވަމުން އަންނަ ކަމަށާއި، މިކަމަށް މުޖުތަމައު ހޭލުންތެރިވާންޖެހޭ ކަމަށް ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.

އެންމެން ގުޅިގެން ރައްކާތެރި ޑިޖިޓަލް މާހައުލެއް ގާއިމުކުރުމާއި އާންމު ރައްޔިތުން ސައިބަރ ސެކިއުރިޓީއަށް އަހުލުވެރިކުރުވުމު ގޮތުން ބާއްވާ ސައިބަރ އެކްސްޕޯ 2024 ގައި ފެށުމުގެ ރަސްމިއްޔާތުގައި ކޮމިޝަނަރ ޝުޖާއު ވިދާޅުވީ ސައިބަރ ކްރައިމްގެ ޝިކާރައަކަށްވެ، އަގުބޮޑެތި ގެއްލުންތައް ވަމުންދާ ކަމަށާއި، ޑޭޓާތައް ގެއްލި ފޫނުބެއްދޭ ވަރުގެ ބޮޑެތި ގެއްލުންތައްވެފައިވާ ކަމަށެވެ. އަދި އެކަމުގެ ސަބަބުން ދިރިއުޅުމުގައި ގިނަ ތަކުލީފުތަކެއް އުފުލަންޖެހޭ ހާލަތު މެދުވެރިވާ ކަމަށް ކޮމިޝަނަރ ޝުޖާއު ވިދާޅުވިއެވެ.

މިކަން ހުއްޓުވުމަށް އެންމެން ގުޅިގެން އެކުގައި ގިނަ މަސައްކަތްތައް ކުރަންޖެހޭކަން ފާހަގަކުރައްވައި ކޮމިޝަނަރ ޝުޖާއު ވިދާޅުވީ ސަރުކާރުގެ ވުޒާރާތަކާއި އަމިއްލަ ކުންފުނިތަކާއި އެކި ޖަމްއިއްޔާތަކާއި ތައުލީމާއި ތަރުބިއްޔަތު ދޭ މުއްސަސާތަކުގެ މެދުގައި އޮންނަ ގުޅުން މިހާރަށްވުރެ ވަރުގަދަ ކުރަންޖެހޭ ކަމަށެވެ. އަދި މިއަދު ދިވެހި ރައްޔިތުންގެ އަމާޒަކަށް ވާންވީ ސައިބަރ ސެކިއުރިޓީގެ ދާއިރާއިން އައު ފަންނުވެރިން ތައާރަފްކޮށް، މިދާއިރާއަށް ލޯބިޖެއްސުން ކަމަށް ވިދާޅުވިއެވެ. 

މިރަސްމިއްޔާތުގައި މޯލްޑިވްސް ވިމެން އިންޓެކް އާއި ޣިޔާޘުއްދީން އިންޓަރނޭޝަނަލް ސްކޫލް ގުޅިގެން އެސްކޫލުގެ ފަސް ދަރިވަރަކު ތައްޔާރުކޮށްފައިވާ ރޮބަޓްކަމުގައިވާ “ރިހި ކަކުނި” ދައްކާލާފައެވެ.  

ހުޅުމާލެ ސެންޓްރަލް ޕާކުގައި ކުރިއަށް ގެންދާ މި ސައިބަރ އެކްސްޕޯއަކީ ސަރުކާރުގެ މުއައްސަސާތަކާއި ކުންފުނިތަކާއި އަމިއްލަ ކުންފުނިތަކާއި ފަންނީ ބޭފުޅުންނަށް ހުޅުވާލައިގެން ކުރިއަށް ގެންދާ އެކްސްޕޯއެކެވެ. މި އެސްޕޯއަކީ އެންމެން ގުޅިގެން ރައްކާތެރި ޑިޖިޓަލް މާހައުލެއް ގާއިމުކުރުމާއި އާންމު ރައްޔިތުން ސައިބަރ ސެކިއުރިޓީއަށް އަހުލުވެރިކުރުވުމަށް ބާއްވާ އެކްސްޕޯއެކެވެ.

ދިވެހި ފުލުހުންގެ ޚިދުމަތުން އިންތިޒާމްކޮށްގެން މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އާއި ނޭޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީ އާއި ނޭޝަނަލް ސައިބަަރ ސެކިއުރިޓީ އޭޖެންސީ ގުޅިގެން ބާއްވާ މި އެކްސްޕޯގެ ކުރިއަށް ގެންދަނީ ގިނަ ފަރާތްތަކެއް އެހީތެރިކަމާއެކު އެވެ.

މިރަސްމިއްޔާތުގައި ކޮމިޝަނަރ ޝުޖާއުގެ އިތުރުން ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން އާއި ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ އާއި ބޭރުގެ ގައުމުތަކުގެ ސަފީރުންނާއި ފުލުހުންގެ ސީނިއަރ އޮފިސަރުންނާއި އެކި ވުޒާރާތަކުގެ އިިސްވެރިން ބައިވެރިވެލެއްވިއެވެ.