ޤާނޫނުއަސާސީ އަށް ބަދަލު ގެންނަން ހުށައެޅި ބިލު މުޅި މަޖިލީހުގެ ކޮމިޓީން ފާސްކޮށްފި
20 ނޮވެމްބަރު 2024 | ބުދަ 10:28ކޮމިޓީގެ ނިންމުން ފާސް ކުރަން ބުދަ ދުވަހުގެ ހަވީރު 5:30 އަށް ވަނީ މަޖިލީހުގެ ޖަލްސާއެއް ބާއްވަން ނިންމާފައި
ގާނޫނު އަސާސީގެ ދިފާއުގައި އެމްޑީޕީ އިން ބުދަ ދުވަހު ކުރަމުން ދިޔަ މުޒާހަރާ އަށް ހުރަސް އަޅަން ސަރުކާރު ޕާޓީގެ މީހުން މަސައްކަތް ކުރަނީ
ސަރުކާރުގެ ފަރާތުން ގާނޫނުއަސާސީ އަށް ބަދަލު ގެންނަން ހުށަހަޅާވާފައިވާ ބިލު މުޅި މަޖިލީހުގެ ކޮމިޓީން ބުދަ ދުވަހުގެ މެންދުރު ފަހު ފާސްކޮށްފިއެވެ.
ރައްޔިތުންގެ މަޖިލީހުގެ މެންބަރަކު ޕާޓީ ބަދަލުކޮށްފިނަމަ ގޮނޑިގެއްލޭ ގޮތައް ހުށަހެޅި އިސްލާހު ހިމެނޭ ގޮތުން، ޤާނޫނު އަސާސީ އަށް ބަދަލު ގެންނަން ހުށަހެޅި ބިލު 69 މެންބަރުންގެ ވޯޓުން މަޖިލީހަށް ބަލައިގަންނަން ފާސް ކުރީ ބުދަ ދުވަހުގެ މެންދުރު ކުރިންނެވެ.
ސަރުކާރުން އެ ބިލުގައި ގާނޫނު އަސާސީ އަށް ގެންނަން ހުށަހަޅާފައިވާ ބަދަލުތަކުގެ ތެރޭގައި، މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން މެމްބަރުކަން ގެއްލޭ ގޮތް ހެދުމާއި، ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ކަނޑައެޅުމާއި، ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ގާނޫނު އަސާސީގައި ކަނޑައެޅުން ހިމެނެއެވެ.
މުޅި މަޖިލީހުގެ ކޮމިޓީގައި ނެގި ވޯޓުގައި ބިލު ފާސްކުރަން ހާޒިރުވެ ތިބި 89 މެންބަރުންގެ ތެރެއިން 75 މެންބަރުން ވޯޓުދެއްވިއެވެ. ބިލު ފާސްކުރަން ނުފެންނަ ކަމަށް ވޯޓުދެއްވީ އެންމެ 13 މެންބަރުންނެވެ.
ކޮމިޓީގެ ނިންމުން ފާސް ކުރަން ބުދަ ދުވަހުގެ ހަވީރު 5:30 އަށް ވަނީ މަޖިލީހުގެ ޖަލްސާއެއް ބާއްވަން ނިންމާފައެވެ.
