ކުރިއަށް އޮތް ދެ ދުވަހު މޫސުން ގޯސްވާނެ

ކުރިއަށް އޮތް ދެ ދުވަހު ރާއްޖޭގެ މޫސުން ގޯސްވެ، ވައި ގަދަވެ، ކަނޑުތައްވެސް ގަދަވާނެކަމަށް މޫސުމާބެހޭ ޤައުމީ އިދާރާއިން ބުނެފިއެވެ.

މޫސުމާބެހޭ އިދާރާއިން ބުނީ މި ވިއްސާރައިގައި އެންމެ ބޮޑަށް ގަދަވާނީ ރާއްޖޭގެ ދެކުނުގެ އަތޮޅުތަކަށް ކަމަށެވެ. އަދި ކުރިއަށް އޮތް 24 ގަޑިއިރުގައިވެސް ރާއްޖޭގެ ބޮޑުބަޔަކަށް ވިއްސާރަކޮށް، ގުގުރުން އެކަށީގެންވާ ކަމަށް އެ އިދާރާއިން ބުންޏެވެ.

މި ވިއްސާރައަކީ ރާއްޖޭގެ ސަރަހައްދުގައި އުފެދިފައިވާ ބާރުގަދަ ކޮޅިގަނޑެއް ތޫފާނަކަށް ބަދަލުވުމާ ގުޅިގެން ކުރަމުންދާ ވިއްސާރައެކެވެ. މި ތޫފާން މިހާރު ދަތުރު ކުރަމުން ދަނީ އިންޑިއާގެ ޓަމިލްނާޑޫގެ އައްސާރިފަށާ ދިމާލަށެވެ.

މޫސުމާބެހޭ އިދާރާއިން ލަފާކުރާ ގޮތުގައި، އެވްރެޖުކޮށް މެދު ރާއްޖެތެރެއަށް 13 މޭލާއި 23 މޭލާ ދެމެދު ވައިޖެހޭނެއެވެ. އަދި ދެކުނުގެ އަތޮޅުތަކަށް 15 މޭލާއި 25 މޭލާ ދެމެދު ވައިޖެހޭނެ ކަމަށް ލަފާކުރެވެއެވެ. ވިލާގަނޑުގައި ގަޑިއަކު ގާތްގަނޑަކަށް 45 މޭލަށް ވައި ގަދަވުން އެކަށީގެންވާ ކަމަށްވެސް އެ އިދާރާއިން ބުނެފައިވެއެވެ.

މީގެ އިތުރުން، ރާޅުގެ އުސްމިން 4 އާއި 7 ފޫޓާ ދެމެދުގައި ހުންނާނެ ކަމަށް ލަފާކުރެވެއެވެ. މޫސުން ގޯސްވުމާ ގުޅިގެން ހުރިހާ ފަރާތްތަކުން ވެސް އިތުރަށް ސަމާލުވުމަށް މޫސުމާބެހޭ އިދާރާއިން އިލްތިމާސް ކޮށްފައިވެއެވެ.