ވޯޓާރ ތީމް ޕާކުގެ އަމަލީ މަސައްކަތްތައް ކުރިއަށް އޮތް އަހަރުގެ ތެރޭގައި ފަށާނަން: ފަޒުލް
4 ޑިސެމްބަރު 2024 | ބުދަ 14:05ޑިޒައިން ކުރުމުގެ މަސައްކަތްތައް ލަންކާގެ ކުންފުންޏަކާއެކު ސޮއިކުރެވި މަސައްކަތްތައް ކުރިއަށްދޭ
ބުދަ ދުވަހު ކުރިއަށް ގެންދިޔަ މާލިއްޔަތު ކޮމެޓީގައި އެޗްޑީސީގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވާހަކަދައްކަވަނީ
ހުޅުމާލޭގައި ގާއިމްކުރާ ވޯޓަރ ތީމް ޕާކުގެ އަމަލީ މަސައްކަތްތައް ކުރިއަށް އޮތް އަހަރުގެ ތެރޭގައި ފަށާނެ ކަމަށް ހައުސިން ޑިވަލޮޕްމަންޓް ކޯޕްރޭޝަން (އެޗްޑީސީ)ގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ.
ބުދަ ދުވަހު ކުރިއަށް ގެންދިޔަ މާލިއްޔަތު ކޮމެޓީގައި ފަޒުލް ވިދާޅުވީ ހުޅުމާލޭގައި ގާއިމްކުރާ ވޯޓަރ ތީމް ޕާކުގެ މައްސަލައަކީ ޒަމާންވީ ބޮޑު މައްސަލައެއް ކަމަށާއި، ހުޅުމާލޭގެ ބޮޑު ސަރަހައްދެއްގެ ބޭނުން ނުކުރެވި އޮތް ކަމަށެވެ.
އެސަރަހައްދު ތަރައްގީ ކުރުމުގެ މަސައްކަތްތައް ފަށާފައިވާކަން ފާހަގަކުރައްވައި ފަޒުލް ވިދާޅުވީ ވޯޓަރ ތީމް ޕާކާއެކު، ކުޑަ ކުދިން ކުޅޭ ގޯކާޓް ފެސިލިޓީ، ރޭސިން ޓްރެކް އަދި އެހެނިހެން ވަސީލަތްތައް އެތަނުގައި ގާއިމްކުރާނެ ކަމަށެވެ. އަދި އެސަރަހައްދު ހިއްކާނެ ކަމަށެވެ.
އެގޮތުން ޕްލޭން އެކުލަވާލެވި، ޑިޒައިން ކުރުމުގެ މަސައްކަތްތައް ލަންކާގެ ކުންފުންޏަކާއެކު ސޮއިކުރެވި މަސައްކަތްތައް ކުރިއަށްދާ ކަމަށް ފަޒުލް ވިދާޅުވިއެވެ. ނަމަވެސް އެކުންފުނީގެ ނަމެއް ހިއްސާކޮށްފައިނުވެއެވެ.
ފަޒުލް ވިދާޅުވީ ވޯޓަރ ޕާކު ތަރައްގީ ކުރުމަށް އެންމެ ފުރަތަމަ ހަވާލުކުރި ކުންފުންޏާއެކު އެއްބަސްވުން ބާތިލްކޮށްފައިވާ ކަމަށެވެ. އެޗްޑީސީއަށް ބޮޑެތި ގެއްލުންތަކެއް ލިބިފައިވާ ކަމަށާއި، އެކުންފުނިން ވެސް އިންވެސްޓް ކުރި ފައިސާ ހޯދުމަށް ސިޓީތަކެއް ފޮނުވާފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ މިމައްސަލަ ހައްލު ކުރާނީ ކޯޓު މެދުވެރިކޮށް ކަމަށެވެ.
އެއްގަމާއި މޫދުގައި ފެނުގައި ގިނަ ކުޅިވަރުތައް ކުޅެވޭގޮތަށް ރާއްޖޭގައި ފުރަތަމަ ފަހަރަށް ތަރައްގީކުރާ މި ޕާކަކީ، ކުރީގެ ރައީސް އަބްދުﷲ ޔާމީންގެ ވެރިކަމުގައި 2017 ވަނަ އަހަރު ފެށި މަޝްރޫއެކެވެ. ވޯޓާ ތީމް ޕާކުގެ މަސައްކަތް ސަރުކާރުން އޭރު ހަވާލުކުރީ މެލޭޝިޔާގެ މިރި ހައުސިންގ ޑިވެލޮޕްމަންޓް ކުންފުންޏާއެވެ. ގާތްގަނޑަކަށް 35 މިލިއަން ޑޮލަރު (385.5 މިލިއަން ރުފިޔާ) ޚަރަދުކޮށްގެން ކުރިއަށްގެންދާ މި މަޝްރޫއުގެ އަމަލީ މަސައްކަތް ފެށިނަމަވެސް، އެންމެ އެދެވޭގޮތެއްގައި މަސައްކަތް ކުރިއަށް ގޮސްފައެއް ނުވެއެވެ.
