ސިޓީ ބަލިކޮށް، ލިވަޕޫލަށް ނުވަ ޕޮއިންޓުގެ ލީޑެއް

އިނގިރޭސި ޕްރިމިއާ ލީގުގައި ޗެމްޕިއަން މެންޗެސްޓަރ ސިޓީއާ ދެކޮޅަށް ކުޅުނު މެޗުން މޮޅުވެ، ލިވަޕޫލް އިން އެއް ވަަނައިގައި ބޮޑު ލީޑެއް ނަގައިފި އެވެ.

ލިވަޕޫލްގެ އަމިއްލަ ދަނޑު، އެންފީލްޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ލިވަޕޫލް އިން އެއް ލަނޑު ޖެހިއިރު، ފަހު ހާފުގައި ވަނީ އަނެއް ލަނޑު ޖަހައިފަ އެވެ.

މިވަގުތު ނަތީޖާތައް ދަށްވެ، ޕްރެޝަރުގައި އޮތް ސިޓީ ކޮޅަށް ލިވަޕޫލް އިން ވަނީ މެޗު ފަށައިގެން 12 ވަނަ މިނެޓުގައި ލަނޑު ޖަހައި ލީޑު ނަގައިފަ އެވެ. މިޞްރުގެ ފޯވާޑު މުޙައްމަދު ޞަލާޙު ތަނަވަސްކޮށްދިން ފުރުސަތެއްގައި އެ ލަނޑު ލިވަޕޫލަށް ޖަހައިދިނީ ކޯޑީ ގަކްޕޯ އެވެ. މެޗުގައި ލިވަޕޫލްގެ ދެ ވަނަ ލަނޑަކީ އެ ޓީމަށް ލިބުނު ޕެނަލްޓީއެއް ކާމިޔާބުކޮށްގެން ޞަލާޙު ޖެހި ލަނޑެކެވެ. އެއީ ލިވަޕޫލްގެ ލުއިސް ޑިއާޒް އަށް، ސިޓީގެ އޭރިޔާ ތެރެއިން ކުރި ފައުލަކާ ގުޅިގެން ދިން ޕެނަލްޓީ އެކެވެ.

މޮޅާއެކު ލިވަޕޫލް އެއް ވަނައިގައި އޮތީ ނުވަ ޕޮއިންޓުގެ ލީޑަކުންނެވެ. މިހާތަނަށް ކުޅުނު 13 މެޗުން ލިވަޕޫލަށް ލިބެނީ 34 ޕޮއިންޓެވެ. ބައްޔާ އެކު ސިޓީ ވަނީ ލީގުގެ ފަސް ވަނަ އަށް ވެއްޓިފަ އެވެ. 13 މެޗުން އެ ޓީމަށް ލިބެނީ 23 ޕޮއިންޓެވެ. މިފަހުން ސިޓީގެ ނަތީޖާތައް ދަށްވެފައިވާއިރު، އެންމެ ފަހުން އެ ޓީމު ކުޅުނު ހަތް މެޗު ވެސް ނިންމާލަން ޖެހުނީ މޮޅެއް ނުހޯދި އެވެ. އަދި ލީގުގައި އެންމެ ފަހުން ކުޅުނު ހަަތަރު މެޗުން ވެސް ސިޓީ ވަނީ ބަލިވެފަ އެވެ.