ޕީއެންސީގެ އިންތިޚާބުގައި ކޯޅުން ބޮޑުވެ، މާރާމާރީ ހިންގައިފި
23 ނޮވެމްބަރު 2024 | ހޮނިހިރު 14:40މައުލޫމާތު ލިބިފައިވާ ގޮތުގައި އެއީ ތ.ކަނޑޫދޫގައި ބަހައްޓާފައިވާ ވޯޓު ފޮށި ދޮށުގައި ހިނގި މާރާމާރީއެއް
ޕީއެންސީގެ އިންތިޚާބުގައި ހިންގި މާރާމާރީ
ސަރުކާރު ހިންގާ މައި ޕާޓީ، ޕްރޮގްރެސިވް ޕާޓީ އޮފް މޯލްޑިވްސް (ޕީއެންސީ)ގެ އެތެރޭގެ އިންތިޚާބުގައި ކޯޅުން ބޮޑުވެ، މާރާމާރީ ހިންގައިފި އެވެ.
މި ހާދިސާ ހިނގާފައިވަނީ މިއަދު މެންދުރުފަހު 2:30 ހާއިރު ކަމަށް މަޢުލޫމާތު ލިބިފައިވެއެވެ.
ސޯޝަލް މީޑިއާގައި ދައުރުވަމުން އަންނަ ވީީޑިއޯ އަކުން ފެންނަ ގޮތުގައި ޕީއެންސީގެ އިންތިޚާބުގައި ބަހައްޓާފައިވާ ވޯޓު ފޮއްޓެެއްގެ ކައިރީގައި ދެ މީހަކު ހަމަނުޖެހުން ހިންގައި، އެކަކު އަނެކަކު ގަޔަށް އަތްލައި މާރާމާރީ ހިންގާތަން ފެނެއެވެ.
އެ ވީޑިއޯއިން ފެންނަ ގޮތުގައި އެ ދެ މީހުން މާރާމާރީ ހިންގަން ފެށުމާއެކު، ފޮށި ކައިރީގައި ހުންނަ އޮފިޝަލަކު ފޮށި ގެންދާ މަންޒަރު ފެނެ އެވެ.
މައުލޫމާތު ލިބިފައިވާ ގޮތުގައި އެއީ ތ.ކަނޑޫދޫގައި ބަހައްޓާފައިވާ ވޯޓު ފޮށި ކައިރީގައި ހިނގި މާރާމާރީ އެކެވެ. ވޯޓުލާ ލިސްޓަށް އައި ބަދަލަކާ ގުޅިގެން ހިނގި މި ހަމަނުޖެހުމުގައި، ތެރޭގައި އެ ވޯޓު ފޮށި ފަޅާލައި، ފޮށީގައި ހުރި ވޯޓު ކަރުދާސްތައް ވެސް ގެންދިޔަ ކަމުގެ މައުލޫމާތު ވަނީ ލިބިފަ އެވެ.
ޕީއެންސީގެ އެތެރޭގެ އިންތިޚާބުގެ ވޯޓުލުން ހޮނިހިރު ދުވަހު ކުރިއަށް ގެންދިޔައީ ހެނދުނު 10:00ން މެންދުރުފަހު 2:00ށް ކަމަށްވާއިރު، މި އިންތިޚާބުގައި 33,500 މީހުންނަށް ވޯޓުލުމުގެ ޙައްޤު ލިބިފައިވެއެވެ. 1,984 މަޤާމަކަށް މީހުން އައްޔަނުކުރުމަށް ވޮޓުލާފައިވެއެވެ.
މި އިންތިޚާބު މިއަދު ބާއްވާފައިވާއިރު، މީގެ ކުރިން އިންތިޚާބު ބާއްވަން ނިންމި ތާރީޚު ތަކަށް ވަނީ އެކި ފަހަރު މަތިން ބަދަލު ގެނެސްފަ އެވެ، އެންމެ ފުރަތަމަ މި އިންތިޚާބު ބާއްވަން ނިންމީ މިދިޔަ އޮކްޓޫބަރު މަހުގެ 19 ގައެވެ. އޭގެ ފަހުން މި ހިނގާ ނޮވެމްބަރު މަހުގެ ނުވަ ވަނަ ދުވަހަށް ވެސް ފަސްކުރި އެވެ. އަނެއްކާ އޭގެ ފަހުން އިންތިޚާބު ބާއްވާނެ ތާރީޚަކަށް ކަނޑައެޅީ މިއަދުގެ ތާރީޚެވެ.
