މި ސަރުކާރުން ސުޕްރީމް ކޯޓުގެ ބެންޗު ބަދަލުކޮށް ހުދުމުހުތާރު ވެރިކަމެއް ރާއްޖޭގައި ގާއިމްކުރާނެ - ރައީސް ޞާލިހް

ރައީސް ޑރ. މުހައްމަދު މުއިއްޒުގެ ސަރުކާރުގެ އަމާޒަކީ ހުދުމުހުތާރުވެރިކަމެއް ރާއްޖޭގައި ގާއިމްކުރެއްވުން ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް ޑރ. މުހައްމަދު މުއިއްޒުގެ ސަރުކާރަށް އަހަރެއް ވެގެންދިޔަ އިރު މި ސަރުކާރާއި ދޭތެރޭގައި ދެކޭގޮތް ބުނަން ވަރަށް ސާފުކަމަށެވެ. އެއީ މި ސަރުކާރުގެ އަމާޒަކީ ހުދުމުހުތާރު ވެރިކަމެއް ރާއްޖޭގައި އަލުން ގާއިމްކުރުން ކަމަށާއި، ބާރުތައް ގެންދަނީ އިންތިހާއަށް މުށުތެރެއަށް ލަމުން ކަމަށެވެ.

ރައީސް ޞާލިހުު ވިދާޅުވީ ގާނޫނު އަސާސީގެ 75 ވަނަ މާއްދާ އަދިވެސް އެބަ އޮތް ކަމަށެވެ. އަދި އެ މާއްދާގައި ބުނަނީ ރައްޔިތުންގެ މަޖިލީހުގެ މެންބަރުން އަމަލުކުރަންވާނީ ގައުމި މަސްލަހަތާއި ރައްޔިތުންގެ ލާބައާއި މަންފާއަށް އިސްކަންދީގެން ކަމަށެވެ. އަދި އެއްވެސް މެންބަރަކު އެމީހަކުގެ ހާއްސަ ގުޅުމެއް އޮތް އެހެން މީހެއްގެ ޒާތީ މަސްލަހަތެއް ކުރިއެރުވުމަށް މަގާމުގެ ބޭނުންކޮށްގެން ނުވާނެ ކަމަށެވެ.

މީގެ އިތުރުން އެމީހުން އިންތިހާބުވި ދާއިރާތައް ތަމްސީލުކުރުމުގައި މުޅި ގައުމާއި ހުރިހާ ރައްޔިތުންގެ ލާބައާއި މަންފާއަށް ރިއާޔަތްކުރަންވާނެ ކަމަށެވެ. ރައިސް ސާލިހު ވަނީ ގާނޫނު އަސާސީއަށް ގެނައި ބަދަލާއެކު މެންބަރުން މިފަދައިން މަސައްކަތް ކުރާނީ ކިހިނެއްތޯ ސުވާލު އުފައްދަވާފައެވެ.

ރައީސް ޞާލިހު ވިދާޅުވީ މި މައްސަލައާއެކު ސަރުކާރުން ދެން ފެނިގެންދާނީ ސުޕްރީމް ކޯޓުގެ ބެންޗު ބަދަލުކުރާތަން ކަމަށެވެ. އަދި އެކަން ނުކޮށް ހުއްޓާ ނުލާނެ ކަމަށާއި، ސަރުކާރުގެ ހަގީގީ ސިފަ ފެނިގެންދާނީ އޭރުން ކަމަށެވެ. އަދި އޭގެ ފަހުން މި ސަރުކާރުން ހުދުމުހުތާރުވެރިކަމެއް ރާއްޖޭގައި ކުރާތަން ފެނިގެންދާނެ ކަމަށެވެ.