ގާޑިއޯލާ ބުނީ ޔުވެންޓަސްއާ ދެކޮޅަށް ސިޓީން ރަނގަޅު ކުޅުމެއް ދެއްކި ކަމަށް

ޔުއެފާ ޗެމްޕިއަންސް ލީގުގައި ޔުވެންޓަސްއާ ދެކޮޅަށް ކުޅުނު މެޗުން ބަލިވި ނަމަވެސް، އެ މެޗުގައި މެންޗެސްޓަރ ސިޓީން ދެއްކީ ރަނގަޅު ކުޅުމެއް ކަމަށް އެ ޓީމުގެ ޕެޕް ގާޑިއޯލާ ބުނެފި އެވެ.

އޭނާ މިހެން ބުނީ ޔުވެންޓަސްއާ ދެކޮޅަށް ސިޓީން ކުޅުނު މެޗަށްފަހު ވާހަކަ ދައްކަމުންނެވެ. ޔުވެންޓަސްގެ އަމިއްލަ ދަނޑުގައި ކުޅުނު އެ މެޗުން ސިޓީ ބަލިވެފައި ވަނީ 2-0 އިންނެވެ. އެ މެޗުން ސިޓީ ބަލިވެފައިވާއިރު، މިވަގުތު ސިޓީގެ ނަތީޖާތައް ވަނީ ވަރަށް ބޮޑަށް ދަށްވެފަ އެވެ.

ގާޑިއޯލާ ބުނީ އެ މެޗުގައި ސިޓީން ވަރަށް ރަނގަޅަށް ކުޅުނު ކަމަށާއި، އެ ޓީމުން ދެއްކީ ފުރިހަމަ ކުޅުމެއް ކަމަށެވެ. ޚާއްސަކޮށް ސިޓީން ދައްކަން ބޭނުންވި ފެންވަރުގެ ކުޅުމެއް ވެސް އެ މެޗުގައި ދެއްކުނު ކަމަށް ގާޑިއޯލާ ވަނީ ބުނެފަ އެވެ. އެ މެޗުގައި ސިޓީން ބޯޅަ ހިފަހައްޓައިގެން ރަނގަޅަށް ކުޅުނުއިރު، ކުރީގެ މެޗުތަކާ ޚިލާފަށް އެ މެޗުގައި ގިނަ ކަންކަން ފެނުނީ ރަނގަޅަށް ކަމަށް ގާޑިއޯލާ ވަނީ ބުނެފަ އެވެ.

ނަމަވެސް އޭނާ ބުނީ މެޗުގެ ނަތީޖާއާ ގުޅޭ ގޮތުން ދިފާއުގައި ދައްކާނެ ވާހަކައެއް ނެތް ކަމަށެވެ. އެ މެޗުގައި ސިޓީ އަށް ލަނޑު ޖަހާނެ ހަ ފުރުސަތެއް ލިބުނު ކަމަށާއި، އެ ޓީމަށް ދިމާވި މައްސަލަ އަކީ އެ ފުރުސަތުތައް ނިންމާނުލެވުމުގެ މައްސަލަ ކަމަށް ވެސް ގާޑިއޯލާ ބުންޏެވެ. އެހެން ނަމަވެސް، އޭނާ ހުރީ ސިޓީގެ ކުޅުންތެރިންނާ އެކު ކަމަށާއި، ހުންނާނީ ވެސް ސިޓީގެ ކުޅުންތެރިންނާ އެކު ކަމަށް ގާޑިއޯލާ ވަނީ ބުނެފަ އެވެ. ގާޑިއޯލާ ބުނި ގޮތުގައި އަދިވެސް ސިޓީގެ ކުޅުންތެރިންނަށް އެމީހުންނަށް ބޭނުންވާ އިތުބާރު ހޯދޭނެ އެވެ.

މީގެ އިތުރުން ގާޑިއޯލާ ބުނީ ކޮންމެ ޓީމަކަށް ވެސް އުނދަގޫ ވަގުތެއް އަންނާނެ ކަމަށާއި، ސިޓީ އަށް މިވަގުތަކީ އުނދަގޫ ވަގުތެއް ކަމަށެވެ. ކަންކަން ރަނގަޅު ކުރުމަށް ބަލާއިރު، ކޮންމެ ކުޅުންތެރިޔަކު ވެސް އެ ކުޅުންތެރިޔެއްގެ އަމިއްލަ ނަފުސާ ސުވާލު ކުރަން ޖެހޭ ކަމަށް ގާޑިއޯލާ ބުންޏެވެ. ޚާއްސަކޮށް ކަންކަން ރަނގަޅު ކުރުމަށް ކުޅުންތެރިންނަށް ކުރެވޭނެ ކަންތައްތަކާއި، ވަކި ވަކި ކުޅުންތެރިންގެ ކުޅުން ރަނގަޅު ކުރުމަށް ޚާއްސަ ކަމެއް ދިނުން މުހިންމު ކަމަށް ވެސް ގާޑިއޯލާ ބުންޏެވެ.

ޗެމްޕިއަންސް ލީގުގެ އިތުރުން، އިނގިރޭސި ޕްރިމިއާ ލީގުގައި ވެސް މިވަގުތު ސިޓީގެ ނަތީޖާތައް ވަނީ ދަށްވެފަ އެވެ. މިވަގުތު އެ ޓީމު އޮތީ ލީގު ތާވަލްގެ ހަތަރު ވަނައިގަ އެވެ. ލީގުގައި ސިޓީން 15 މެޗު ކުޅެފައިވާއިރު، މޮޅުވެފައި ވަނީ އަށް މެޗުންނެވެ. ތިން މެޗު އެއްވަރުވެފައިވާއިރު، ހަތަރު މެޗުން ސިޓީ ވަނީ ބަލިވެފަ އެވެ. ޗެމްޕިއަންސް ލީގުގައި ސިޓީ އޮތީ 22 ވަނައިގަ އެވެ. ހަ މެޗު ކުޅެފައިވާއިރު، އެ ޓީމު މޮޅުވެފައި ވަނީ ދެ މެޗުންނެވެ. ދެ މެޗު އެއްވަރުވެފައިވާއިރު، އަނެއް ދެ މެޗުން ވަނީ ބަލިވެފަ އެވެ.