އޮކްޓޯބަރު މަހު ބާއްވަން އިއުލާންކުރި އޯލެވެލް ގަދަ-10ގެ ޖަލްސާ ވާނުވާގައި، މިނިސްޓަރުގެ ބަހެއް ނެތް!

ކޮންމެ އަހަރަކު ވެސް ގިނަ ބަޔަކު އިންތިޒާރު ކުރަމުންދާ އެއް ޖަލްސާއަކީ އޯލެވެލް ނިންމައި ގަދަ 10 ގައި ހިމެނުނު ދަރިވަރުންނަށް އިނާމު ދިނުމަށް ބާއްވާ ޚާއްސަ ޖަލްސާއެވެ. އެޖަލްސާއަށް ބެލެނިވެރިންނާއި، ދަރިވަރުންނަށް ވަރަށް އުފަލާއެކު ވަރަށް ކުރީ ބައިގައި ތައްޔާރުވެއެވެ. ނަމަވެސް މިއަހަރުގެ މިޖަލްސާ ސަރުކާރުން މިވަނީ އޮޅުވާލާފައެވެ.

އެޑިޔުކޭޝަން މިނިސްޓްރީން ވަނީ 12 ސެޕްޓެމްބަރު 2024 ގައި ބޭއްވި އޭލެވެލް ޓޮޕް 10 ޖަލްސާގައި އޯލެވެލްއިން 1 ވަނަ ލިބުނު ދަރިވަރުންނަށް އިނާމު ދީފައެވެ. އެކަން ބައެއް ބެލެނިވެރިން ރާއްޖެއެމްވީއަށް ވަނީ ކަށަވަރު ވެސް ކޮށްދީފައެވެ. އެދުވަސްވަރު މިމައްސަލަ ބޮޑުވުމާއި ގުޅިގެން އެޑިޔުކޭޝަން މިނިސްޓަރު ޑރ.އިސްމާއީލް ޝަފީއު ވަނީ މިކަން ދޮގު ކުރައްވާފައެވެ. އަދި އޭރު ވިދާޅުވީ އޭލެވެލް އަދި އޯލެވެލް އިމްތިހާނުން އެންމެ ރަނގަޅު ނަތީޖާ ހޯދި ދަރިވަރުންނަށް އިނާމު ދިނުމަށް ބާއްވާ ޓޮޕް-10 ޖަލްސާއާ ގުޅޭގޮތުން ރަނގަޅު ނޫން މައުލޫމާތު ނުފެތުރުމަށެވެ.

ޖީސީއޯ އޯލެވެލް އިމްހާނުތަކުން އެކިއެކި ވަނަތައް ހާސިލް ކުރި ދަރިވަރުންގެ ކާމިޔާބީތައް ފާހަގަނުކުރާނެ ވާހަކަތަކަށް ވެސް މިނިސްޓަރު ޝަފީއު ވަނީ ރައްދު ދެއްވާފައެވެ. މަތީ އަރުތަވެރިންގެ އިނާމު ދިނުމަށް ދަރުބާރުގޭގައި ބޭއްވި ރަސްމިއްޔާތުގައި މިނިސްޓަރު ޝަފީއު ވިދާޅުވެފައިވަނީ އޯ ލެވެލް ނިންމާ ގަދަ 10 އަކަށް ދިޔަ ދަރިވަރުންގެ ކާމިޔާބީ ފާހަގަކުރުމަށް ބާއްވާ ޖަލްސާ އޮކްޓޯބަރު މަސް ނިމުމުގެ ކުރިން ބޭއްވުމަށް މަސައްކަތް ކުރަމުންދާ ކަމަށެވެ.

މިނިސްޓަރު ޝަފީއު ވަނީ ދަރިވަރުންގެ ކާމިޔާބީ ފާހަގަކުރުމަށް ރަނގަޅު ޕޮލިސީއެއް އެކުލަވާލެވިފައިވާކަން ވެސް އިއުލާން ކުރައްވާފައެވެ. އަދި އެ ޕޮލިސީގައި އޮތް ގޮތަށް ތުނޑުންތުނޑަށް ދަރިވަރުންގެ ކާމިޔާބީތައް ފާހަގަކުރާނެކަމުގެ ޔަގީންކަން ވެސް ދެއްވިއެވެ. އަދި ވިދާޅުވީ އޮކްޓޯބަރު މަހުގެ އިމްހާނު ނިމި ކިޔަވަން ފެށުމުން، ސްކޫލްތަކުގެ ޕްރިންސިޕަލުންނާއި، ޓީޗަރުންނާއި މަޝްވަރާކޮށް ރަނގަޅު ދުވަހެއް އެކަމަށް ކަނޑައެޅޭނެ ކަމަށެވެ.

ނަމަވެސް އޮކްޓޫބަރު މަސް ނިމި، މިއަހަރު ނިމެންދާއިރު، މި ޖަލްސާ މަތިން ހަނދުމަ ހުރި އެއްވެސް ބޭފުޅަކު ސަރުކާރުގައި ނެތް ކަހަލައެވެ. މި މައްސަލައާ ގުޅޭގޮތުން މިނިސްޓަރު ޝަފީއުގެ ބަހެއް ވަނީ ލިބޭ ގޮތް ނުވެފައެވެ. ރާއްޖެއެމްވީން ގުޅައި، މެސެޖް ކުރި ނަމަވެސް އެއްވެސް ރެސްޕޮންސެއް ދީފައެއް ނުވެއެވެ.

ނަމަވެސް މިއަދު ވެސް ބެލެނިވެރިންނާއި ދަރިވަރުން ތިބީ ޖަލްސާ ބާއްވާނެތޯ ނުބާއްވާނެތޯ މިސުވާލުގެ މަތީގައެވެ. އެހެންކަމުން މި ސުވާލަށް އެޑިޔުކޭޝަން މިނިސްޓްރީން ޖަވާބު ދޭން އެބަ ޖެހެއެވެ. އޭލަވަލްގެ ޓޮޕް-10 ޖަލްސާގައި އޯލެވެލްގެ ވެސް އެއްވަނަ އަށް ދިޔަ ދަރިވަރުންނަށް އިނާމު ދީފައިވާތީ ދެން އިތުރު ޖަލްސާއެއް ނުބާއްވާނެ ކަމަށް ބައެއް ބެލެނިވެރިން ތުންތުން މަތިން ކިޔަމުން ދިޔަ ނަމަވެސް ސަރުކާރުން މިކަން ހާމަކުރަން ޖެހެއެވެ. ރައްޔިތުންނަށް ދޮގުހަދައި އޮޅުވާލުމަކުން ފައިދާއެއް ނެތެވެ.