މިހާރު ''ކިއްލި ގޮއްޓެއްހެން'' މި ސަރުކާރުގެ ތަސައްވުރު ސިފަ ކުރެވޭ: މެންބަރު ޒިޔާދު

މިހާރު ކިއްލި ގޮއްޓެއްހެން ރައީސް ޑރ.މުހައްމަދު މުއިއްޒު ސަރުކާރުގެ ތަސައްވުރު ސިފަ ކުރެވޭ ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.

ބުރާސްފަތި ދުވަހުގެ ރޭ އެމްޑީޕީން ބޭއްވި ހަރުގެ ޖަލްސާގައި މެންބަރު ޒިޔާދު ވިދާޅުވީ ރައްޔިތުންގެ ތިބި ހާލަތު ވަޒަން ކުރާނީ ރައްޔިތުން ކަމަށާއި، ދިރިއުޅުމުގެ ހާލަތު ދަށްވި ނަމަވެސް މިސަރުކާރުން 55 ބިލިއަން ރުފިޔާ ހުސްކޮށްލާފައިވާ ކަމަށެވެ. ރައްޔިތުންގެ ފަޅީގައި ހުންނެވި ކަމަށް ރައީސް މުއިއްޒު ވިދާޅުވާތީ އެކަމަށް އިޝާރާތް ކުރައްވައި މެންބަރު ޒިޔާދު ވިދާޅުވީ އެމަނިކުފާނު އެންމެ ފަހަރަކު ވެސް ފަހަތަށް އެނބުރި ރައްޔިތުން މިހާރު ތިބިފަޅިއެއް ބަލާލާފައިނުވާ ކަމަށެވެ. އަދި ވިދާޅުވީ ރައްޔިތުން މިހާރު ރައީސް މުއިއްޒުގެ ފަޅީގައި ނެތް ކަމަށެވެ.

މެންބަރު ޒިޔާދު ވިދާޅުވީ ރައްޔިތުންނަށް ހަގީގަތް އޮޅުވާލުމަށް މިސަރުކާރުން ވަރަށް މަސައްކަތް ކުރާ ކަމަށާއި، އެކަމަށް ބޮޑު ހޭދައެއް ވެސް ކުރަ ކަމަށެވެ. އެގޮތުން މިސަރުކާރުގެ ޕީއާރް ޑިޕާޓްމަންޓަށް އިޝާރަތް ކުރައްވައި މެންބަރު ޒިޔާދު ވަރަށް ބޮޑަށް ފާޑު ވިދާޅުވިއެވެ.

މެންބަރު ޒިޔާދު ވިދާޅުވީ މިސަރުކާރުގެ ކާމިޔާބީ އެއް އަހަރު ވަރަށް ކުލަގަދަކޮށް ފާހަގަކޮށްފައިވާ ކަމަށާއި، މިސަރުކާރު ބުނާ ގޮތަށް އެއް އަހަރުގެ ކާމިޔާބީ ލޮލަކަށް ނުފެންނާނެ ކަމަށާއި، އޭގައި އަތެއް ނުލެވޭނެ ކަމަށެވެ. އަދި އޭގައި ކުލައެއް ރަހައެއް ވަހެއް ނުހުންނާނެ ކަމަށް މެންބަރު ޒިޔާދު ވިދާޅުވިއެވެ. ބަޖެޓަށް ވެސް ވީ އެހެންކަން ފާހަގަކުރައްވައި މެންބަރު ޒިޔާދު ވިދާޅުވީ ވީގޮތް ނޭނގުނު ނަމަވެސް ބަޖެޓު ހުސްވެފައިވާ ކަމަށާއި، ލިބުނު ކާމިޔާބުތަކާއެކު ޒުވާނުންނަށް މިއަދު އިސް އުފުލާ ބަލާނުލެވޭ ކަމަށެވެ.

މީގެ އިތުރުން މެންބަރު ޒިޔާދު ވިދާޅުވީ ގައުމު ހިންގުމަށް މިސަރުކާރަށް ވެސް އެއް އަހަރު ދީފައިވާ ކަމަށާއި، ނަތީޖާ ވަރަށް ހިތި ކަމަށެވެ. އެއް އަހަރު ތެރޭގައި ސަރުކާރުން ހަދާފައިވާ ދޮގުތަކާއެކު މިއަދު ރައްޔިތުން ތިބީ ސަރުކާރުން ތެދެއް ހަދާނެ ކަމުގެ އިންތިޒާރުގައި ކަމަށެވެ. އަދި ވިދާޅުވީ މިސަރުކާރުން ރައްޔިތުންނަށް ވަރަށް އުންމީދީ ތަސައްވުރެއް ދެއްކި ކަމަށާއި، ނަމަވެސް އެ ތަސައްވުރު މިއަދު ސިފަވެގެންދަނީ ކިއްލި ގޮއްޓެއްހެން ކަމަށެވެ.

މެންބަރު ޒިޔާދު ވިދާޅުވީ މިއަދު ރާއްޖޭގެ އިގްތިސާދު ފުޑުފުޑު ވެގެންދާއިރު، ރައްޔިތުން އަޅާނުލާ ކަަމަށްވާނަމަ ނުފެންނަ ކާމިޔާބީއާއި، ތަރައްގީއަށް ވީ ގޮތަށް އަންނަ އަހަރުގެ ބަޖެޓު ވެސް ނުފެނި ގެއްލޭނެ ކަމަށެވެ. އަދި މިސަރުކާރަކީ އުނބަށް ޖަހާ ސަރުކާރެއް ކަމަށާއި، ގާނޫނު އަސާސީއަށް ގެނައި ބަދަލުތައް އުނބަށް ޖަހަންދެން އެ ނަތީޖާ ނެރުމަށް ރައްޔިތުން މަސައްކަތް ކުރަންޖެހޭ ކަމަށް މެންބަރު ޒިޔާދު ވިދާޅުވިއެވެ.