ފާރިސްގެ މައްސަލައިގައި ރައީސް މައުމޫން ރަތަށް – މަޖިލީހާއި އެޗްއާރްސީއެމާއި ބޭރު ދުނިޔެއަށް ބަހުގެ ހަމަލާތައް
ފާރިސް ހައްޔަރުކޮށްފައިވަނީ ޤާނޫނާއި ޚިލާފަށް
ކުރީގެ ރައީސުލްޖުމްހޫރިއްޔާ މައުމޫން ޢަބްދުލްޤައްޔޫމް
ތަހުޤީޤު ނުނިމޭ މައްސަލައެއްގެ ޝަރީއަތް ނިމެންދެން ބަންދުކޮށްފައި ހުރި ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަޙުމަދު ފާރިސް މައުމޫންގެ ބަންދުގެ މައްސަލައިގައި ކުރީގެ ރައީސުލްޖުމްހޫރިއްޔާ އަދި ފާރިސްގެ ބައްޕާފުޅު، މައުމޫން ޢަބްދުލްޤައްޔޫމް، ރައްޔިތުންގެ މަޖިލީހާއި، ހިއުމަން ރައިޓްސް ކޮމިޝަނުގެ އިތުރުން ރާއްޖޭގެ ހާލަތާއިމެދު (ހަމައެކަނި) ކަންބޮޑުވުން ފާޅުކުރާ ޤައުމުތަކަށް ބަހުގެ ވަރުގަދަ ހަމަލާތަކެއް ދެއްވައިފިއެވެ.
ހުކުރު ދުވަހުގެރޭ މި މޭރުމުން، އިނގެރޭސި ބަހުން ރައީސް މައުމޫން ދެ ޓްވީޓެއް ކުރައްވާފައިވާއިރު، ފުރަތަމަ ޓްވީޓްގައި ވަނީ، ފާރިސް ހައްޔަރުކުރެވިފައި ހުރީ ޤާނޫނާއި ޚިލާފަށް ކަމަށާ، ރައްޔިތުންގެ މަޖިލީހާއި އެޗްއާރްސީއެމްއިން އެކަމަށް އަޅައިނުލައްވާ ކަމަށެވެ.
ދެވަނަ ޓްވީޓްގައި، ރާއްޖޭގެ ހާލަތާއިމެދު (ހަމައެކަނި) ކަންބޮޑުވުން ފާޅުކުރާ ޤައުމުތަކަށް ރައީސް މައުމޫން ވިދާޅުވީ، އެ ޤައުމުތަކުން ވެސް ފާރިސްގެ މައްސަލަ އާއި މެދު އަޅައިނުލާ ކަމަށެވެ. އަދި އެ ޤައުމުތަކުން ދައްކަނީ ހަމައެކަނި ވާހަކަ ކަމަށާ، އެޤައުމުތަކުގެ ފަރާތުން އަމަލު ނުފެންނަކަމަށް ރައީސް މައުމޫން ވިދާޅުވިއެވެ.
ފާރިސްގެ މައްސަލައިގައި ރައީސް މައުމޫން މިފަދައިން ޓްވީޓް ކުރައްވާފައިވާއިރު، ފަހަކަށް އައިސް ޕޯޑިއަމްގައި ވާހަކަ ދައްކަވާ ކޮންމެ ފަހަރަކު ވެސް ރައީސް މައުމޫން ގެންދަވަނީ ފާރިސްގެ މައްސަލައިގައި ވަރަށް ބޮޑަށް ކަންބޮޑުވުން ފާޅުކުރައްވާ ވާހަކަފުޅު ދައްކަވަމުންނެވެ.
ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދިނުމުގެ ތުހްމަތުގައި ޖުލައި 18 ވަނަ ދުވަހު ފާރިސް ހައްޔަރުކޮށް، އެ ތަޙުޤީޤު މަރުހަލާގައި އޮތް އެ މައްސަލައިގެ ޝަރީޢަތް ނިމެންދެން ފާރިސް ބަންދުގައި ބެހެއްޓުމަށް ކްރިމިނަލް ކޯޓުން އަމުރެއް ނެރެފައިވަނީ ޖުލައި 19 ވަނަ ދުވަހުއެވެ. ފާރިސް ބަންދުގައި ބެހެއްޓުމަށް އަމުރު ނެރުއްވީ ކްރިމިނަލް ކޯޓުގެ ގާޒީ އަލީ އާދަމްއެވެ.
ކްރިމިނަލް ކޯޓް ހިންގެވުމާއި ވަގުތީ ގޮތުން ހަވާލުވެހުންނެވި ގާޒީ އާދަމް އާރިފް ނެރެދެއްވި އެ އަމުރުގައި ބުނެފައިވަނީ ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް ފާސްކުރުމަށް މަޖިލިހަށް ހުށަހެޅޭނީ 42 މެންބަރުންގެ ސޮޔާއެކު ކަމަށް، އޭޕްރީލް 17 ވަނަ ދުވަހު މަޖިލީހުން ފާސްކުރުމާ ގުޅިގެން، މަޖިލީހުގެ ރައީސްގެ މައްޗަށް އިތުބާރު ނެތްކަމުގެ މައްސަލައެއް މަޖިލީހަށް ވެއްދުމަށް، 42 މެންބަރުންގެ ސޮއި ހޯދުމަށް މަޖިލިސް މެންބަރުންނަށް ނުފޫޒު ފޯރުވައި ގާނޫނާ ޚިލާފަށް މަސައްކަތްތަކެއް ކޮށްފައިވާ ކަމަށެވެ.
ހައްޔަރު ކުރުމަށް ބޭނުންވާ އަމުރެއްގެ ގޮތުގައި ފާހަގަ ކޮށްފައިވަނީ މަޖިލީހުގެ މެންބަރުންނަށް ނުފޫޒު ފޯރުވައި، ގާނޫނާ ޚިލާފަށް މަސައްކަތްތަކެއް ކޮށްފައިވާ ކަމަށް ތުހުމަތުކުރެވޭތީ އާއި، ފާރިސް މުޖުތަމައުއަށް ދޫކޮށްފައި ބެހެއްޓުމަކީ މައްސަލައިގެ ތަހުގީގަށް ބޮޑެތި ހުރަސްތަކެއް އެޅި މިކަންކަމާ ގުޅޭގޮތުން ލިބެންހުރި ހެކި ފޮރުވައި، ހެކިބަސްދޭންތިބި ފަރާތްތަކަށް ނުފޫޒު ފޯރުވައި، އެ ހެކި ނައްތާލުމުގެ ފުރުސަތު ތަނަވަސްވެގެންދާނެ ކަމެއް ކަމަށް ފެންނާތީ ކަމަށެވެ.
ފާރިސްގެ މައްޗަށް ވަނީ ތިން ތުހުމަތެއް ކޮށްފައެވެ.
އެގޮތުން ރަސްމީ ހައިސިއްޔަތުން ކުރަންޖެހޭ ކަންކަމަށް ނުފޫޒު ފޯރުވުމުގެ ކުށުގެ އިތުރުން، ހެކި ދިނުމަށް ހުރި މީހަކަށް ނުވަތަ ވޯޓް ދޭން ހުރި މީހަކަށް ނުވަތަ ދައުލަތުގެ މަސައްކަތެއް ކުރުމަށް ހުރި މީހަކަށް ބިރުދެއްކުމާއި، ނުރަނގަޅު ގޮތުގައި ނުފޫޒު ފޯރުވުމާއި ދެކޮޅު ހެދުމުގެ ކުށުގެ ތުހުމަތު ކޮށްފައިވެއެވެ.
ފާރިސް ހައްޔަރުކުރުމާ ގުޅޭ ގޮތުން އޭނާގެ ގާނޫނީ ވަކީލް މައުމޫން ހަމީދު ވިދާޅުވީ ފައިސާ ގޯނި ހިފައިގެން މެންބަރުންނަށް ބެހި ކަމަށް ބުނާ މެންބަރެއްގެ މައްސަލަ ބެލުމެއް ނެތި ފާރިސް ހައްޔަރުކޮށްގެން ގެންދިޔުމަކީ ބޭއިންސާފުގެ ހެއްކެއް ކަމަށެވެ.
