ގޮނޑި ގެއްލޭ ގޮތަށް ގާނޫނު އަސާސީއަށް މިގެނައި ބަދަލާއެކު ރައްޔިތުން މަޖިލީހުގެ މެންބަރުން އުޅެންޖެހޭނީ އަޅު ކުދިން އުޅޭ ގޮތަށް ކަމަށް ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވިދާޅުވެއްޖެއެވެ.
ރާއްޖެޓީވީގެ ޓީވީ ޓޯކް ޕްރޮގްރާމްގައި އަލީ ހުސެއިން ވިދާޅުވީ މަޖިލިސް މެންބަރުންގެ ގޮނޑި ގެއްލޭ ގޮތަށް މިފަހަރު ގާނޫނު އަސާސީއަށް ބަދަލު ގެނެސްފައިވަނީ ސީދާ ރައްޔިތުންގެ ބާރު އެއްކޮށް ކަނޑުވާލުމަށް ކަމަށާއި، ރައީސް ޑރ.މުހައްމަދު މުއިއްޒު ބޭނުންފުޅުވާ ގޮތަށް ކަންކަން ކުރެއްވުމަށް ކަމަށެވެ.
ރައީސް މުއިއްޒަށް އިޝާރާތް ކުރައްވައި އަލީ ހުސެއިން ވިދާޅުވީ އެމަނިކުފާނު ދެތިން ހަތަރު ފަހަރު ޕާޓީ ބަދަލުކުރެއްވި ކަމަށާއި، ޑީއާރްޕީ އޮޅާލާފައި، ޕީޕީއެމްއެމް ފަތް ޖަހާލި ކަމަށެވެ. އަދި ވެރިކަމަށް ވަޑައިގަންނަވާ އެމްޑީޕީގެ 13 މަޖިލިސް މެންބަރުން ގެންވިއިރު، އެހުރިހާ ކަންކަން އެންމެ ރަނގަޅަށް އެނގިވަޑައިގަންނަވާނީ ރައީސް މުއިއްޒަށް ކަމަށް އަލީ ހުސެއިން ވިދާޅުވިއެވެ. އަބަދު މިމޭރުމުން މަސައްކަތް ނުކުރެވޭނެކަން އަމިއްލަފުޅަށް ވެސް ގަބޫލުކުރައްވައި، މިފަހަރު މަޖިލީހުގެ ބާރުއެއްކޮށް ކަނޑުވާލައި، މިނިވަންކަން ގެއްލުވާލީ ކަމަށް އޭނާ ވިދާޅުވިއެވެ.
އަލީ ހުސެއިން ވިދާޅުވީ މެންބަރުން ގޮނޑި ދިފާއު ކުރާކަމަށްވާނަމަ، ރައީސް މުއިއްޒު ވިދާޅުވި ގޮތަށް ވިދާޅުވި އެއްޗެއް ކިޔަންޖެހޭނެ ކަމަށާއި، ދެން މަސައްކަތްކުރަން ޖެހޭނީ އަޑު ދަށުން ކިޔާ އަޅު ކުދިން މަސައްކަތް ކުރާ އުސޫލުން ކަމަށެވެ.
އަމާ ކީތީ ފަރަށް ދާ އުސޫލުން ކުރާ ކޮންމެ އަދި އެންމެ ރަނގަޅު ކަމަކަށް ނުވާނެ. ރަނގަޅު ވާހަކައެއް. ދިމާވާ ހާލަތަކާ ގުޅިގެން ގާނޫނު އަސާސީގައި މިހާރު ބަޔާން ކުރާ ހާލަތްތައް ފިޔަވައި އިތުރު ހާލަތްތަކެއް އޭގައި އުފައްދާ ކަމަށްވަންޏާ އަނެއްކާވެސް އެ އިސްލާހު ގެންނަންޖެހޭނީ ގާނޫނު އަސާސީއަށް. އެހެންނަމަވެސް އަޅުގަނޑުމެން މިދައްކަނީ ކޮންމެ އިސްލާހެއް ކޮންމެ ބަދަލެއް ގާނޫނު އަސާސީއަށް ގެންނަ ވާހަކައެއްނޫން. އެކަން ކުރަންޖެހޭނީ އުސޫލުތަކާއި ހަމަތައް ހުންނަން ޖެހޭނެ. އެފަދަ އިސްލާހެއް ގެނެސްފި ކަމަށްވާނަމަ ބަދަލުކުރަންޖެހޭ އަދި އެއާ ގުޅިފައި ހުރި އެހެން މާއްދާތަކެއް ވެސް އޭގައި ހުންނާނެ. އެހެންނަމަވެސް އޭގެ ބަދަލުގައި މިކުރި ކަމަކީ ރައްޔިތުންގެ ބާރުގެ އެއްކޮށް ކަނޑުވާލީ. ރައްޔިތުން މަޖިލީހުގެ މެންބަރުންގެ މިނިވަންކަން އެއްކޮށް ގެއްލުވާލީ. އެހެންވީމަ އެގޮތަށް ކުރީމަ އެކަން ރަނގަޅެއް ނޫނޭ އަޅުގަނޑު ދަންނަވަނީ.ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން
އަލީ ހުސެއިން ވިދާޅުވީ ބާރުތައް ފެށިގެން އަންނަނީ ރައްޔިތުންގެ ކިބައިން ކަމަށާއި، މިއީ ރައްޔިތުންގެ ގައުމެއް ކަމަށެވެ. ވަކި ބޭފުޅަކަށް ރައްޔިތުން ބާރު ދެނީ 5 އަހަރަށް ދައުލަތަށް ހިންގުމަށް ކަމަށާއި، އެހިންގާ ގޮތް ބަލަން ރައްޔިތުން ތިބޭނެ ކަމަށެވެ. ނަމަވެސް ރައްޔިތުންނަށް ނުބެލޭނެ ގޮތަށް ގާނޫނު އަސާސީ ރައީސް މުއިއްޒު ބަދަލުކުރީ ކަމަށް އޭނާ ވިދާޅުވިއެވެ.
ނަމަވެސް ގާނޫނު އަސާސީގެ އޮނިގަނޑާ އެއްވެސް ބަޔަކަށް ނުކުޅެވޭނެ ކަމަށާއި، ކުޅޭ ކަމަށްވާނަމަ ހުރިހާ ރައްޔިތުން އެއްބައިވާންޖެހޭ ކަމަށް އަލީ ހުސެއިން ވިދާޅުވިއެވެ. އަދި މިކަން ބަދަލުކުރަން ރައްޔިތުން ނުކުންނަންޖެހޭ ކަަމަށް އޭނާ ވިދާޅުވިއެވެ.
