އޭދަފުށީގެ ކީޕަރު އެއް އަހަރަށް ސަސްޕެންޑުކޮށް މާފުށި ޖޫރިމަނާ ކޮށްފި

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގައި ވާދަކުރާ ބ.އޭދަފުށިގެ ގޯލު ކީޕަރު އަޖުފާން އަމްޖަދު އެއް އަހަރު ދުވަހުގެ މުއްދަތަކަށް ސަސްޕެންޑުކޮށް، ކ.މާފުށި ޓީމު ޖޫރިމަނާ ކުރަން ނިންމައިފި އެވެ.

އޭދަފުއްޓާއި މާފުށި ބައްދަލު ކުރި މެޗުގައި އަމްޖަދު ވަނީ މާފުށީގެ ކުޅުންތެރިޔަކަށް ނުރައްކާތެރި ފައުލެއް ކޮށްފަ އެވެ. އެ ފައުލާ ގުޅިގެން މެޗުގައި އޭނާ އަށް ރެފްރީ ވަނީ ސީދާ ރަތް ކާޑު ވެސް ދައްކައިފަ އެވެ. މުބާރާތް އިންތިޒާމު ކުރާ ފަރާތުން އޭދަފުށީ ޓީމަށް ފޮނުވި ސިޓީގައި ބުނެފައި ވަނީ މެޗުގެ އިތުރު ވަގުތުގައި އަމްޖަދު ކޮށްފައިވާ ފައުލަކީ "ވައިލެންޓް ކޮންޑަންޓް" އަކަށްވާ ކަމަށެވެ. އެފަދަ ކުށެއް ދެ ވަނަ ފަހަރަށް ތަކުރާރު ނުކުރުމަށް އަމްޖަދު އަށް ވަނީ ނަސޭހަތްތެރިވެފަ އެވެ.

މީގެ އިތުރުން އަމްޖަދު ކޮށްފައިވާ ކުށަށް، ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުން އިންތިޒާމުކޮށެގެން ރާވާ ހިންގާ އެއްވެސް ފުޓުބޯޅަ މުބާރާތެއްގައި ބައިވެރި ނުވެވޭ ގޮތަށް އޭނާ ވަނީ އެއް އަހަރު ދުވަހުގެ މުއްދަތަކަށް ސަސްޕެންޑު ކޮށްފަ އެވެ. އަދި 5،000 (ފަސްހާސް) ރުފިޔާ އިން ޖޫރިމަނާ ކުރަން ވެސް ނިންމާފައިވެ އެވެ.

މީގެ އިތުރުން މާފުށީގެ ކުޅުންތެރިޔަކަށް އަމްޖަދު ފައުލް ކުރި ވަގުތު އެ ޓީމުގެ ސަޕޯޓަރުންގެ ތެރެއިން ބަޔަކު، ދަނޑުގައި ސެކިއުރިޓީ ފެންސް ވައްޓާލުމަށްފަހު ދަނޑަށް އެރި މައްސަލައިގައި މާފުށި ޓީމު ޖޫރިމަނާ ކުރަން ވެސް ވަނީ ނިންމައިފަ އެވެ. އެކަމުގެ އަދަބެއްގެ ގޮތުން މާފުށި ޓީމު 3،000 (ތިންހާސް) ރުފިޔާ އިން ޖޫރިމަނާ ކުރަން ނިންމައި، ދެން އެ ޓީމު ކުޅެން ޖެހޭ މެޗުގެ ކުރިން އެ ފައިސާ ދެއްކުމަށް ވެސް ވަނީ އަންގައިފަ އެވެ. އަދި އެ ފަދަ ކުށެއް ތަކުރާރު ވެއްޖެ ނަމަ، ޖޫރިމަނާ ކުރެވޭ އަދަދު ބޮޑު ވާނެ ކަމަށް ވެސް އެ ސިޓީގައި ވަނީ ބުނެފަ އެވެ.