އަލިފުށިން ކުރެންދޫ ބަލިކޮށްފި

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ދެ ވަނަ ބުރުގެ ގުރޫޕު ސްޓޭޖުގައި ޅ.ކުރެންދޫއާ ދެކޮޅަށް ކުޅުނު މެޗުން މޮޅުވެ ރ.އަލިފުށިން ދެ ވަނަ ބުރުގެ ފެށުން ރަނގަޅު ކޮށްފި އެވެ.

ގުރޫޕު އެޗުގައި އަންގާރަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު އަލިފުށިން ކާމިޔާބު ކުރީ 1-0 އިންނެވެ. މެޗުގައި އަލިފުށިން ލަނޑު ޖެހީ ވެސް ދެ ވަނަ ހާފުގަ އެވެ. މުބާރާތުގެ ފުރަތަމަ ބުރުގައި އަލިފުށި ކުޅުނު ތިން މެޗުގެ ތެރެއިން ދެ މެޗުން މޮޅުވެފައިވާއިރު، އެއް މެޗުން އެ ޓީމު ވަނީ ބަލިވެފަ އެވެ. ކުރެންދޫ އިން ވަނީ އެ ޓީމު ކުޅުނު ތިން މެޗުގެ ތެރެއިން އެއް މެޗުން މޮޅުވެފަ އެވެ. އަނެއް މެޗު އެއްވަރުވީއިރު، އަނެއް މެޗުން ވަނީ ބަލިވެފަ އެވެ.

މެޗުގެ ފުރަތަމަ ހާފުގައި ވެސް އަލިފުށިން ވަނީ ކުރެންދޫ ކޮޅަށް ލަނޑު ޖެހުމަށް ވަރަށް ބޮޑަށް މަސައްކަތް ކޮށްފަ އެވެ. ނަަމަވެސް ކުރެންދޫގެ ގޯލު ކީޕަރަކަށް ހުރި ސްރީ ލަންކާގެ ސުޖަން ޕެރޭރާ ވަނީ ވަނީ އަލިފުށިން ފޮނުވާލި ހަމަލާތައް ހުއްޓުވައިފަ އެވެ. މެޗުގައި ލަނޑު ޖެހުމަށް އަލިފުށިން ކުރަމުން އައި މަސައްކަތް ކާމިޔާބުވީ މެޗުގެ 63 ވަނަ މިނެޓުގަ އެވެ. ޙުސެއިން ނިހާން (ނިހާޓް) ތަނަވަސްކޮށްދިން ބޯޅައެއްގައި އަލިފުއްޓަށް އެ ލަނޑު ޖަހައިދިނީ އަޙުމަދު ހުޝާމް އެވެ.

މެޗުން މޮޅުވެ އަލިފުށިން ވަނީ މުބާރާތުގެ ކުއާޓާ ފައިނަލްގެ ފުރުސަތު ބޮޑު ކޮށްފަ އެވެ. އަލިފުއްޓާއި ކުރެންދޫގެ އިތުރުން، ދެން މި ގުރޫޕުގައި އޮތީ މާލޭ ސިޓީ އެވެ.