އިނގިރޭސި ޕްރިމިއާ ލީގުގައި މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުން މޮޅުވެ، އާސެނަލް އިން ތިން ވަނައިގައި ހިފަހައްޓައިފި އެވެ.

އާސެނަލްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގައި އާސެނަލް އިން އެ ޓީމުގެ ދެ ލަނޑު ވެސް ޖެހީ ދެ ވަނަ ހާފުގަ އެވެ. ފުރަތަމަ ހާފުގައި ލަނޑު ޖަހާނެ ފުރުސަތު ލިބުނު ނަމަވެސް، ފުރުސަތުގެ ބޭނުން ކުރެވޭ ގޮތެއް ނުވި އެވެ.

މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި އާސެނަލަށް ލީޑު ނަގައިދިނީ ޖޫލިއެން ޓިމްބާ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ޑެކްލަން ރައިސް އެވެ. އޭގެ ފަހުން މެޗުގެ 73 ވަނަ މިނެޓުގައި އާސެނަލްގެ ދެ ވަނަ ލަނޑު ޖެހީ ވިލިއަމް ސަލީބާ އެވެ. އެއީ ތޯމަސް ޕާޓޭ ތަނަވަސްކޮށްދިން ފުރުސަތެއްގައި ސަލީބާ ޖެހި ލަނޑެކެވެ.

މޮޅާއެކު އާސެނަލް ތިން ވަނައިގައި އޮތީ މިހާތަނަށް އެ ޓީމު ކުޅެފައިވާ 14 މެޗުން 28 ޕޮއިންޓާ އެކު އެވެ. ހަމަ އެ އަަދަދަށް މެޗު ކުޅެގެން ދެ ވަނައިގައި އޮތް ޗެލްސީ އަށް ވެސް ލިބެނީ 28 ޕޮއިންޓެވެ. ދެ ޓީމު ޕޮއިންޓުގެ ގޮތުން އެއްވަރުވެފައިވާއިރު، ޗެލްސީ ކުރި ހޯދަނީ ލަނޑުގެ ގޮތުންނެވެ.