ކުއްލިއަކަށް އެންސްޕާ އަށް ގިނަ އަދަދަކަށް އެސިސްޓެންޓް ޑިރެކްޓަރުން ބޭނުންވެއްޖެ

ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އަށް ގިނަ އަދަދެއްގެ އެސިސްޓެންޓް ޑިރެކްޓަރުން ހޯދަން އިއުލާނު ކޮށްފައެވެ.

މިގޮތުން ސަރުކާރުގެ ގެޒެޓުގައި އެސިސްޓެންޓް ޑިރެކްޓަރގެ މަގާމަށް 8 މީހުން ހޯދަން އިއުލާނު ކޮށްފައިވާކަން ފާހަގަ ކުރެވެއެވެ.

މިހާރު އިއުލާނު ކޮށްފައިވާ ބައެއް މަގާމު ތަކުގެ ސުންގަޑި ޑިސެމްބަރު 3ށް ހަމަވާއިރު އަނެއް ބައި މަގާމުތަކުގެ ސުންގަޑި ހަމަވަނީ ޑިސެމްބަރު 5 ވަނަ ދުވަހަށެވެ.

އޭގެ އިތުރުން އެސިސްޓެންޓް ޕޮލިސީ އޮފިސަރ ޕްރޮކިއުމެންޓް އޮފިސަރ، އެޑްމިނިސްޓްރޭޓިވް އޮފިސަރުގެ މަގާމަށް މީހުން ހޯދަން ވެސް ދާދި ފަހުން ވަނީ އިއުލާނު ކޮށްފައެވެ.

އެސިސްޓެންޓް ޑިރެކްޓަރ އެއްގެ އަސާސީ މުސާރަކީ 7035 ރުފިޔާ އެވެ. އަދި ސާވިސް އެލަވަންސް ގެ ގޮތުގައި 2000ރުފިޔާ ކަނޑައަޅާފައިވެއެވެ.

އޭގެ އިތުރުން ސިވިލް ސަރވިސްގެ އެ ރޭންކަކަށް މިނިމަމް ވޭޖްގެ ގޮތުގައި ދިނުމަށް ކަނޑައަޅާފައިވާ އަދަދަށް ވުރެ މަދުން ލިބޭ ނަމަ، އެ އަދުދު ހަމަކުރުމަށް މިނިމަމް ވޭޖް އެލަވަންސް ހަމަޖައްސައިދެވޭނެ ކަމަށާއި، މުސާރައާއި ސަރވިސް ސްޕެޝަލް ޑިއުޓީ އެލަވަންސްގެ ގޮތުގައި އަސާސީ މުސާރައިގެ %35 (މަހަކު 2,462.25 ރުފިޔާ) ލިބޭނެ ކަމަށާއި، ރިސްކު އެލަވަންސްގެ ގޮތުގައި ވަޒީފާއަށް ނުކުންނަ ކޮންމެ ރަސްމީ ދުވަހަކަށް 50.00 ރުފިޔާ ލިބޭނެ ކަމަށާއި، ޓެކްނިކަލް ކޯ އެލަވެންސް ދިނުމަށް ހަމަޖެހިފައިވާ އުސޫލުގެ ތެރެއިން ޓެކްނިކަލް ކޯ އެލަވެންސް ގެ ގޮތުގައި މަހަކު 1,969.80 ރުފިޔާ ލިބޭނެ ކަމަށާއި. ސަޕޯޓިންގ ކޯ އެލަވަންސްގެ ގޮތުގައި 900.00 ރުފިޔާ ލިބޭނެ ކަމަށް ވެސް ބުނެފައިވެއެވެ.

އަސާސީ މުސާރަ އާއި އެލަވަންސްތައް ހިމަނައިގެން މަހެއްގެ މައްޗަށް އެސިސްޓެންޓް ޑިރެކްޓަރަކަށް ގާތްގަނޑަކަށް 15،366 ރުފިޔާ ލިބޭނެ ކަމަށް ބެލޭއިރު މިހާރު އިއުލާނު ކޮށްފައިވާ 8 އެސިސްޓެންޓް ޑިރެކްޓަރުންނަށް ގާތްގަނޑަކަށް 1.4 މިލިއަން ރުފިޔާ ދައުލަތުގެ ބަޖެޓުން އަހަރެއްގެ މައްޗަށް ހޭދަވާނެއެވެ.

އެންސްޕާ އަށް ގިނަ އަދަދަކަށް މުވައްޒަފުން ހޯދަން އިއުލާނު ކުރި މި ދަނޑިވަޅަކީ، ގާނޫނުއަސާސީ އަށް ރެކޯޑް މިންވަރެއްގެ ކުޑަ ވަގުތުކޮޅެއްގެ ތެރޭގައި ރައީސް މުއިއްޒަށް ފަހިވާ ގޮތައް ބޮޑެތި ބަދަލުތަކެއް ސަރުކާރަށް ނިސްބަތްވާ މެންބަރުން ގެނެސްދިނުމާ ގުޅިގެން ސަރުކާރުގެ ކުންފުނިތަކަށް ގިނަ އަދަދަކަށް މުވައްޒަފުން ނަގަމުންދާ ދަނޑިވަޅެއްގައިކަން ފާހަގަ ކުރެވެއެވެ.

އެންސްޕާ އިން މުވައްޒަފުން ހޯދަން އިއުލާނު ކުރިއިރު ސަރުކާރުގެ ރިކަރަންޓު ޚަރަދުތައް ބޮޑުވެ، ތަރައްގީ އަށް ކުރާ ހޭދަ އިންތިހާ އަށް ކުޑަވެފައިވާތީ ގިނަ ބައެއްގެ ފާޑުކިޔުން ސަރުކާރަށް އަމާޒުވެފައިވާކަން ވެސް ފާހަގަ ކުރެވެއެވެ.

އަނެއްކޮޅުން ސަރުކާރުގެ ޚަރަދުތައް ކުޑަކުރުމަށް ކަމަށް ބުނެ އާސަންދަ އާއި އެންސްޕާ އިން އާންމުންނަށް މިހާތަނަށް ދެމުން އައި ލުއިތަކަށް ބަދަލު ގެނެސް ހަމަ އެކަނި ޓާގެޓް ކުރެވޭ ބަޔަކަށް އެކަނި އިނާޔަތްތައް ދިނުމަށް ސަރުކާރުން ގެންދަނީ ރާވަމުންނެވެ.

މިދިޔަ ދެ ހަފްތާ އެއްހާ ދުވަހުގެ ތެރޭގައި އެންސްޕާ އިން ވަނީ ދާއިމީ 12 ވަޒީފާ އަށް މީހުން ހޯދަން އިއުލާނު ކޮށްފައެވެ.