ޕީއެސްއައިޕީ ބަޖެޓްގައި ރަށްރަށުގެ ތަރައްގީއަށް ހުރި މަޝްރޫޢުގެ ތެރެއިން 30 ޕަސެންޓްވެސް ޚަރަދުކޮށްފަ ނެތް
ހުޅުމާލެ ދެކުނު ދާއިރާގެ މެމްބަރު ޑރ. އަހްމަދު ޝަމްހީދު (ފައިލް ފޮޓޯ)
ޕީއެސްއައިޕީ ބަޖެޓް ހުސްވެގެން ސަޕްލިމަންޓްރީ ބަޖެޓްގައި އަދަދުތަކެއް ޖެއްސެވިކަމަށް ވިދާޅުވެ، މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. އަބްދުﷲ މުއްޠަލިބް ދެއްކެވި ވާހަކަފުޅު ތަކަކީ ހަގީގަތެއް ނޫން ކަމަށާއި، ޕީއެސްއައިޕީ ބަޖެޓްގައި ރަށްރަށުގެ ތަރައްގީއަށް ހުރި މަޝްރޫޢުގެ ތެރެއިން 30 ޕަސެންޓްވެސް ޚަރަދުކޮށްފަ ނެތް ކަމަށް ހުޅުމާލޭ ދެކުނު ދާއިރާގެ މެމްބަރު ޑރ އަޙްމަދު ޝަމްހީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާއަށް ވެލިދޫ ދާއިރާގެ މެމްބަރު މުޙައްމަދު އައްބާސް ކުރައްވަން ހުށަހެޅުއްވި ސުވާލަށް ޖަވާބު ދެއްވުމަށް މިނިސްޓަރު މުއްޠަލިބް ވަނީ މަޖިލީހަށް ހާޒިރުވެވަޑައިގެންފައެވެ. މެމްބަރުގެ ސުވާލަށްފަހު އިތުރު މެމްބަރުންނަށް ސުވާލުކުރުމަށް ހުޅުވާލި ފުރުސަތުގައި މެމްބަރު ޝަމްހީދު ވަނީ މިނިސްޓަރު މުއްޠަލިބް ރައްޔިތުންނަށް އޮޅޭ ގޮތަށް މަޖިލީހުގައި ވާހަކަ ދެއްކެވި ކަމަށް ވިދާޅުވެފައެވެ.
މީގެ އިތުރުން ޑރ ޝަމްހީދު ވިދާޅުވީ، 14 ނޮވެމްބަރު 2024 ވަނަ އަހަރު ފިނޭންސް މިނިސްޓްރީން ނެރުއްވާފައިވާ ސްޓެޓިސްޓިކްސްގައި ބުނާ ގޮތުން، ދިވެހި ރާއްޖޭގެ ބަނދަރު ހަދަން ބަޖެޓްކޮށްފައި ހުރި 500 މިލިއަން ރުފިޔާގެ ތެރެއިން އެންމެ ރުފިޔާއެއްވެސް ޕީއެސްއައިޕީ ބަޖެޓް ހުސްވި އިރު ވެސް ހޭދަކޮށްފައި ނެތް ކަމަށެވެ. ބަނދަރު ހަދަން ހުރި ފައިސާއިން ހޭދަ ނުކުރާ ކަމަށާއި، ޖުމްލަ 2 ބިލިއަނެއްހާ ރުފިޔާ ޕީއެސްއައިޕީ ބަޖެޓުން މިއަދާ ހަމައަށް ރަށްރަށުގެ ތަރައްގީއަށް ހުރި ފައިސާ ވަނީ އެހެން ކަންތައްތަކަށް ބޭނުންކޮށްފައި ކަަމަށް އޭނާ ވިދާޅުވިއެވެ. އެހެންކަމުން ޝަމްހީދު ތަކުރާރުކޮށް ވިދާޅުވީ، މަޖިލީހުގައި މިނިސްޓަރ އޮޅޭ ގޮތަށް ވާހަކަ ދެއްކެވި ކަމަށެވެ.
"ސަޕްލިމަންޓްރީ ބަޖެޓް އައީކީ އެ މަޝްރޫޢުތަކަށް ޖަހާފައިވާ ފައިސާ ހުސްވެގެނެއް ނޫން. އެ ފައިސާ އެހެން ކަންތަކަށް ބޭނުންކޮށްގެން" ޝަމްހީދު ވިދާޅުވިއެވެ.
މިނިސްޓަރ މުއްޠަލިބް ވިދާޅުވެފައިވަނީ، ބަޖެޓްގައި ހުރި މިންވަރަށް ވުރެ އިތުރަށް ޕީއެސްއައިޕީއަށް ޚަރަދުކުރަން ޖެހިގެން ސަޕްލިމަންޓްރީ ބަޖެޓްވެސް ފާސްކުރަން ޖެހުނު ކަމަށެވެ.
ސުވާލު ކުރެއްވުމުގެ ފުރަތަމަ ފުރުސަތުގައި ޝަމްހީދުގެ ސުވާލު ފުރިހަމަ ނުވަނީސް ވަގުތު ހަމަވެގެން މައިކް ވަނީ ކަނޑާލާއްވާފައެވެ. އަދި މަޖިލީހުގެ ރައީސް އަބްދުއްރަޙީމް ވިދާޅުވީ، އިތުރު ސުވާލުކުރުމުގެ ވަގުތުގައި ރައްޔިތުންނަށް ކަންކަން އޮޅޭ ގޮތަށް ވަޒީރުގެ ވާހަކަފުޅުތަކަށް ރައްދު ދެއްވުމުގެ ގޮތުން ވާހަކަ ދައްކަވަން ފުރުސަތު ދެން ނުދެއްވާނެ ކަމަށެވެ.
