އައްޑޫ އާއި ގުރައިދޫގެ ކުރިމަތިލުން އެއްވަރު

މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގައި އައްޑޫ ސިޓީ އާއި ކ.ގުރައިދޫ ބައްދަލު ކުރި މެޗު އެއްވަރުވެއްޖެ އެވެ.

މުބާރާތުގެ ސީގައި ބުދަ ދުވަހުގެ ރޭ ގަލޮޅު ރަސްމީ ދަނޑުގައި މި ދެ ޓީމު ބައްދަލު ކުރި މެޗު ނިމުނީ ދެ ޓީމު 1-1ން އެއްވަރުވެގެންނެވެ. މުބާރާތުގައި ގުރައިދޫ ކުޅުނު ފުރަތަމަ މެޗުން އެ ޓީމު މޮޅުވެފައިވާއިރު، އައްޑޫ ކުޅުނު ފުރަތަމަ މެޗުން އެ ޓީމު ވަނީ ބަލިވެފަ އެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް އައްޑޫ އިންނެވެ. ނަމަވެސް ގުރައިދޫ އިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗު ފަށައިގެން 13 ވަނަ މިނެޓުގައި އައްޑޫ އަށް ލީޑު ނަގައިދިނީ މުޙައްމަދު އިންޝާލް އެވެ. އެއީ އެ ޓީމުގެ އަލީ ނާފިއު ހުރަސްކޮށްދިން ބޯޅައެއް ގޯލަށް ވައްދާލައިގެން އިންޝާލް ޖެހި ލަނޑެކެވެ. ނަމަވެސް އޭގެ ފަހުން މެޗުގެ 22 ވަނަ މިނެޓުގައި ގުރައިދޫ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަަހައިދިނީ އަޙުމަދު އަހުޒަމް އެވެ.

މެޗު އެއްވަރުވެ ލިބުނު އެއް ޕޮއިންޓާ އެކު މި ގުރޫޕުގެ އެއް ވަނައިގައި އޮތީ ގުރައިދޫ އެވެ. އެއީ މިހާތަނަށް އެ ޓީމު ކުޅުނު ދެ މެޗުން ހަތަރު ޕޮއިންޓާ އެކު އެވެ. މި ގުރޫޕުގެ ދެ ވަނައިގައި އޮތީ އައްޑޫ އެވެ. އެއީ އެ ޓީމު ކުޅުނު ދެ މެޗުން ދެ ޕޮއިންޓާ އެކު އެވެ. ތިން ވަނައިގައި އޮތް ކުރެންދޫ އަށް އެއް ޕޮއިންޓު ލިބޭއިރު، ފުލުގައި އޮތް ހުރާ އަށް އެންމެ ޕޮއިންޓެއް ވެސް ނުލިބެ އެވެ.