މާޝް ހުރީ މެސީގެ އެއްބަސްވުން އައު ކުރެވޭނެ ކަމުގެ ފުރިހަމަ އުންމީދާ އެކު

އެމެރިކާގެ އިންޓަ މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީގެ އެއްބަސްވުން އައު ކުރަން ބޭނުންވާ ކަމުގެ އިޝާރާތެއް އެ ކުލަބުގެ މެނޭޖިން އޯނަރު ޖޯޖު މާޝް ވިދާޅުވެއްޖެ އެވެ.

އޭނާ މިހެން ވިދާޅުވީ މިއާމީގައި މެސީގެ ކުރިމަގާ ގުޅޭ ގޮތުން ވާހަކަ ދައްކަވަމުންނެވެ. ފްރާންސްގެ ގަދަ ބާރު ޕެރިސް ސެއިންޓް ޖާމަން (ޕީއެސްޖީ) ދޫކޮށްލުމަށްފަހު އުމުރުން 37 އަހަރުގެ މެސީ އިންޓަ މިއާމީ އަށް ބަދަލުވީ 2023 ވަނަ އަހަރުގެ ޖޫން މަހުގެ ތެރޭގަ އެވެ. އެ ކުލަބާ އެކު މެސީ ސޮއި ކޮށްފައިވާ ދެ އަހަރާ ބައިގެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރު އެވެ.

އެކަމާ ގުޅޭ ގޮތުން ނޫސްވެރިޔަކު ކުރި ސުވާލަށް ޖަވާބު ދެއްވަމުން މާޝް ވިދާޅުވީ މިއާމީގެ އައު ސްޓޭޑިއަމްގައިި 2026 ވަނަ އަހަރު މެސީ ކުޅޭނެ ކަމުގެ ފުރިހަމަ ޔަޤީންކަމާ އެކު ހުންނެވި ކަމަށެވެ. އޭނާ ބުނީ މެސީ ހުރީ އެ ކުލަބުގެ އެއްބަސްވުމެއްގައި ކަމަށާއި، މެސީގެ މުސްތަޤުބަލާ ގުޅޭ ގޮތުން އެންމެ ރަނގަޅު ވަގުތުގައި އޭނާ މެސީއާ ވާހަކަ ދައްކާނެ ކަމަށެވެ. އަދި އެ ކުލަބުގައި މެސީ ދައްކަމުން އަންނަ ކުޅުމާއި، އޭނާގެ ފަރާތުން ކުލަބަށް ލިބެމުން އަންނަ ފައިދާއާ މެދު އިންތިހާ އަށް ހިތްހަމަ ޖެހިފައި ހުރި ކަމަށް ވެސް މާޝް ވިދާޅުވި އެވެ.

އިންޓަ މިއާމީ އަކީ މެސީގެ ކެރިއަރުގައި އޭނާ ކުޅޭ ތިން ވަނަ ކުލަބެވެ. ސްޕެއިންގެ ބާސެލޯނާ އިން ސީނިއާ ކެރިއަރު ފެށި މެސީ ވަނީ އެ ކުލަބުގައި 17 އަހަރު ހޭދަކުރުމަށްފަހު ދެން މެސީ ބަދަލުވީ ޕީއެސްޖީ އަށެވެ. އެއީ ބާސެލޯނާ އާއެކު އޭނާ ސޮއި ކޮށްފައި އޮތް އެއްބަސްވުން އައު ކުރެވޭނެ އެއްވެސް ޙާލަތެއް ނެތުމުންނެވެ. ޕީއެސްޖީގައި ދެ އަހަރު ހޭދަ ކުރުމަށްފަހު ދެން މެސީ ބަދަލުވީ މިހާރުގެ ކުލަބު އިންޓަ މިއާމީ އަށެވެ. އެއީ އަލުން އޭނާ ހޯދުމުގެ މަސައްކަތް ބާސެލޯނާ އިން ކުރަމުން އަންނަނިކޮށެވެ. އޭގެ އިތުރުން ސައުދީ ލީގުގެ ކުލަބުތަކުން ވެސް އޮތީ މެސީ ހޯދުމުގެ ޝައުޤުވެރިކަމުގަ އެވެ.

އިންޓަ މިއާމީ އަށް ބަދަލުވެ މެސީ ވަނީ މިހާތަނަށް އެ ކުލަބަށް ކުޅެދިން 39 މެޗުގައި 34 ލަނޑު ޖަހައިފަ އެވެ. އެ ކުލަބާ އެކު މެސީ ވަނީ ލީގްސް ކަޕްގެ އިތުރުން ސްޕޯޓާސް ޝީލްޑު ވެސް ކާމިޔާބު ކޮށްފަ އެވެ. މެސީ ބަދަލުވީ ފަހުން މިއާމީން ވަނީ އެ ކުލަބުގެ ތާރީޚުގައި ވެސް ފުރަތަމަ ފަހަރަށް ތައްޓެއް ކާމިޔާބު ކޮށްފަ އެވެ. މެސީގެ މުސްތަޤުބަލާ މެދު މިހާތަނަށް އޭނާ ވަކި ނިންމުމެއް ނިންމާފައި ނުވާއިރު، ސައުދީ ލީގުގެ ކުލަބުތަކުން އަދިވެސް އޭނާ އަށް ޝައުޤުވެރިވާ ކަމަށް ރިޕޯޓުތަކުގައި ވަނީ ބުނެފަ އެވެ.