ރޯދަމަހު ފެނާއި ކަރަންޓު ބިލުން ޑިސްކައުންޓް ލިބޭނެކަން އިއުލާން ކުރި ނަމަވެސް ރައްޔިތުން މާޔޫސްކަމުގައި!

ރާއްޖޭގެ ގިނަ ރައްޔިތުންތަކެއް ވޯޓުލައިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމަށް ގެންނެވީ ފޮނި އުންމީދާ އެކުއެވެ. ދިރިއުޅުމުގެ ހާލަތު އިތުރަށް ރަނގަޅުވެ، އާމްދަނީ އިތުރުވެ، އާއްމު ދިރިއުޅުމުގައި ބޭނުންކުރާ ތަކެތި އަގުހެޔޮވާނެ ކަަމަށް އުންމީދު ކޮށްގެންނެވެ. އަދި ރައްޔިތުންނަށް ލިބެމުންދިޔަ އަސާސީ ޚިދުމަތްތައް ލިބުމުގައި އެތައް ގުނައަކުން ފަސޭހަވެ، ހަރުދަނާ ޚިދުމަތްތަކެއް ލިބޭނެ ކަމަށް ގަބޫލުކުރި ރައްޔިތުން ގިނަވާނެ ކަމާމެދު ވެސް ޝައްކަތްނެތެވެ.

ނަމަވެސް ސަރުކާރަށް އަހަރު ވެގެން ދިޔައިރު، ގިނަ ރައްޔިތުން ތިބީ ނާއުންމީދު ވެފައެވެ. ރައްޔިތުންގެ ޝަކުވާ އިންތިހާއަށް ވަނީ ބޮޑުވެފައެވެ. ރައްޔިތުންނަށް ލިބެންޖެހޭ އަސާސީ ޚިދުމަތްތައް ލިބުމުގައި، އެ ޚިދުމަތްތައް ހޯދުމަށް ރައްޔިތުން މިއަދު ވަނީ ތަކުލީފުތައް އުފުލަންޖެހިފައެވެ. ޖީބަށްބަރުވެ، މީގެ ކުރިން ހިލޭ ލިބުނު ބޭހަށް މިއަދު ފައިސާ ދައްކަންޖެހޭ ކަމަށް ބައެއް މީހުންދަނީ ބުނަމުންނެވެ. އާސަންދަ ޚިދުމަތަށް އެއްވެސް ރުފިޔާއެއް ދައްކަން ނުޖެހޭނެ ކަމަށް ސަރުކާރުން ބުނަމުންދިޔަ ނަމަވެސް ފީ ދައްކާފައިވާ ގިނަ ސްލިޕްތަކާއެކު ގިނަ ބަޔަކު ދަނީ ސޯޝަލް މީޑިއާގައި އެކަމުގެ ކަންބޮޑުވުން ވެސް ފާޅު ކުރަމުންނެވެ.

މިމައްސަލަތަކުގެ އިތުރުން ދެން މިއަހަރުގެ ތެރޭގައި ރައްޔިތުންގެ އެންމެ ބޮޑު ޝަކުވާ އަކަށް ވެފައިވަނީ ބޭނުންނުކުރާ މިންވަރަށް ކަރަންޓާއި، ފެން ބިލު ބޮޑުވާ މައްސަލައެވެ. މިދިޔަ ރޯދަ މަހުގެ ތެރޭގައި ސަރުކާރުން ވަނީ ކަރަންޓު ބިލާއި ފެން ބިލަށް ޑިސްކައުންޓް ދީފައެވެ. ނަމަވެސް ފުރަތަމަ ބިލު އައިރު ކަރަންޓު ބިލާއި، ފެން ބިލް އިންތިހާއަށް ބޮޑުވެ، ގިނަ ބަޔަކު އެކަމުގެ ކަންބޮޑުވުން ފާޅު ކޮށްފައިވެއެވެ. އޭރު ވެސް ރައީސް މުއިއްޒު ވިދާޅުވެފައިވަނީ ކަރަންޓު ބިލާއި، ފެން ބިލު ރޯދަމަހު އެއް ހަމައެއްގައި ހިފެހެއްޓުމަށް ބިލް "ކެޕް" ކުރައްވާނެ ކަމަށެވެ. ނަމަވެސް ކަންކަން ހިނގާދިޔައީ ދިމާ އިދިކޮޅަށެވެ. ބައެއް ގޭބިސީތަކުގައި ރޯދަ މަހުގެ ބިލު ކުޑަވުމަށްފަހު ޖެހިގެން އައިމަހު ކަރަންޓު ފީ އަދި ފެން ބިލު ދެ ގުނަ ބޮޑުވެފައިވާ ކަމަށް ބައެއް މީހުން ބުނެފައިވެއެވެ. އަދި މިއީ ސަރުކާރު މެދުވެރިވެގެން ރައްޔިތުން ނިކަމެތި ކުރުމަށް ކުންފުނިތަކުން ކުރާ ކަމެއް ކަމަށް ބައެއް މީހުން ތުހުމަތުކޮށްފައިވެއެވެ.

މިމައްސަލަ އިންތިހާއަށް ބޮޑުވުމާއި ގުޅިގެން 03 އޯގަސްޓް 2024 ގައި ބޭއްވި ނޫސްވެރިންގެ ބައްދަލުވުމުގައި ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެފައިވަނީ މާލެސިޓީގެ 21 ޕަސެންޓު ގޭބިސީތަކުގެ ކަރަންޓް ބިލު ގަބޫލުނުކުރެވޭ ވަރަށް ބޮޑުވެފައިވާ ކަމަށާއި، ހަކަތާގެ އޮޑިޓެއް ހަދަން ނިންމާފައިވާ ކަމަށެވެ. ނަމަވެސް މިއަދާ ހަމައަށް އާއިރުވެސް، މިކަމުގެ އިތުރު މައުލޫމާތެއް ލިބިފައެއްނުވެއެވެ. އެހެންކަމުން ބިލު ކުރުމުގައި މައްސަލަތަކެއް އުޅޭކަން މިވަނީ ހާމަވެގެން ގޮސްފައެވެ.

މައްސަލަ މިހިސާބުގައި އޮތްއިރު އަނެއްކާ ވެސް ރައީސް މުއިއްޒު މިވަނީ 8 ޑިސެންބަރުގައި މަތިވެރިއަށް ވަޑައިގަންނަވައި، އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ކުރިއަށް އޮތް ރޯދަ މަހު ކަރަންޓު ބިލާއި ފެން ބިލުން ޑިސްކައުންޓް ދިނުމަށް ނިންމައި، އެކަން އިއުލާން ކުރައްވާފައެވެ. އެއީ މިދިޔަ އަހަރު ވެސް ރައްޔިތުންނަށް ލިބުނު ލުޔެއްކަން އެމަނިކުފާނު ފާހަގަކުރެއްވިއެވެ. އަދި ކުރިއަށް އޮތް ރޯދަ މަހު ވެސް ކޮންމެ ގޭބިސީއަކަށް ހިލޭ މަސް ދަޅު ކޭހެއް ލިބޭނެ ކަމަށް ވެސް ރައީސް މުއިއްޒު ވިދާޅުވެފައިވެއެވެ. މިދިޔަ ރޯދަމަހު ވެސް ރާއްޖޭގެ ރައްޔިތުންނަށް ރޯދަ ހަދިޔާގެ ގޮތުގައި 10 ކިލޯ ފުށާއި 10 ކިލޯ ހަނޑޫ ދޫކޮށްފައިވެއެވެ.

ނަމަވެސް ރައީސް މުއިއްޒުގެ މި ނިންމެވުމާއެކު ބައެއް ރައްޔިތުން ތިބީ މިއަދު އުފާވާން ނޭނގިފައެވެ. އެއީ މިދިޔަ ރޯދަ މަހުގެ ބިލު ކުޑަވުމަށްފަހު މިއަހަރުގެ ގިނަ މަސްތަކުގައި ލިބުނު ބިލުތައް އިންތިހާއަށް ބޮޑުވެފައިވާތީއެވެ. ޝަކުވާ އިންތިހާއަށް ކުރި ނަމަވެސް މިމައްސަލައަށް ހައްލެއް ލިބިފައެއްނުވެއެވެ. ހަގީގަތުގައި ވެސް ކަރަންޓު ބިލާއި، ފެން ބިލު ކުޑަވެ، އާއްމުކޮށް ރައްޔިތުން ކެއުން ބުއިމަށް ބޭނުންކުރާ ބާވަތްތައް އަގުހެޔޮވެއްޖެ ކަމަށްވާނަމަ ރައްޔިތުންގެ ދިރިއުޅުން ފަސޭހަވެ، ތިޔާގިވާނެއެވެ. ރައްޔިތުން އުފާ ވެސް ވާނެއެވެ. ނަމަވެސް އެއާ ހިލާފަށް ރޯދަމަހުގެ ބިލު ކުޑަވުމަށްފަހު އަހަރުގެ އެހެން މަސްތަކުގައި އަންނަ ބިލުތައް އެތައް ގުނައަކުން ބޮޑުވެ، ކާބޯތަކެތި އަގުބޮޑުވެގެންދާނަމަ ރައްޔިތުންގެ ދިރިއުޅުން ބިކަވެ ހަނާވުން ނޫން ކަމެއް ނުވާނެއެވެ.