ތިމަރަފުށި ބަލިކޮށް، ގުރައިދޫ ކުއާޓާ ފައިނަލަށް
ދެ ވަނަ ބުރުގައި ބާކީ އެއް މެޗު އޮއްވާ ގުރައިދޫ އިން ކުއާޓާ ފައިނަލްގެ ފުރުސަތު ހޯދިއިރު، އެ ޓީމު އޮތީ ގުރޫޕު އީގެ އެއް ވަނައިގަ އެވެ.
މެޗުގައި ލަނޑު ޖެހުމަށްފަހު ގުރައިދޫގެ ބިދޭސީ ކުޅުންތެރިޔާ އުފާ ފާޅު ކުރަނީ
މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ދެ ވަނަ ބުރުގެ ގުރޫޕު ސްޓޭޖުގައި ތ.ތިމަރަފުއްޓާ ދެކޮޅަށް ކުޅުނު މެޗުން މޮޅުވެ ކ.ގުރައިދޫ އިން މުބާރާތުގެ ކުއާޓާ ފައިނަލްގެ ފުރުސަތު ހޯދައިފި އެވެ.
ބުދަ ދުވަހުގެ ހަވީރު ގަލޮޅު ރަސްމީ ދަނޑުގައި މި ދެ ޓީމު ބައްދަލު ކުރިއިރު، ތިމަރަފުށި ކުޅުނު ފުރަތަމަ މެޗުގައި ވަނީ ފުވައްމުލައް ސިޓީއާ އެއްވަރުވެފަ އެވެ. ތިމަރަފުއްޓާ ދެކޮޅަށް ކުޅުނު މެޗަކީ ދެ ވަނަ ބުރުގައި ގުރައިދޫ އިން ކުޅުނު ފުރަތަމަ މެޗެވެ.
މެޗު ފަށައިގެން ރަނގަޅަށް ކުޅެމުން ދިޔައީ ވެސް ގުރައިދޫ އިންނެވެ. މެޗު ފަށައިގެން 13 ވަނަ މިނެޓުގައި ގުރައިދޫ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ގުރައިދޫ އަށް ޖަހައިދިނީ އެ ޓީމުގެ ބިދޭސީ ކުޅުންތެރިޔާ އަޙުމަދު އިބްރާހީމް އައްބާސް އެވެ. އޭނާ އެ ލަނޑު ޖެހީ ގުރައިދޫގެ އަޙުމަދު ރިޝްފާން ތަނަވަސްކޮށްދިން ފުރުސަތެއްްގައި ލިބުނު ބޯޅަ ގޯލަށް ވައްދާލައިގެންނެވެ. މެޗުގައި އިތުރު ލަނޑު ޖަހާނެ ފުރުސަތު ގުރައިދޫ އަށް ލިބުނުއިރު، ތިމަރަފުއްޓަށް ވަނީ ނަތީޖާ ހަމަހަމަ ކުރާނެ ފުރުސަތު ވެސް ލިބިފަ އެވެ.
ދެ ވަނަ ބުރުގައި ބާކީ އެއް މެޗު އޮއްވާ ގުރައިދޫ އިން ކުއާޓާ ފައިނަލްގެ ފުރުސަތު ހޯދިއިރު، އެ ޓީމު އޮތީ ގުރޫޕު އީގެ އެއް ވަނައިގަ އެވެ. ގުރޫޕު ސްޓޭޖުގެ ފަހު މެޗުގައި ގުރައިދޫ ނިކުންނާނީ ފުވައްމުލަކާ ދެކޮޅަށެވެ.
