ދުންފަތުގެ އިސްތިއުމާލު ކުރުން ހުއްޓާލަން ބޭނުންވާ ފަރާތްތަކަށް އާސަންދައިން ފަރުވާ ލިބޭނެ: މިނިސްޓަރު ނާޒިމް

ދުންފަތުގެ އިސްތިއުމާލު ކުރުން ހުއްޓާލަން ބޭނުންވާ ފަރާތްތަކަށް ދެވޭ ސެޒޭޝަންގެ ފަރުވާ ނިކޮޓިން ރިޕްލޭސްމެންޓް ތެރަޕީ ( އެން.އާރް.ޓީ) އާސަންދަ މެދުވެރިކޮށް ފޯރުކޮށްދޭނެ ކަމަށް ހެލްތް މިނިސްޓަރު އަހުމަދު ނާޒިމް ވިދާޅުވެއްޖެއެވެ.

ބުރާސްފަތި ދުވަހު ހެލްތް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ނާޒިމް ވިދާޅުވީ ދުންފަތުގެ އިސްތިއުމާލު ކުރުމަށް އާދަވެފައިވާ ފަރާތްތަކަށް އެކަން ހުއްޓާލުމަށް ބޭނުންވާ އެހީތެރިކަން މުޅި ރާއްޖޭގައި ލިބޭނެހެން ސެޒޭޝަންގެ ޚިދުމަތް ގާއިމްކުރުމަށް ކެބިނެޓުން ވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންވަމާފައިވާ ކަމަށެވެ.

މިނިސްޓަރު ނާޒިމް ވިދާޅުވީ ޚިދުމަތް ދިނުމަށް ބޭނުންވާ މީހުން ތަމްރީން ކުރުމުގެ މަސައްކަތްތައް ކުރިއަށްދާ ކަމަށާއި، މިހާތަނަށް 240 މީހުން ތަމްރީން ކުރެވިފައިވާ ކަމަށެވެ.

މީގެ އިތުރުން މިނިސްޓަރު ނާޒިމް ވިދާޅުވީ ދުންފަތުގެ އިސްތިއުމާލު ކުރުމުގެ އާދައިން ދުރުހެލިވުމަށް އެދޭ ފަރާތްތަކަށް އެހީތެރިވުމުގެ ގޮތުން ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން ކުއިޓް ލައިންއެއް ގާއިމްކޮށްފައިވާ ކަމަށާއި، ނަންބަރަކީ 1676 ކަމަށެވެ. އަދި އަންނަ އާދިއްތަ ދުވަހުން ފެށިގެން 24 ގަޑީއިރު ޚިދުމަތް ލިބޭނެ ކަމަށް މިނިސްޓަރު ނާޒިމް ވިދާޅުވިއެވެ.

ދުންފަތް ކޮންޓްރޯލް ކުރަން ރާއްޖޭގައި ކުރަންޖެހޭ އެންމެހައި މަސައްކަތްތައް ރޭވުންތެރިކަމާއި އަދި ނަތީޖާ ލިބޭނެ ދެމެހެއްޓެނިވި ގޮތެއްގައި ކުރިއަށް ގެންދިއުމަށް މަސައްކަތް ކުރާކަން ފާހަގަކުރައްވައި މިނިސްޓަރު ނާޒިމް ވިދާޅުވީ 5 އަހަރު ދުވަހުގެ ޕްލޭނެއް އެކުލަވާލުމުގެ މަސައްކަތް ޑަބްލިޔުއެޗްއޯގެ އެހީތެރިކަމާއެކު މިހާރު ކުރިއަށް ގެންދާ ކަމަށެވެ. އަދި މި ޕްލޭން އެކުލަވާލުމުގައި ކަމާބެހޭ އިދާރާތަކުގެ އިތުރުން ރައްޔިތުންގެ ހިޔާލާ، ބައިވެރިވުމާއެކު، މަޝްވަރާ ހޯދުމަށް ކުރަންޖެހޭ މަސައްކަތްތައް ހެލްތް މިނިސްޓްރީން ކުރިއަށް ގެންދާ ކަމަށް މިނިސްޓަރު ނާޒިމް ވިދާޅުވިއެވެ.