ޑޮލަރު މާރުކުރުމުގެ ގަވައިދާ އެކު ރާއްޖޭގައި މަސައްކަތް ކުރާ ފެންވަރު ރަނގަޅު ޑޮކްޓަރުން ރާއްޖެ ދޫކޮށް ދިއުމުގެ ބިރު ބޮޑުވެއްޖެ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަލަށް ތައާރަފް ކުރި ޑޮލަރު މާރުކުރުމުގެ ގަވައިދާ އެކު ރާއްޖޭގައި މަސައްކަތް ކުރާ ބޭރުގެ ފެންވަރު ރަނގަޅު ޑޮކްޓަރުން ރާއްޖެ ދޫކޮށް ދިއުމުގެ ބިރު ބޮޑުވެއްޖެއެވެ.

އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ރާއްޖޭގައި ހިންގާ އެންމެ ބޮޑު އެއް ޕްރައިވެޓް ހޮސްޕިޓަލު ކަމުގައިވާ ޓްރީޓޮޕް ހޮސްޕިޓަލުގައި މަސައްކަތް ކުރާ ބޭރުގެ ޑޮކްޓަރުންނަށް ޑޮލަރުން މުސާރަ ދިނުން ނިމުމަކަށް ގެނައި ކަމަށް އެފަރާތްތަކަށް ވަނީ އަންގާފައެވެ.

މައުލޫމާތު ލިބިފައިވާ ގޮތުގައި ރާއްޖޭގައި މަސައްކަތް ކުރާ ގިނަ ބޭރުގެ ޑޮކްޓަރުންނާ އެކު ހޮސްޕިޓަލުން ހަދާފައިވާ ކޮންޓްރެކްޓްގައި މުސާރަ ދޭނީ ޑޮލަރުން ކަމަށް ވަނީ ކަނޑައަޅާފައެވެ.

"ސަރުކާރުން ތައާރުފް ކުރި ޑޮލަރު މާރު ކުރުމުގެ ގަވައިދުގެ ސަބަބުން، ހޮސްޕިޓަލު ހިންގާ ފަރާތްތަކުން މިހާރު ބުނެފައިވަނީ މުސާރަ ދޭން ޑޮލަރު ނުލިބޭނެ ކަމަށް، އެއީ އެމްއެމްއޭ އިން އަންގާފައިވާ އުސޫލުން ޑޮލަރު މާރު ކުރީމާ ޑޮލަރު ނުހުންނާނެ ކަމަށް ބުނަނީ،" ނަން ނުޖެހުމަށް ޝަރުތު ކޮށް ހޮސްޕިޓަލުން ވާހަކަ ދެއްކި އޮފިޝަލަކު ވިދާޅުވިއެވެ.

އޭނާ އިތުރަށް ވިދާޅުވި ގޮތުގައި ރުފިޔާ އިން މުސާރަ ދޭ އިރު މުސާރަ ހިސާބު ކުރަން ޖެހެނީ އެމްއެމްއޭ ރޭޓުން ކަމަށް ވުމާއެކު އެއީ ވެސް ޑޮލަރުން މުސާރަ ދޭ މުވައްޒަފުންގެ ޝަކުވާ އެއް ކަމަށެވެ.

"ޕްރެފެޝަނަލް ބޭފުޅުން ބޭނުމެއް ނުވާނެ ކަޅު ބާޒާރުން ޑޮލަރު ގަންނަން ތަންތަނަށް ދާކަށް، އެހެން ނަމަވެސް ރަސްމީ ރޭޓެއް އޮއްވާ އަޅުގަނޑުމެންނަކަށް އެނޫން ރޭޓަކުން މުސާރަ ކަލްކިއުލޭޓެއްވެސް ނުކުރެވޭނެ؛" އޭނާ ވިދާޅުވިއެވެ.

މައްސަލަ ހައްލު ކުރުމަށް އެމްއެމްއޭ އަށް ހޮސްޕިޓަލުގެ ފަރާތުން ސިޓީ އަކުން ދެންނެވި ކަމަށާއި އެހެން ނަމަވެސް އެދެވޭ ޖަވާބެއް އެމްއެމްއޭ އިން ދީފައި ނުވާކަން އޭނާ ފާހަގަ ކުރެއްވިއެވެ.

މި ނޫހަށް އެނގިފައިވާ ގޮތުގައި ޓްރީޓޮޕް ހޮސްޕިޓަލުގައި މަސައްކަތް ކުރާ ޑޮލަރުން މުސާރަ ދޭ ޕްރޮފެޝަނަލުންނަށް މުސާރަ ދިނުމުގެ ސިޔާސަތައް މިއައި ބަދަލު މިހާރު ވަނީ ސިޓީ އަކުން އަންގާފައެވެ.

"ވަރަށް ގިނަ ޑޮކްޓަރުންގެ ހިތްހަމަ ނުޖެހުން އެބައޮތް، ޝަކުވާވެސް އެބަ ކުރޭ؛" ޓްރީޓޮޕްގެ އޮފިޝަލް ވިދާޅުވިއެވެ.

ޑޮލަރުން މުސާރަ ކަނޑައަޅާފައިވާ ފަރާތްތަކަށް އެމްއެމްއޭ ރޭޓުން ރުފިޔާ އަށް ބަދަލު ކުރުމުން، ކަޅު ބާޒާރުން ޑޮލަރު ގަންނަ ނަމަ، ދެތިން ހާސް ރުފިޔާގެ ގެއްލުމެއް އެފަރާތްތަކަށް ވާނެ ކަން ފާހަގަ ކުރެވެއެވެ.

ޓްރީޓޮޕް ހޮސްޕިޓަލަކީ ސަރަހައްދީ ޑޮކްޓަރުންގެ އިތުރުން ޔޫރަޕް އަށް ނިސްބަތްވާ ޑޮކްޓަރުންވެސް މަސައްކަތް ކުރާ ހޮސްޕިޓަލެކެވެ.

މުސާރައިގެ ޕޮލިސީ އަށް މިއައި ބަދަލާ ގުޅިގެން ފެންވަރު ރަނގަޅު ޑޮކްޓަރުން ރާއްޖެ ދޫކޮށް ހިނގައިދާނެތޯ ދެންނެވުމުން، ޓްރީޓޮޕް ގެ އޮފިޝަލް ވިދާޅުވީ، މިކަމަށް ހައްލެއް ނުހޯދިއްޖެ ނަމަ މިއަށްވުރެ ފަހިކޮށް ކަންކަން ހަމަ ޖެހިފައިވާ އެހެން ގައުމުތަކަށް އެމީހުން ދިއުމަކީ ވެސް އެކަށީގެންވާ ކަމެއް ކަމުގައެވެ.

މި ނޫހަށް މައުލޫމާތު ލިބިފައިވާ ގޮތުގައި ޓްރީޓޮޕް ހިންގާ ކުންފުނީގެ ހިއްސާދާރުންނަކީ ފަތުރުވެރިކަމުގެ ދާއިރާގެ ބޭފުޅުންނެވެ. އެމްއެމްއޭ އިން ޑޮލަރު މާރު ކުރުމުގެ ގަވައިދު އާންމު ކުރުމާއެކު ކުރިން އެފަރާތްތަކުން ހޮސްޕިޓަލް ހިންގުމަށް ޑޮލަރުން ވަމުން އައި ހިއްސާ އެގޮތައް ކުރިއަށް ގެންދެވެން ނެތް ކަން މިހާރު ވަނީ ހޮސްޕިޓަލުގެ މެނޭޖްމަންޓަށް އަންގާފައެވެ.

އެނެއްކޮޅުން ރާޢްޖޭގައި މަސައްކަތް ކުރާ އިންޑިއާގެ މަސައްކަތްތެރިންނަށް އެމީހުންގެ މުސާރަ ގައުމަށް ފޮނުވުމަށް ބޭނުންވާ ޑޮލަރު ގަންނަން ނުލިބޭ މައްސަލަ ރާއްޖޭގައި ހުންނަ އިންޑިއާގެ ހައިކޮމިޝަނުން އެމްއެމްއޭ އަށް ވަނީ ހުށަހަޅާފައެވެ. މައުލޫމާތު ލިބިފައިވާ ގޮތުން ހައިކޮމިޝަނުން އެދިފައިވަނީ މަސައްކަތްތެރިންނަށް ބޭނުންވާ ޑޮލަރު ގަތުމަށް ބޭނުންވާ މިންވަރު ބޭންކު ތަކަށް ޑޮލަރު ދޫކުރުމުގައި އެމްއެމްއޭ އިން އިތުރު ކޮށްދިނުމަށެވެ.