ނަތަންޔާހޫ ރާއްޖެ އަތުވެއްޖެނަމަ ހައްޔަރުކުރާނެތޯ ސުވާލުކުރުމުން ހޯމް މިނިސްޓަރު އިހްސާނު ހުންނެވީ ހަނު

އަނިޔާވެރި އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ދިވެހިރާއްޖެއަށް އަތުވެއްޖެނަމަ ރާއްޖޭން އޭނާ ހައްޔަރުކުރާނެތޯ ސޯސަލް މީޑިއާގައި ސުވާލުކުރުމުން މ މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އަލީ އިހްސާނު ޖަވާބެއް ނުދެއްވިއެވެ.

ނަޔަންޔާހޫ ރާއްޖެ އަތުވެއްޖެނަމަ ހައްޔަރުކޮށް، އިންޓަނޭޝަނަލް ކްރިމިނަލް ކޯޓް (އައިސީސީ) އާ ހަވާލުކުރާނެތޯ، މިނިސްޓަރ އިހްސާނާ "×" ގައި ސުވާލުކޮށްފައިވަނީ ޤާނޫނީ ވަކީލު އަޙްމަދު މައުރޫފްއެވެ.

އެ ސުވާލުކުރިތާ 24 ގަޑިއިރު ފާއިތުވެގެން ދިޔައިރުވެސް މިނިސްޓަރު އެ ސުވާލަށް ޖަވާބެއް ދެއްވައިފައެއް ނުވެއެވެ. އެހެން ނަމަވެސް، މިނިސްޓަރު އިހުސާނަކީ ސޯޝަލް މީޑިއާގައި ވަރަށް އެކްޓިވް ބޭފުޅެކެވެ. އެ ވުޒާރާގެ ދަށުން ހިންގާ ޕޮލިސް ސާރވިސްއާއި އިމިގްރޭޝަން ފަދަ ތަންތަނުން ކުރިއަށްގެންދާ އޮޕަރޭޝަންތަކާ ގުޅޭ ކަންކަންވެސް، އަމިއްލަފުޅަށް ސޯޝަލް މީޑިއާގައި ހިއްސާކުރައްވައި، ބައެއް ކަންކަމުގައި ސޯޝަލް މީޑީއާގައި މީހުންނާ މުއާމަލާތު ކުރައްވައެވެ.

ފަލަސްތީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ ޤަތުލުއާންމު ހުއްޓުވުމަށް ޓަކައި ނެދަލޭންޑުގެ ދަ ހޭގުގައި ހުންނަ އައިސީސީ އިން ބަލަންފެށި މައްސަލައާ ގުޅިގެން، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަދި ކުރީގެ ޑިފެންސް މިނިސްޓަރު ޔޯފް ގަލަންޓް ހައްޔަރުކުރުމަށް އެ ކޯޓުން އަމުރު ނެރެފައިވަނީ މި ހިނގާ ނޮވެންބަރު މަހުގެ 21 ވަނަ ދުވަހުއެވެ.

އެ ކޯޓުން އަމުރު ނެރުމާއެކު، ގިނަ ގައުމުތަކަކުން ވަނީ ނަތަންޔާހޫ ހައްޔަރުކުރާނެ ކަމަށް ބުނެފައެވެ. މި ގޮތުން، ނެދަލޭންޑްސް، އިޓަލީ، ސްވިޒަލޭންޑް، އަޔަލޭންޑް، ބެލްޖިއަމް އަދި ފްރަންސް ފަދަ ހުޅަނގުގެ ގައުމުތަކުންވެސް، ނަތަންޔާހު ޒިޔާރަތްކޮށްފިނަމަ ހައްޔަރުކޮށް، ކޯޓާ ހަވާލުކުރާނެކަމަށް ރަސްމީކޮށް ވަނީ ބުނެފައެވެ.

ދިވެހިރާއްޖެއަކީ ވެސް އިންޓަރނޭޝަނަލް ކްރިމިނަލް ކޯޓުގެ އަމުރަތައް ތަންފީޒުކުރުން ލާޒިމުވާ، އެ ކޯޓުގެ މެންބަރު ގައުމެކެވެ. އެ ކޯޓުގެ މެންބަރަކަށް ރާއްޖެއިން ވެފައިވަނީ، 2011 ވަނަ އަހަރު ދިވެހިރާއްޖޭން، "ރޯމް ސްޓެޓިއުޓް އޮފް ދަ އިންޓަރނޭޝަނަލް ކްރިމިނަލް ކޯޓް" އެވެ ކިޔާ ބައިނަލްއަގްވާމީ މުއާހަދާ ތަސްދީގުކޮށް، ފުރިހަމަ މެންބަރު ގައުމަކަށް ރަސްމީކޮށް ވެފައިވާތީއެވެ.

ނަތަންޔާހޫ ހައްޔަރުކުރަން އަމުރު ނެރުނު ދުވަހު، ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު "×" ގައި ކުރެއްވި ޕޯސްޓެއްގައި ވިދާޅުވެފައިވަނީ، އިންޓަރނޭޝަނަލް ކްރިމިނަލް ކޯޓުން ނިންމި ނިންމުމަށް މަރުހަބާ ކިޔާ ކަމަށެވެ. ނަތަންޔާހޫ ހައްޔަރު ކުރަންޖެހޭނެ ކަމަށް ނުވަތަ ރާއްޖެ އަތުވެއްޖެ ނަމަ އޭނާ ހައްޔަރުކޮށް، ކޯޓުގެ އަމުރު ރާއްޖޭން ތަންފީޒުކުރާނެކަމަށް ސާފުކޮށް ވިދާޅުވެފައެއްނުވެއެވެ.

އަދި ނަތަންޔާހޫގެ ނަންނަވެސް، އެ ޕޯސްޓުގައި ހިމަނައިފައިނުވާކަން ފާހަގަކުރެވެއެވެ.

އިސްލާއީލުގެ ޕާސްޕޯޓުގައި ރާއްޖެ އެތެރެވުން މަނާކުރުމުގެ މައްސަލައިގައި މި ސަރުކާރުން މިހައިތަނަށް ޢަމަލުކޮށްފައިވާ ގޮތުން އަދި ރައީސް މުއިއްޒުގެ ފުރިހަމަ ކޮންޓްރޯލް އޮތް، ރައްޔިތުންގެ މަޖިލީހުގައި އެ ބިލު "ތާށިކޮށްފައި" އޮތުމުގެ ސަބަބުން، ފަލަސްތީނުގެ މައްސަލައިގައި ރައީސް މުއިއްޒާއި މި ސަރުކާރުގެ ވެރިން ދައްކަމުންދާ ވާހަކަތަކުގެ އިހްލާސްތެރިކަމާމެދު ސުވާލު އުފެދެއެވެ.

އަދ، ފަލަސްތީނުގެ ރައްޔިތުންގެ ހައްގުގައި މި ސަރުކާރަށް އެއްވެސް ކަމެއް ކުރަން ކެރިދާނެތޯ ރައްޔިތުންގެ ތެރެއިން ގިނަ ބަޔަކު ދަނީ ސުވާލު އުފައްދަމުންނެވެ.