ފައްޔާޒްގެ ވާހަކަތަކުން ޓެރަރިޒަމް އަށް މަގުފަހިވާކަމަށް ފާހަގަކޮށް އެ މައްސަލަ ބަަލަން އަބްދުއްރަހީމް ގޮވާލައްވައިފި
ރައްޔިތުންނަށް އަނިޔާވެރި ވާނަމަ ދިވެހިން އަމަލު ކުރާނީ ދިވެހި ތާރީހުގެ ފޮތްތަކުން ކަމަށް އެމްޑީޕީގެ ޗެއަރޕަރސަން ފައްޔާޒް އިސްމާއިލް ވަނީ ވިދާޅުވެފަ
އަބްދުއްރަހީމް އަބްދުﷲ ކުރިން ބޭއްވި އެއްވުމެއްގެ ބައިވެރިންނާއި އެއްކޮށް އިށީނދެލައިގެން
އަނިޔާވެރިކަމަށް ހިތްވަރު ލިބޭގޮތަށް އަދި ޓެރަރިޒަމް އަށް މަގުފަހިވާގޮތަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވާހަކަދައްވާފައިވާ ކަމަށާއި އެ މައްސަލަ ބަލަންޖެހޭނެ ކަމަށް ރައްޔިތުންގެ މަޖިލީހުގެ ރައީސް ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެ އެވެ.
އަބްދުއްރަހީމް އެފަދައިން ވިދާޅުވީ ހޯމަ ދުވަހު މީސްމީޑިއާގައި ކުރެއްވި ޕޯސްޓެއްގައެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ރައްޔިތުންނަށް އަނިޔާވެރި ވާނަމަ ދިވެހިން އަމަލު ކުރާނީ ދިވެހި ތާރީހުގެ ފޮތްތަކުން ކަމަށް އެމްޑީޕީގެ ޗެއަރޕަރސަން ފައްޔާޒް އިސްމާއިލް ވަނީ ވިދާޅުވެފައެވެ. ޤާނޫނުއަސާސީގެ ދިފާއުގައި ކުރިއަށްގެންދިޔަ ޖަލްސާ އެއްގައި ރައީސަށް ނިސްބަތްކޮށް ދެއްކި ވާހަކަތަކަކާއި ގުޅިގެން އީސީ އިން އެ ޕާޓީ އަށް ސިޓީ އެއް ފޮނުވާފައިވާތީ ނޫސްވެރިއަކު ކުރި ސުވާލަކަށް ޖަވާބުދެއްވަމުން އެމްޑީޕީ އަކީ އަނިޔާވެރިކަަމަށް ހިތްވަރުދޭ ޕާޓީ އެއް ނޫންކަމަށް ފައްޔާޒް ވިދާޅުވިއެވެ. ރައްޔިތުންނަށް ދެރަ ދިނީމަ ހަމަ މުހައްމަދު އަމީނަށް ހެދިހެން ހަދާނެ ކަމަށާއި އަނިޔާވެރިވާ ނަަމަ ދިވެހިން އަމަލުކުރާނީ ދިވެހިންގެ ތާރީހުގެ ފޮތްތަކުން ކަމަށާއި އެއީ މާ ހެޔޮ (ކައިންޑް) ތާރީހެއް ނޫންކަމަށް ފައްޔާޒް ވިދާޅުވިއެވެ. އެ މައްސަލަ ސީރިއަސް މައްސަލައެއްގެ ގޮތުގައި ކަމާބެހޭ މުވައްސަސާތަކުން ބަލަން ޖެހޭ ކަމަށް އަބްދުއްރަހީމް ވަނީ ވިދާޅުވެފައެވެ.
ރާއްޖޭގެ ފުރަތަމަ ރައީސް މުހައްމަދު އަމީންއަށް ވީގޮތް ރައީސް ޑރ. މުހައްމަދު މުއިއްޒުއަށް ވެދާނެ ކަމަށް ބުނެ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީން) އެކި އެކި ޕޯޑިއަމްތަކުގައި ވާހަކަ ދައްކާފައިވާތީ އެކަން ތަހުގީގު ކުރުމަށް ގޮވާލާ ކުއްލި މައްސަލަ އެއް މަޖިލީހަށް ވަނީ ހުށަހަޅާފައެވެ. އެ ކުއްލި މައްސަލަ މަޖިލީހަށް ހުށަހަޅުއްވާފައި ވަނީ މިލަންދޫ ދާއިރާގެ ސަރުކާރުގެ މެމްބަރު ޙަސަން މުފީދު ޢަބްދުލްޤާދިރެވެ.
އެ ކުއްލި މައްސަަލައިގައި ވަނީ ރައީސުލްޖުމްހޫރިއްޔާ ޑރ މުޙައްމަދު މުއިއްޒަކީ، ޖުމްހޫރިއްޔާގެ ޤާނޫނުއަސާސީގައިވާ ގޮތުގެ މަތިން ރައްޔިތުންގެ ތަނަވަސް އަޣްލަބިއްޔަތަކުން އިންތިޚާބު ކުރެވިފައިވާ ރާއްޖޭގެ ރައީސުލްޖުމްހޫރިއްޔާ ކަމަށް ވާއިރު ރައީސުލްޖުމްހޫރިއްޔާގެ މަޤާމު ނިމޭނެ ހާލަތު ޤާނޫނުއަސާސީގައި ކަނޑައެޅި ބަޔާންކޮށްފައިވާ ގޮތާ ޚިލާފަށް، ރައީސް މުއިއްޒަށް ހަދަން ޖެހޭނީ އަމީނަށް ހެދި ގޮތް ކަމަށް ފައްޔާޒް ވިދާލޅުވެފައިވާ ކަމަށެވެ. އެހެންކަމުން އެއީ ޓެރަރިޒަމްގެ އަމަލެއް ހިންގުމަށް ހިތްވަރުދިނުން ކަމަށް އެ ކުއްލި މައްސަލައިގައި ބުނެފައިވެއެވެ. ހަމައެހެންމެ އެމްޑީޕީން އެކި އެކި ޕޯޑިއަމްތަކުގައި ވާހަކަ ދައްކާފައިވާ ކަމަށާއި ޓެރަރިޒަމް މަނާ ކުރުމުގެ ޤާނޫނުގެ 8 ވަނަ މާއްދާގެ (ހ) ގައި ސީދާ ގޮތުން ނުވަތަ ނުސީދާގޮތުން ވިއަސް ޓެރަރިޒަމްގެ އަމަލެއް ކުރުމަށް ހިތްވަރު ދިނުމަކީ ކުށެއް ކަމަށް އެ މައްސަލައިގައި ބަޔާންކޮށްފައިވެއެވެ.
