މީދޫ އިން އައްޑޫ މޮޅުވިޔަ ނުދީ ހިފަހައްޓައިފި

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ދެ ވަނަ ބުރުގެ ގުރޫޕު ސްޓޭޖުގައި އައްޑޫ ސިޓީ އާއި ދ.މީދޫ ބައްދަލު ކުރި މެޗު އެއްވަރުވެގެން ނިމިއްޖެ އެވެ.

ގުރޫޕު ޖީ ގައި އަންގާރަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ނިމުނީ ދެ ޓީމު 3-3 އިން އެއްވަރުވެގެންނެވެ. މެޗުގައި އައްޑޫ އިން ވަނީ ދެ ފަހަރެއްގެ މަތިން ލަނޑު ޖަހައި ލީޑު ވެސް ހޯދައިފަ އެވެ. ނަމަަވެސް މީދޫ އިން ވަނީ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް އައްޑޫ އިންނެވެ. އެ ލަނޑު އައްޑޫ އަށް ޖަހައިދިނީ އިބްރާހީމް މަހުދީ (ފޭދޫ އިއްބެ) އެވެ. އޭގެ ފަހުން މެޗުގެ ދެ ވަނަ ހާފުގައި އައްްޑޫ އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު އައްޑޫ އަށް ޖަހައިދިނީ އިސްމާއީލް އީސަ (މެސީ) އެވެ.

މެޗުގައި މީދޫގެ ފުރަތަމަ ލަނޑަކީ އެ ޓީމަށް ލިބުނު ޕެނަލްޓީއެއް ކާމިޔާބު ކޮށްގެން އިބްރާހިމް އިމްރާން (އިންމި) ޖެހި ލަނޑެކެވެ. ފުރަތަމަ ލަނޑު ޖެހިތާ އިރުކޮޅެއްގެ ތެރޭގައި އިންމި ވަނީ ދެ ވަނަ ލަނޑެއް ޖަހައި މީދޫ އަށް ނަތީޖާ ހަމަހަމަ ކޮށްދީފަ އެވެ. ނަމަވެސް ދެ ވަނަ ފަހަރަށް އައްޑޫ އިން މެޗުގައި ލީޑު ނެގީ އަލީ ނާފިޢު ޖެހި ލަނޑުންނެވެ. މެޗުގެ އިތުރު ވަގުތުގައި މީދޫ އަށް ލިބުނު ހިލޭ ޖެހުމެއްގައި ބޯޅަ ގޯލަށް ވައްދާލައިގެން އިންމި ނަތީޖާ ހަމަހަމަ ކުރިއިރު، އެ ލަނޑާ އެކު އޭނާ ވަނީ މެޗުގައި ހެޓްރިކް ވެސް ހަމަކޮށްފަ އެވެ.

އައްޑޫ އާއި މީދޫގެ އިތުރުން ދެން މި ގުރޫޕުގައި އޮތް އަނެއް ޓީމަކީ ޅ.ނައިފަރެވެ.