ޖަރުމަނު ކަޕްގެ ގަދަ 16 ވަނަ ބުރުގައި އެންމެ ފަހުގެ ޗެމްޕިއަން ބަޔާ ލެވަކޫސަންއާ ދެކޮޅަށް ކުޅުނު މެޗުން ބަލިވެ، ބަޔާން މިއުނިކް މުބާރާތުން ކަޓައިފި އެވެ.

ބަޔާން އަމިއްލަ ދަނޑު، އަލިއާންޒް އެރީނާގައި އަންގާރަ ދުވަހުގެ ރޭ ކުޅުނު މެޗު ލެވަކޫސަން އިން ކާމިޔާބު ކުރީ 1-0 އިންނެވެ. މެޗުގައި ލެވަކޫސަން އިން ލަނޑު ޖެހީ ވެސް ދެ ވަނަ ހާފުގަ އެވެ.

މެޗުގައި ބަޔާނަށް އެންމެ ބޮޑު ގެއްލުމެއް ދެއްކީ މެޗު ފަށައިގެން އެންމެ 17 މިނެޓުގެ ތެރޭގައި އެ ޓީމުގެ ގޯލު ކީޕަރު، ޖަރުމަނުގެ މެނުއަލް ނޯޔާ އަށް ސީދާ ރަތް ކާޑު ދައްކައި ދަނޑުން ފޮނުވާލުމުންނެވެ. އެއީ ބަޔާންގެ އޭރިޔާ ބޭރުން ލެވަކޫސަންގެ ޖެރެމީ ފްރިމްޕޮން އަށް ކުރި ފައުލަކަށް ދެއްކި ރަތް ކާޑެކެވެ. މިއީ ނޯޔާގެ ފުޓުބޯޅަ ކެރިއަރުގައި އޭނާ އަށް ދެއްކި ފުރަތަމަ ރަތް ކާޑެވެ.

މެޗުގައި އެއް ކުޅުންތެރިޔަކު މަދުކޮށް ކުޅެމުން ދިޔަ ބަޔާންގެ ކޮޅަށް ލެވަކޫސަން އިން ލަނޑު ޖަހާފައި ވަނީ 69 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ މެޗުގައި ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ނެތަން ޓެލާ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އެލެކްސް ގްރިމާލްޑޯ އެވެ.

މި ސީޒަންގެ ޖަރުމަނު ލީގުގައި ވެސް ރަނގަޅު ނަތީޖާތަކެއް ނެރެމުން އަންނަ ބަޔާން އަކީ، ޖަރުމަނު ކަޕްގެ އެންމެ ކާމިޔާބު ޓީމެވެ. ބަޔާނުން ވަނީ 20 ފަހަރު ޖަރުމަނު ކަޕް ކާމިޔާބު ކޮށްފަ އެވެ. ބަޔާންގެ މައްޗަށް ކުރި ހޯދި އެންމެ ފަހުގެ ޗެމްޕިއަން ލެވަކޫސަން އިން ވަނީ ދެ ފަހަރު ޖަރުމަނު ކަޕް ކާމިޔާބު ކޮށްފަ އެވެ.